ថ្ងៃទី០៥ ខែមេសា ឆ្នាំ២០២៦អត្ថបទគម្ពីរយ៉ូហាន ២០,១-៩អត្ថាធិប្បា​យគម្ពីរដោយ៖ លោកបូជាចារ្យ គង់ វៀល

ព្រះគ្រីស្តមានព្រះជន្មរស់ឡើងវិញ! មែនហើយ ព្រះគ្រីស្តមានព្រះជន្មរស់ឡើងវិញពិតមែន! ថ្ងៃនេះ​​បងប្អូន ជាពិធីបុណ្យកំពូលនៃពិធីបុណ្យទាំងឡាយក្នុងគ្រីស្តសាសនា គឺគ្រីស្តបរិស័ទទូរទាំងសកលលោក​នាំ​គ្នាលើកតម្កើងព្រះយេស៊ូដែលមានព្រះជន្មរស់ឡើងវិញ។ ព្រឹត្តិការណ៍នេះអស្ចារ្យ អស្ចារ្យពេក ពិបាក​ស្រមៃ និងជឿផងដែរ។

គ្រីស្តបរិស័ទត្រូវនឹកសញ្ជឹងគិតអំពីព្រះយេស៊ូមានព្រះជន្មរស់ឡើងវិញ។ កុំនឹកស្មានថា ព្រះសពព្រះអង្គ​គ្រាន់​​តែកម្រើករវើកសាច់ឈាមថ្មី និងរស់ដូចជាពីមុន ឬព្រះអង្គចាប់ជាតិនោះឡើយ។ ពាក្យថា ព្រះយេ​ស៊ូ​មាន​ព្រះជន្មរស់ឡើងវិញ មានន័យថា៖

ទីមួយ៖ សព្វថ្ងៃព្រះអង្គមានព្រះជន្មពិតមែន តាមរបៀបផ្សេងពីមុន។

ទីពីរ៖ ព្រះជាម្ចាស់បានលើកព្រះយេស៊ូឡើងឱ្យគង់នៅជាមួយព្រះអង្គ។ ព្រះយេស៊ូប្រកបដោយជីវិតថ្មី គឺ​ប្រកបដោយព្រះវិញ្ញាណ និងដោយសិរីរុងរឿងដែលព្រះ​ជាម្ចាស់មានក្នុងព្រះជន្មផ្ទាល់​របស់​ព្រះជាម្ចា​ស់​។

ទីបី៖ ព្រះអង្គគង់នៅជាមួយអស់អ្នកដែលផ្ញើជីវិតទាំងស្រុងលើព្រះអង្គ ព្រះអង្គកែប្រែចិត្តគំនិត​របស់​អ្នក​ជឿឱ្យមានចិត្តគំនិតដូចព្រះអង្គដែរ។ ទ្រង់នាំគេឱ្យអត់ទោសដល់អ្នកដទៃ ឱ្យយកចិត្តទុកដាក់ដល់អ្នក​តូច​តាច ឱ្យមានចិត្តនឹងនក្នុងពេលដែលកើតទុក្ខលំបាក។

ទីបួន៖ សព្វថ្ងៃព្រះអង្គសាងពិភពលោកថ្មី គឺតាំងព្រះរាជ្យព្រះជាម្ចាស់ដោយចាក់បង្ហូរព្រះវិញ្ញាណ។

បងប្អូនជាទីស្រឡាញ់ ថ្ងៃនេះជាថ្ងៃបុណ្យចម្លង ជាថ្ងៃបុណ្យដ៏សំខាន់បំផុតសម្រាប់យើងជាគ្រីស្តបរិស័ទ។ ហើយ​សម្រាប់បងប្អូនវិញ តើព្រះជន្មថ្មីរបស់ព្រះអង្គមានអត្ថន័យយ៉ាងម៉េច? តើព្រះជន្មថ្មីនេះ ប៉ះពាល់​ដល់ជីវិតរបស់បងប្អូនយ៉ាងម៉េចដែរ?

បងប្អូន! ចូរកែប្រែចិត្តគំនិត ចូរទទួលអំណរសប្បាយដែលមកពីព្រះយេស៊ូគ្រីស្តដែលមានព្រះជន្មថ្មី! រីក​រាយ​បុណ្យ​ចម្លង! ព្រះយេស៊ូគ្រីស្តមានព្រះជន្មរស់ឡើងវិញ! ព្រះយេស៊ូគ្រីស្ត​មាន​ព្រះជន្ម​រស់​​ឡើងវិញ​ពិត​មែ​ន!