ថ្ងៃទី១៣ ខែកញ្ញា ឆ្នាំ២០២៥ អត្ថបទគម្ពីរ (លូកា ៦,៤៣-៤៩)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

ព្រះបន្ទូលថ្ងៃនេះព្រះយេស៊ូមានព្រះបន្ទូលថា"ដើមឈើល្អឲ្យផលផ្លែល្អ រីឯដើម​ឈើ​អា​ក្រក់ផ្តល់​ផ្លែ​អា​ក្រ​ក់​”​ ពាក្យប្រស្នានេះជួយបំភ្លឺ នឹងណែនាំពីការរស់​នៅ​របស់យើង។ បើចិត្ត​គំនិតយើងល្អ ការ​ប្រ​ព្រឹត្ត​នោះ​នឹង​ល្អ​ទាំង​ការរស់នៅ និងការងារ ការប្រាស្រ័យទាក់ទងអ្នកដទៃ ដ្បិតយើងបានដាក់ក្ដី​ស្រ​ឡា​ញ់ ក្ដី​ទុក​ចិត្ត​​ ​ជា​ការ​គោរពស្រឡាញ់គ្នាទៅវិញទៅមក។

ដោយឡែកចំពោះទង្វើមិនល្អទាំងអស់ដែលនាំឲ្យយើង ធ្វើ​កា​រ​ឆក់ប្លន់ កុហក់ភូតភរ ទាំងអស់នេះ គឺជាចិត្ត​ដែល​​នាំមកភាពលោភលន់ បង្កើតជា​សេ​ចក្តី​អាក្រក់។  នេះជាចំណុចមួយឲ្យយើងទទួលស្គាល់​ថាយើង​ជា​មនុស្ស​បាប។  ថ្ងៃនេះយើងទទួលស្គាល់ថាយើង​ធ្លាប់​ជា​មនុស្ស​​បាប យើងធ្លាប់ប្រព្រឹត្តអាក្រក់ នឹងថ្ងៃនេះ​យើង​នឹងទទួលការសង្គ្រោះ។ ព្រះយេស៊ូបានមក ដើម្បី​សង្គ្រោះ​យើង រំដោះយើងពីបាប ដោយ​ព្រះអង្គ​បាន​បូជាព្រះជន្មនៅលើឈើឆ្កាង។ នៅលើឈើឆ្កាង​នេះ​ហើយព្រះយេស៊ូបាន លួសយើង នឹងអធិដ្ឋាន​ទូល​អង្វ​រ​ព្រះបិតា ឲ្យព្រះបិតាអើយ​សូមលើក​លែង​ទោស​ឲ្យគេ​ផង​ព្រោះគេមិនយល់នូ​វអ្វីដែល​គេ​ប្រព្រឹត្ត​នោះ​ទេ​។ នេះជាអំណរសប្បាយដែលព្រះជា​ម្ចាស់​​យាងមករក​អ្នក​​បាប ហើយលើកលែងទោសរំដោះបាប។​ក្រោយ​ពេលយើងបានទទួលការសង្គ្រោះ​យើ​ងត្រូ​វ​តប​ស្នង​​​​សងគុណព្រះជាម្ចាស់ ដោយ​គ្រាន់តែរស់​នៅ​ដោយ​​មានចិត្តសុភាពរាបសារ ចិត្តស្លូតបូត ចេះដាក់​ខ្លួន​ដោយសេចក្តីស្រឡាញ់ ចេះបម្រើ​គ្នាទៅវិញ​ទៅ​មក​។

ពេលយើងធ្វើទង្វើល្អ ដល់អ្នកដែលធ្វើខុសនិងយើង គឺជាការមួយដែលយើងទទួលស្គាល់ថា បងប្អូនម្នាក់​នេះ​គឺជារូបតំណាងរបស់ព្រះជាម្ចាស់។ ដើម្បីឲ្យបងប្អូនដឹងថាយើងបានទទួលការប្រណីសន្ដោសនេះ ហើយ​ឲ្យយើងដឹងគុណ នឹងចេះសងគុណដោយប្រព្រឹត្តអំពើល្អទាំងឡាយ។ សេចក្ដីល្អ​ដែល​យើង​ម្នាក់ៗ​មាន​ចំពោះបងប្អូនដទៃក៏ដូចចំពោះព្រះជាម្ចាស់ដែរ។ យើងត្រូវដឹងខ្លួនជានិច្ចថាមិនមែន​មក​ពី​យើង​ជា​មនុស្ស​ល្អ ឬខ្លាំងពូកែជាងអ្នកដទៃ ប៉ុន្តែមកពីចិត្តស្លូតបូតរាបសារ ទទួលបានការស្រឡាញ់ នឹង​លើក​លែង​ទោស​ពីព្រះជាម្ចាស់ ហេតុនេះ! ទើបការរស់នៅក៏ត្រូវប្រព្រឹត្តល្អមិនថាចំពោះមនុស្សចាស់ ក្មេង និង​យុវជន​គឺ​ត្រូវគោរពស្រឡាញ់គ្នា។ ពេលវេលារបស់យើង គឺជាពេលវេលារបស់ព្រះជាម្ចាស់ ការ​ដែល​យើងរស់​នៅ​ធ្វើ​ដំណើររួមគ្នាគឺជាពេលវេលាមួយដើម្បីជួយគ្នា។

បើយើងមានចិត្តគំនិតល្អយើងតែងតែលើកទឹកចិត្តតែងតែនាំអំណរដល់គ្នាទៅវិញទៅមក តែបើយើងរ​វល់​​តែ​ពីការឈ្នានីសបំពានលើគ្នាវាប្រៀបដូចជាភ្លើងដែលឆេះនៅក្នុងចិត្ត មានតែការបំផ្លាញគ្នាទៅ​វិញ​ទៅ​មក​។ ថ្ងៃនេះដើម្បីឲ្យមានសេចក្តីសុខសាន្ត ការគោរពស្រឡាញ់គ្នាយើងអធិដ្ឋានទូលអង្វរព្រះជាម្ចាស់! ដើម្បី​ឲ្យ​ទីណាមានមេត្តានិងក្តីស្រឡាញ់ និងមានព្រះជាម្ចាស់គង់ជាមួយយើង អាម៉ែន៕