ថ្ងៃទី១២ ខែធ្នូ ឆ្នាំ២០២៥ អត្ថបទគម្ពីរម៉ាថាយ ១១,១៦-១៩ អត្ថាធិប្បាយគម្ពីរដោយ៖ លោកបូជាចារ្យ ផាន បូរី

ថ្ងៃនេះ ព្រះយេស៊ូបានសួរសំណួរមួយដល់យើងគ្រប់គ្នាថា  តើយើងប្រៀប​ធៀបមនុស្សនៅក្នុង​សម័យ​នេះ​ប្រៀបដូចអ្នកណា? ប្រៀបដូចជាកូនក្មេងដែលនៅតាមទីផ្សារ អង្គុយ​លេង ស្រែកច្រៀង អត់ធ្វើអ្វីសោះ ឬ​​ប្រៀបដូច​មនុស្ស​ដែល​ខ្ជិល​ច្រអូ​ស​ ឬជាអ្នកឆ្លាត អ្នកសិក្សារៀនសូត្រ អ្នកខិតខំប្រឹងប្រែងរកស៊ី អ្ន​កអង្គុយ​ផឹក​ស្រា ឬអ្នកដែលធ្វើដំណើរទៅនេះទៅនោះ សួរសុខទុក្ខអ្នកនេះសួរសុខទុក្ខអ្នកនោះ។

អ្វីដែលព្រះយេស៊ូចង់ឱ្យយើងមើល ជួនកាលយើងជាមនុស្ស​ចូលចិត្តនិយាយ​​អាក្រក់​ចំពោះ​គ្នា​ទៅ​វិញ​ទៅ​មក​ ​គ្មានការលើកទឹកចិត្តគ្នាទៅវិញទៅមក មានតែ​និយាយសេចក្ដីអាក្រក់​អំពីគ្នាទៅវិញទៅម​កយ៉ាង​ច្រើន​។ ឧទាហរណ៍៖ ព្រះយេស៊ូបានលើកឡើងអំពីលោកយ៉ូហានបាទីស្ត ដែលបានតមអាហារ តមសុរា គាត់​ញ៉ាំម្ហូប​របស់គាត់ ដូចជាកណ្ដូបនឹងទឹកឃ្មុំ រស់នៅក្នុងវាលរហោស្ថាន អត់មានសម្លៀកបំពាក់ស្អាតទេ គេ​ថា លោកយ៉ូហានបាទីស្តប្រៀបដូចជាមនុស្សឆ្កួត អត់ល្អ។

រីឯព្រះយេស៊ូវិញ ព្រះអង្គអត់តមអាហារទេ ព្រះអង្គនៅជាមួយអ្នកក្រីក្រ ទ្រង់ជួយអ្នកជំងឺ ព្រះអង្គ​ទទួល​ទាន​ស្រាខ្លះជាមួយក្រុមសាវ័ក ព្រះអង្គជប់លៀងជាដើម គេថាព្រះយេស៊ូគិតតែស៊ីផឹកប្រមឹក។ ហេតុនេះ តើយើងរកមធ្យោបាយណាមួយដើម្បីឱ្យមានតុល្យភាពនៅក្នុងជីវិតរបស់យើង? ព្រះយេស៊ូបាន​ប្រព្រឹត្ត​អំពើ​ល្អយ៉ាងណាក៏ដោយ ក៏គេនៅតែចោទប្រកាន់ព្រះអង្គដែរ។

បងប្អូនជាទីស្រឡាញ់ យើងឃើញរបៀបដែលសន្តបុគ្គលបានទទួលមរណភាព ឬមរណសាក្សីដែល​បាន​ទទួល​មរណភាព ដោយសារមរណសាក្សីបានធ្វើតាមព្រះបន្ទូលរបស់ព្រះជាម្ចាស់ រស់នៅឱ្យបានត្រឹមត្រូវ មានជំនឿឱ្យបានត្រឹមត្រូវ បដិបត្តិជំនឿរបស់ខ្លួនឱ្យបានត្រឹមត្រូវ។

ប្រសិនបើយើងជឿលើព្រះយេស៊ូគ្រីស្ត ប្រសិនបើយើងជឿលើព្រះជាម្ចាស់ យើងជឿឱ្យបានត្រឹមត្រូវ ធ្វើ​តាម​​ព្រះបន្ទូលរបស់ព្រះអង្គ ទោះបីមានឧបសគ្គ មានបញ្ហាមិនថាតូចឬធំក្តី ចូរយើង​ខិត​ខំ​ប្រឹង​ប្រែង​រស់​នៅ និងបដិបត្តិតាមជំនឿឱ្យបានល្អផងដែរ។ ជា​គ្រីស្ត​បរិ​ស័ទជាអ្នកជឿលើព្រះយេស៊ូគ្រីស្ត ជឿ​ថា​ព្រះ​អង្គ​បាន​​ចាប់កំ​ណើត​ជា​មនុស្ស ព្រះ​អង្គ​សោយ​ទីវង្គត់ និង​​បី​ថ្ងៃក្រោយ​មកព្រះអង្គ​មាន​ព្រះជន្ម​រស់​ឡើងវិញ។

សប្ដាហ៍ទីពីរ ក្នុងរដូវរង់ចាំព្រះគ្រីស្តយាងមកនេះ គឺជា​សប្ដាហ៍​មួយ​ដែល​នាំឱ្យយើងគិតអំពី​ការ​កែ​ប្រែ​​ចិត្តគំនិតរបស់យើង ប្រសិនបើយើងជាគ្រីស្តបរិស័ទត្រឹមត្រូវ យើង​ត្រូវព្យា​យាមរស់នៅ​ឱ្យបាន​គាប់​ប្រសើរ​នឹង​​ព្រះហឫទ័យរបស់ព្រះជាម្ចាស់ គាប់​ប្រសើរ​នឹង​ព្រះ​បន្ទូ​លរបស់ព្រះយេស៊ូ ព្យាយាម​កសាង​សន្តិភា​ព​​នៅ​កន្លែង​ដែល​យើង​រស់នៅ ហើយសូមឱ្យយើងក្លាយ​ទៅ​ជា​បុគ្គលម្នាក់ដែលកសាងសន្តិភាព។

ហេតុនេះ សូមឱ្យអណ្ដាតរបស់យើងពោលពាក្យដែលនាំមកនូវសន្តិភាព ភ្នែករបស់យើង​មើលប្រកប​ដោយ​សន្តិ​ភាព ត្រចៀករបស់យើងស្ដាប់ពោរពេញទៅដោយសន្តិភាព ដៃរបស់យើងធ្វើ​កាយវិការ​ណា​មួយ​ពោរ​​ពេញទៅដោយសន្តិភាព ជើងរបស់យើងធ្វើកាយវិការណាមួយពោរពេញទៅដោយសន្តិភាព ចិត្ត ​និងបេះដូងរបស់យើងធ្វើយ៉ាងណាឱ្យបានស្ងប់ និងពោរពេញទៅ​ដោយសន្តិភាព។

សរុបសេចក្ដីមកជាអ្នកជឿលើព្រះយេស៊ូគ្រីស្ត ចូរឱ្យយើងចេះកែប្រែចិត្តគំនិត និងរស់នៅឱ្យបាន​គាប់​ព្រះហឫទ័យរបស់ព្រះជាម្ចាស់ និងខិតខំកសាងសន្តិភាពចំពោះគ្នាទៅវិញទៅមក សូម​​យើង​ព្យាយា​ម​អធ្យា​ស្រ័យឱ្យគ្នាទៅវិញទៅមក ដើម្បីឱ្យព្រះជាម្ចាស់អធ្យាស្រ័យឱ្យយើងដែរ។ អាម៉ែន!