ថ្ងៃទី១២ខែ ឧសភា ឆ្នាំ២០២៦ អត្ថបទគម្ពីរ យ៉ូហាន ១៦,៥-១១១​ អត្ថាធិប្បាយគម្ពីរដោយ៖លោកបូជាចារ្យ រឿង ឆ័ត្រសិរី

បងប្អូនជាទីស្រឡាញ់ និងជាទីមេត្រី! នៅថ្ងៃនេះ យើងចូលសប្តាហ៍ទី៦ ថ្ងៃអង្គារ នៅក្នុងរដូវបុណ្យចម្លង។

បងប្អូន យើងឃើញព្រះយេស៊ូកំពុងបង្ហាញ និងមិនរង់ចាំត្រឹមតែនៅក្នុងពេលអនាគតរបស់ព្រះអង្គទេ គឺព្រះអង្គត្រូវតែត្រឡប់ទៅព្រះបិតាវិញ។ ដូច្នេះ ព្រះបន្ទូលថ្ងៃនេះ តាមរយៈលោកយ៉ូហាន បានបង្ហាញអំពីការត្រឡប់ទៅព្រះជាម្ចាស់ ជាព្រះបិតារបស់ព្រះអង្គវិញ ហើយសូមឱ្យយើងទាំងអស់គ្នាដឹងថា យើងបានឃើញ និងមានបទពិសោធន៍ជាមួយព្រះយេស៊ូនៅក្នុងលោកនេះ ប៉ុន្តែត្រឹមតែមួយរយៈពេលប៉ុណ្ណោះ ដើម្បីឱ្យយើងដឹងថា ព្រះអង្គមកពីព្រះជាម្ចាស់ មកពីព្រះបិតា ដូច្នេះព្រះអង្គត្រូវតែត្រឡប់ទៅព្រះជាម្ចាស់វិញ។

ចំណុចទាំងនេះធ្វើឱ្យយើងមិនអាចឃាត់ព្រះអង្គឱ្យនៅជាមួយយើងបានរហូតទេ។ ក៏ប៉ុន្តែ ព្រះយេស៊ូកំពុងបង្ហាញនូវកិច្ចការរបស់ព្រះបិតាក្នុងលោកនេះ ហើយឱ្យយើងដឹងអំពីរបៀបរបស់ព្រះយេស៊ូគ្រីស្ត ដែលព្រះអង្គរំលឹកយើង គឺអំពីបាបដែលយើងត្រូវការព្រះអង្គជាចម្បងដើម្បីសង្គ្រោះ។

យើងយល់អំពីការកាត់ទោស និងសេចក្ដីសុចរិត ដើម្បីឱ្យយើងដឹងថាសេចក្ដីសុចរិតនោះ គឺទាមទារឱ្យយើងមានតាមរបៀបរបស់ព្រះអង្គ។ នោះគឺជាការកាត់ទោសនៅពេលចុងក្រោយ ដែលយើងត្រូវតែប្រឈម ទោះបីយើងបានខិតខំធ្វើតាមសមត្ថភាពរបស់យើងហើយក៏ដោយ។

មិនថារឿងបាប មិនថារឿងសេចក្ដីសុចរិត មិនថាдобрыйល្អឬមិនល្អ គឺយើងត្រូវតែប្រឈមក្នុងការកាត់ទោស។ ដូច្នេះ សូមកុំឱ្យយើងច្រឡំថា យើងអាចបង្គាប់ ឬអាចធ្វើឱ្យខ្លួនឯងបានតាមចិត្តយើងឡើយ។ យើងមានតួនាទីធ្វើតាមព្រះហឫទ័យរបស់ព្រះបិតា តាមអ្វីដែលព្រះបន្ទូលរបស់ព្រះយេស៊ូបានបង្គាប់។ ចំពោះលទ្ធផលដែលចេញមកយ៉ាងល្អបំផុត យើងឃើញថាការដែលយើងធ្វើល្អ នេះគឺទុកឱ្យព្រះជាម្ចាស់វិនិច្ឆ័យយើងចុះ។

ដូច្នេះ សព្វថ្ងៃនេះ សូមឱ្យបងប្អូនបន្តការអនុវត្តតាមព្រះបន្ទូលយ៉ាងម៉ត់ចត់ ការរស់នៅតាមរបៀប និងការណែនាំរបស់ព្រះអង្គ ព្រមទាំងការបង្រៀនរបស់ព្រះអង្គឱ្យបានល្អ ដើម្បីឱ្យយើងដឹងថា ទោះបីយើងនឹងចាកចេញពីលោកនេះ ក៏យើងអាចចូលទៅក្នុងព្រះរាជ្យរបស់ព្រះជាម្ចាស់ជាមួយព្រះអង្គបានដែរ៕