ថ្ងៃទី១១ ខែមេសា ឆ្នាំ២០២៦អត្ថបទគម្ពីរម៉ាកុស ១៦ (៩-១៥)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

បងប្អូនជាទីស្រឡាញ់រដូវបុណ្យចម្លងឆ្នាំនេះ ជួនពេលនៅក្នុងពេលដែលយើងនឹងអបអរសាទរឆ្នាំថ្មីដែរ បាទ! នៅថ្ងៃសៅរ៍ ទី១១ មេសា និងយើងកៀកចូលឆ្នាំមែនទែន ហើយយើងក៏នឹងស្តាប់ព្រះបន្ទូល​របស់​លោក​ម៉ាកុស១៦,៩-១៥ គឺព្រះយេស៊ូមានព្រះបន្ទូលថា «សូមអ្នករាល់គ្នា ចេញទៅប្រកាសដំណឹង​ល្អ​ដល់​ពិភព​លោកទាំងមូល»។

នេះគឺជាអំណរសប្បាយ នេះគឺជាសិរីរុងរឿងរបស់ព្រះជាម្ចាស់ បានធ្វើឱ្យយើងបានទទួលជីវិតថ្មី ទទួល​សិរីរុង​រឿងរបស់ព្រះជាម្ចាស់ ដែលបានឈ្នះសេចក្តីស្លាប់ បានឈ្នះភាពងងឹត បានឈ្នះនូវអ្វីដែល​យើង​ហៅ​ថា អត់មានសេរីភាព ទៅរកសេរីភាព គឺជីវិតថ្មីដ៏រុងរឿងអស់កល្បជានិច្ច។

ដំណឹងល្អដែលយើងបានស្តាប់ ធ្វើឱ្យយើងឃើញថាសាវ័ក លោកជាពិសេសលោកសិលា លោក​យ៉ូហាន ព្រមទាំងក្រុមគ្រីស្តទូត បានភ្ញាក់ បានចាកចេញ គឺចាកចេញពីកន្លែងដែលខ្លួនធ្លាប់រស់នៅ កន្លែង​ដែលខ្លួនធ្លាប់បំពេញ កន្លែងដែលខ្លួនធ្លាប់អស់សង្ឃឹម ទៅជាមានសង្ឃឹម ទៅជាមានអំណរសប្បាយ ដោយសារតែព្រះយេស៊ូបានជ័យជំនះលើសេចក្តីស្លាប់ ធ្វើឱ្យជីវិតមានសេរីភាពពេញទីទៅលើវត្តមាន​របស់​ព្រះយេស៊ូដែលបានមានព្រះជន្មថ្មីដ៏រុងរឿងនេះ។

សកម្មភាពរបស់ក្រុមគ្រីស្តទូតបានទៅគ្រប់ទីកន្លែង ដើម្បីនាំដំណឹងល្អដល់បងប្អូន ដល់​មនុស្ស​​លោក​ទាំងឡាយ។ បងប្អូនជាទីស្រឡាញ់! បុណ្យចម្លងនៅឆ្នាំនេះយើងនឹកឃើញ​ពី​ឆ្នាំ​ដំបូង​ដែល​ក្រុម​គ្រីស្ត​ទូត​បាន​ទទួលដំណឹងល្អ ហើយដំណឹងល្អនេះស្ថិតស្ថេរអស់កល្បជានិច្ច ព្រះអង្គបានឆ្លងកាត់ឈើឆ្កាង  ជីវិត​នៅឈើឆ្កាងនៃទុក្ខ​លំបាក​ទាំងឡាយ តែឈើឆ្កាងនេះមិ​នបាន​បញ្ចប់​ព្រះអង្គត្រឹមហ្នឹងទេ ប៉ុន្តែឈើឆ្កាងប្រែ​ទៅជាការសង្គ្រោះ ផ្តល់​អត្ថន័យថ្មីដល់ជីវិត។

អ្វីៗដែលយើងឃើញអំពីជីវិតរបស់យើង យើងជាប់នូវទុក្ខលំបាកក្តីវេទនា សេចក្តី​អាក្រក់ទាំងឡាយ ក៏​ជា​ការមួយដែលយើងរួមចំណែកជាមួយព្រះយេស៊ូ។ ព្រះអង្គអត់មានបាបសោះ ប៉ុន្តែ​ព្រះអង្គបាន​សុខចិត្ត​លះ​បង់បូជាព្រះជន្មនៅលើឈើឆ្កាង ដើម្បីប្រែឱ្យឈើឆ្កាងដែលជាទុក្ខលំបាក ដែល​ជាសេចក្តីស្លាប់នេះ ទៅជាសិរីរុងរឿង ទៅមានជីវិតថ្មី អត្ថន័យថ្មីនៃជីវិតរបស់យើងទាំងអស់គ្នា។

ដូច្នេះ ព្រះសហគមន៍របស់យើងពីមួយឆ្នាំទៅមួយឆ្នាំមានបេក្ខជនទទួលការអប់រំ និងទទួលកំណើតថ្មីគឺ ពិធីជ្រមុជទឹក ដូច្នេះយើងអរព្រះគុណព្រះជាម្ចាស់ ដែលប្រទានព្រះបុត្រាមក ដើម្បីឱ្យយើង​ទទួល​ជីវិ​តថ្មី​ដ៏រុង​រឿង​ជា​មួយ​ព្រះអង្គ អស់កាលជាអង្វែងតរៀងទៅ អាម៉ែន៕