ថ្ងៃទី០៥ ខែមករា ឆ្នាំ២០២៦ អត្ថបទគម្ពីរ (ម៉ាថាយ ៤,១២-១៧.២៣-២៥)អត្ថាធិប្បាយគម្ពីរដោយ៖ លោកបូជាចារ្យ ប៉ូល វិន កាន់

បងប្អូនជាទីគោរពជាទីស្រឡាញ់ ថ្ងៃនេះជាថ្ងៃចន្ទ ក្រោយបុណ្យព្រះយេស៊ូសម្ដែង​ព្រះអង្គ​ឲ្យ​ពួក​ហោរាចារ្យ​​ឃើញ ក៏ដូចជាព្រះអង្គបានបង្ហាញព្រះអង្គឲ្យមនុស្សលោកស្គាល់ព្រះអង្គដែរ។

តាមរយៈព្រះបន្ទូលដែលយើងបានស្ដាប់ថ្ងៃនេះ ព្រះយេស៊ូបានចាប់ផ្ដើមបំពេញបេសកកម្មនៃការប្រ​កាស​ដំ​ណឹង​ល្អរបស់ព្រះអង្គ ខណៈពេលដែលលោក យ៉ូហាន បាទីស្ដ បានបញ្ចប់បេសកកម្មរប​ស់លោក​ព្រោះ​ត្រូ​វគេចាប់ឃុំឃាំង។ ហេតុនេះ ព្រះយេស៊ូចាប់ផ្ដើមព្រះរាជកិច្ចរបស់ព្រះអង្គ ចាប់ផ្ដើមពី​ស្រុក​កា​លី​​ឡេ។

នៅស្រុកកាលីឡេ ជាតំបន់សំបូរទៅដោយជាតិសាសន៍ផ្សេងៗគ្នា មានទាំងសាសន៍យូដា និងសា​សន៍​ដទៃ​ ព្រះយេស៊ូប្រកាសដំណឹងល្អ ដោយចាប់ផ្ដើមប្រកាសថា "ចូលកែប្រែចិត្តគំនិត ត្បិតព្រះរាជ្យនៃឋានបរម​សុខ​​មកជិតដល់ហើយ"។ ជាសេចក្ដីប្រកាសដូចដែលនឹងសេចក្ដីប្រកាសរបស់លោកយ៉ូហាន បាទីស្ដដែរ​។

ហេតុអ្វីសេចក្ដីប្រកាសនេះ ពិតជាមានសារៈសំខាន់សម្រាប់ព្រះយេស៊ូ និងលោកយ៉ូហាន បាទីស្ដ? ពី​​ព្រោះ​​ព្រះជាម្ចាស់នឹងមិនអាចសង្គ្រោះមនុស្សលោក ប្រសិនបើគេមិនចេះកែប្រែចិត្តគំនិត។ ព្រះយេស៊ូ​បាន​និយាយ​ថា ព្រះអង្គយាងមកដើម្បីសង្គ្រោះអ្នកបាប សង្គ្រោះអ្នកជំងឺ សង្គ្រោះអ្នកដែលទទួល​ស្គាល់​ភាព​ខ្វះ​ខាត និងភាពទន់ខ្សោយក្នុងជីវិត។ ជាហេតុដែលព្រះអង្គបង្រៀនគេ ហើយព្រះអង្គក៏ព្យាបាល​អ្នកជំងឺគ្រ​ប់​ប្រភេទដែលគេនាំមករកព្រះអង្គ។

ជាគ្រីស្តបរិស័ទ ក្នុងជំនឿលើព្រះយេស៊ូ តើយើងត្រូវការព្រះអង្គជួយសង្គ្រោះយើងអ្វីខ្លះក្នុង​ជីវិត​​​បច្ចុប្បន្ន​នេះ? ឬក៏យើងលែងត្រូវការព្រះអង្គហើយ ពីព្រោះយើងមិនមានជំងឺ យើងជាមនុស្ស​ល្អ​ហើយ ឬ​សង្គម​ផ្ដល់​ឲ្យអ្វីៗគ្រប់យ៉ាងដែលយើងត្រូវការហើយ! ជាហេតុមិនត្រូវការកែ​ប្រែ​ចិត្តគំនិត មិន​ត្រូវ​ការ​ព្រះជា​ម្ចាស់​ទៀត​ទេ? នេះជាសំណួរដែលខ្ញុំចង់ឲ្យបងប្អូនរិះគិតពិចារណចំពោះជំនឿរបស់ខ្លួនម្នាក់ៗ។

សូមព្រះយេស៊ូប្រទានព្រះវិញ្ញាណមកបំភ្លឺដួងចិត្តយើងខ្ញុំផង ដើម្បីឲ្យយើងខ្ញុំកែប្រែចិត្តគំនិតរាល់ថ្ងៃ ឲ្យ​យើង​ខ្ញុំនៅតែត្រូវការព្រះអង្គជួយព្យាបាល និងសង្គ្រោះព្រលឹងវិញ្ញាណយើងខ្ញុំដែរ។ អាម៉ែន៕