ថ្ងៃទី០៦ ខែកុម្ភៈ ឆ្នាំ២០២៦អត្ថបទគម្ពីរម៉ាកុស៦,១៤-២៩អត្ថាធិប្បាយគម្ពីរដោយ៖ លោកបូជាចារ្យ ផាន បូរី

អត្ថបទព្រះគម្ពីរដំណឹងល្អនៅក្នុងថ្ងៃនេះ មានអត្ថន័យយ៉ាងជ្រាលជ្រៅណាស់​សម្រាប់ជីវិតរស់​នៅ​ប្រចាំ​ថ្ងៃ​របស់​យើង។ ដោយសារតែព្រះនាមរបស់ព្រះយេស៊ូ និងកេរ្តិ៍ឈ្មោះដ៏ល្បីល្បាញរបស់ព្រះអង្គ បានធ្វើ​ឱ្យ​មនុស្ស​មួយចំនួនគិតថា ព្រះអង្គគឺជាព្យាការីអេលី ឬជាព្យាការីនៅសម័យដើម។

យើងឃើញរវាងស្តេចហេរ៉ូដ និងស្ត្រីម្នាក់ដែលបានមករាំថ្វាយព្រះអង្គ ក្នុងឱកាសពិធីបុណ្យខួបកំណើត។ ដោយសារតែការសន្យារបស់ស្តេចហេរ៉ូដ និងការមិនចង់ខកខាននូវពាក្យសន្យាដែលបានធ្វើឡើង នៅ​ចំពោះ​មុខមនុស្សទាំងអស់ ទើបព្រះអង្គបានបញ្ជាឱ្យគេកាត់ក្បាលលោកយ៉ូហានបាទីស្ត ដាក់​លើថា​ស​ដើម្បី​ថ្វាយដល់ស្ត្រីនោះ។ កូនស្រីរបស់ហេរ៉ូឌីយ៉ាដា បានធ្វើតាមសំណូមពររបស់ម្ដាយនាង ដោយ​ការ​សុំ​ឱ្យ​ស្តេចហេរ៉ូដកាត់ក្បាលលោកយ៉ូហានបាទីស្ត។

បងប្អូនជាទីស្រឡាញ់ បងប្អូនជាទីគោរពរាប់អាន ពេលណាយើងប្រព្រឹត្តបាបធំដូចនេះ​គឺមានន័យថា​យើង​កំពុង​ងាកទៅរកមារសាតាំង ដែលតែងតែព្យាយាមបង្កភាពរំខានដល់កិច្ចការរបស់ព្រះជាម្ចាស់។

កិច្ចការរបស់ព្រះជាម្ចាស់គឺចង់ឱ្យមនុស្សលោកមានភាពរួបរួមគ្នាជាធ្លុងតែមួយ ចេះកសាងសុខសន្តិភាព និងរស់នៅជាមួយគ្នាដោយសេចក្តីស្រឡាញ់ និងរស់នៅជាមួយគ្នាដោយសុខដុមរមនា ដោយ​មិន​ប្រកាន់​សាសនា នយោបាយ វណ្ណៈ ឬភេទនោះឡើយ។ ប៉ុន្តែក្នុងពិភពលោកបច្ចុប្បន្ន មារសាតាំង​កំពុងជ្រៀ​ត​ជ្រែក ដែលបណ្តាលឱ្យមនុស្សមានការបែកបាក់គ្នា សង្ស័យគ្នា និងគិតតែពីប្រយោជន៍ផ្ទាល់ខ្លួន រហូត​ដល់​ហ៊ានសម្លាប់អ្នកដទៃ។

បងប្អូនជាទីគោរពរាប់អាន យើងជាគ្រីស្តបរិស័ទក្នុងនាមជាបុត្រធីតារបស់​ព្រះ​ជា​ម្ចាស់ យើងត្រូវ​រស់​នៅ​ឱ្យ​មាន​តម្លៃក្នុងសង្គម ដោយយកព្រះបន្ទូលរបស់ព្រះអង្គធ្វើជាទីពឹង។ ព្រះ​បន្ទូល​គឺ​ជាអាហារផ្លូវវិញ្ញាណ ដែល​ជួយឱ្យយើងចេះបែងចែកអ្វីដែលល្អ និងអ្វីដែលមិនល្អ អ្វីដែលគួរធ្វើ និង​អ្វី​ដែល​គួរ​ជៀសវាង។ កុំធ្វើ​ដូច​នាងហេរ៉ូឌីយ៉ាដា ដោយសារតែកំហឹង ការចងគំនុំ និងការមិនចេះលើកលែងទោស នាំឱ្យប្រព្រឹត្ត​អំពើ​បាប​រហូតដល់ការសម្លាប់ជីវិតមនុស្ស។

ហេតុនេះ យើងជាគ្រីស្តបរិស័ទត្រូវបទពិសោធន៍នេះ យើងអត់ចង់ធ្វើទេ  ហើយបទពិសោធន៍នេះ​យើង​ចង់​​ជៀស​វៀងគឺយើងចង់នៅជិតស្និទ្ធជាមួយព្រះជាម្ចាស់។ ប្រសិនបើយើងចង់នៅជិតស្និទ្ធជាមួយព្រះជាម្ចាស់ យើងត្រូវការយកព្រះគ្រីស្តជាទីពឹង និងស្តាប់តាម​ព្រះ​បន្ទូ​ល​របស់​ព្រះអង្គ គឺការស្រឡាញ់ខ្មាំងសត្រូវ និងការចេះលើកលែងទោសឱ្យគ្នាទៅវិញទៅមក។  ​សូម​ឱ្យ​យើង​ជាគ្រីស្តបរិស័ទទៅទទួលអគ្គសញ្ញាស្រាយបាប  ដើម្បីសូមព្រះជាម្ចាស់លើកលែងទោសឱ្យយើង សូម​​ឱ្យ​យើងចេះកសាងសន្តិភាពរកអំណរសប្បាយ និងអំណរសប្បាយនៅក្នុយជីវិតរបស់យើង សូមកុំ​ឱ្យ​យើងចាញ់ល្បិចកលមាសារតាំងឡើយ។ ផ្ទុយទៅវិញសូម​ឱ្យយើងនៅជិតស្និទ្ធ​ជា​មួយព្រះជាម្ចាស់​ជា​រៀង​រាល់​ថ្ងៃអស់មួយជីវិតរបស់យើង៕