ថ្ងៃទី០៧ ខែសីហា ឆ្នាំ២០២៥ អត្ថបទគម្ពីរ (ម៉ាថាយ ១៦,១៣-២៣) អត្ថាធិប្បាយគម្ពីរដោយ៖ លោកបូជាចារ្យ ហ្រ្វង់ស័រ អេមេល្សដាល

នៅក្នុងគម្ពីរដំណឹងល្អ ព្រះយេស៊ូមានព្រះបន្ទូលសួរក្រុមគ្រីស្តទូតថា តើលោកគឺជានរណា?  ដោយសារ​ព្រះវិញ្ញាណ​ដ៏វិសុទ្ធជួយបំភ្លឺចិត្តរបស់គាត់ លោកសិលាយល់ថាព្រះយេស៊ូជាព្រះមេស៊ី។ ព្រះមេស៊ីគឺជា​ស្តេច​មួយអង្គ ដែលព្រះជាម្ចាស់បានមានព្រះបន្ទូលសន្យាថា នឹងប្រោសប្រទាននៅក្នុងអវសាន​កាល​នៃ​ពិភពលោក ដើម្បីឱ្យជនជាតិអ៊ីស្រាអែល មានសេចក្តីសុខសាន្ត និងរួចពីខ្មាំងសត្រូវ។

ដូច្នេះពេលព្រះយេស៊ូប្រកាសថាព្រះអង្គនឹងរងទុក្ខលំបាក ហើយសោយទិវង្គត់! ត្រង់នេះតើលោកសិលា គាត់ អាចយល់បានទេ? ជនជាតិយូដា ស្តេច និងព្រះមេស៊ីសុទ្ធជាបុគ្គលដែលពោរពេញដោយសិរីរុងរឿង  មាន​ឫទ្ធីនុភាពសព្វប្រការតើអាចនឹងចាញ់គេបានយ៉ាងម៉េច!។ ប្រហែលដំណឹងល្អនេះរំលឹកយើងថា គ្មាន អ្នកណាចង់រងទុក្ខលំបាក! នឹងជួបឧបសគ្គនៅក្នុងជីវិតឡើយ  យើងអាចនឹងដូចលោកសិលាចឹង​បដិសេធ​មិន​ព្រមទទួលស្គាល់ព្រះយេស៊ូ! ប៉ុន្តែបើយើងជាគ្រីស្តបរិស័ទ យើងរួមជាមួយនឹងព្រះយេស៊ូ យើង​ស្រឡាញ់​​ព្រះយេស៊ូ យើងត្រូវតែយល់ថា គ្មាននរណាម្នាក់អាចគេចផុតពីទុក្ខលំបាកបានឡើយ។ ជា​ពិសេស ពេលយើងជាគ្រីស្តបរិស័ទ យើងរងទុក្ខលំបាកគឺយើងអាចផ្ដល់អត្ថន័យដល់ទុក្ខលំ​បាក​របស់​យើង គឺ យើងរួមជាមួយនឹងព្រះយេស៊ូ ដែលបានរងទុក្ខ នឹងសោយទិវង្គត់។

ដូច្នេះប្រសិនជាយើងផ្ដល់អត្ថន័យដល់ទុក្ខលំបាកយើងអាចទ្រាំនិងទុក្ខលំបាក។ ខ្ញុំចាំថាសន្តីតេរេសាតូច គាត់រងទុក្ខលំបាកជាច្រើននៅពេលគាត់រស់នៅក្នុងវត្តអារាមរបស់គាត់។ ទុក្ខលំបាកដែល​មកពី​ការស្នាក់​នៅ​ក្នុងអារាម ទុក្ខលំបាកដែលមកពីបងប្អូនស្រីរបស់គាត់ក្នុងអារាម ទុក្ខលំបាកដែលមកពីគាត់ធ្លាក់​ខ្លួន​ឈឺ ប៉ុន្តែគាត់នៅតែមានអំណរសប្បាយជានិច្ច។ នេះជាលក្ខណៈពិសេសរបស់សន្ត សន្តី គឺអស់​អ្នក​​ជា​ជនដ៏វិសុទ្ធដែលរួមជាមួយព្រះយេស៊ូ គឺគាត់ថ្វាយទុក្ខលំបាករួមជាមួយនឹងព្រះយេស៊ូ។  មានន័យថា យើង​អា​ច​ស៊ូទ្រាំទុក្ខលំបាកបាន។ តាមពិត! ព្រះជាម្ចាស់គង់ជាមួយយើង​ទោះបីគេឆ្កាង​ព្រះយេស៊ូជា​ចោរ​ក៏​ព្រះយេស៊ូមិនត្រូវបានព្រះជាម្ចាស់បោះបង់ចោល។ ព្រះយេស៊ូ ជាព្រះបុត្រារបស់ព្រះជាម្ចាស់ ព្រះជាម្ចាស់​មិនដែលបោះបង់ព្រះយេស៊ូទេ។ ទោះបីព្រះអង្គជាប់នឹងឈើឆ្កាងក៏ដោយ។

ពេលយើងរងទុក្ខសុំឲ្យយើងជឿជាក់ថា ព្រះជាម្ចាស់មិនបោះបង់យើងចោលទេ។ ព្រះជាម្ចាស់មិន​ស្អប់​យើង​ទេ  ផ្ទុយទៅវិញព្រះជាម្ចាស់សព្វព្រះហឫទ័យឲ្យយើងរួមទុក្ខជាមួយនឹងព្រះយេស៊ូ ដើម្បីជួយ​សង្គ្រោះ​​អ្នកដទៃ។ ក្នុងឋានៈជាគ្រីស្តបរិស័ទគឺជាព្រះកាយតែមួយនឹងព្រះយេស៊ូ យើង​ជា​ស​រី​រា​ង្គ​ របស់​ព្រះយេស៊ូ ដើម្បីជួយបំពេញទុក្ខលំបាករបស់ព្រះយេស៊ូជាប្រយោជន៍ដល់អ្នកដទៃ។

ដូច្នេះ សុំបងប្អូនកុំអស់សង្ឃឹម! ត្រូវជឿថាព្រះជាម្ចាស់មិនបោះបង់បងប្អូនចោល តែបងប្អូនរង​ទុក្ខ​លំ​បាក ប៉ុន្តែ​ផ្ទុយទៅវិញ ព្រះយេស៊ូ ត្រាស់ហៅយើងឲ្យរួមជាមួយព្រះអង្គ តាមរបៀបពិសេស ដូច្នេះយើងមាន​ចិត្ត​ក្លាហាន ហើយយើងមានសង្ឃឹមជានិច្ច។  អាម៉ែន៕