ថ្ងៃទី០៥ ខែកញ្ញាឆ្នាំ២០២៥អត្ថាធិប្បាយគម្ពីរ លូកា ៥,១-១១

បកស្រាយដោយ៖ លោកបូជាចារ្យ ហ្វ្រង់ស័រ អេមេល្សដាល

នៅក្នុងអត្ថបទដំណឹងល្អនៅថ្ងៃនេះយើងឃើញថា លោកសិលា និងក្រុមសាវ័កទៅនេសាត្រី ទោះបីគេ​ខិត​ខំ​អស់មួយយប់ក៏គ្មានត្រី តែមានព្រះយេស៊ូជិះទូកទៅជាមួយគាត់ ព្រះអង្គសុំឱ្យគាត់បោះសំណាញ់ ក្រោយ​មកគេបានត្រីច្រើន ព្រោះគេបានធ្វើតាមព្រះបន្ទូលរបស់ព្រះយេស៊ូ។ អត្ថបទ​ថ្ងៃនេះ​ប្រហែល​ជា​យើង​​ស្គាល់ហើយ និងបង្ហាញឱ្យយើងដឹងថា បើគ្មានព្រះយេស៊ូនៅក្នុងជីវិតរបស់យើង ​យើងធ្វើអ្វីមិន​កើត​ទេ ទោះជាយើងខិតខំយ៉ាងណាក៏ដោយ ប្រសិនជាយើងមិនរួមរស់ជា​មួយព្រះជាម្ចាស់​យើងមិនមា​ន​ទំនាក់​ទំ​នងជាមួយព្រះអង្គជីវិតរបស់យើងដូចជាគ្មានន័យ។​

អត្ថបទនេះមិន​គ្រាន់តែបង្ហាញ​អំពីរឿងដែលព្រះយេស៊ូត្រាស់ហៅសាវ័កដំបូង ​ឲ្យធ្វើជាគ្រីស្តទូត​ដើរ​តាម​ព្រះអង្គ ប៉ុន្តែរឿងនេះបង្ហាញពីអត្ថន័យនៃជីវិតរបស់យើង​តាំង​ពី​ដើមដំបូង គឺជំនាន់​លោក​អាដាំ និ​ង​នាង​អេវ៉ា ដែលបានធ្លាក់ខ្លួនជាអ្នកមានបាប ព្រោះមិនព្រមធ្វើតាមព្រះជាម្ចាស់ ហើយមនុស្សមានបាបទាំង​នេះ​ប្រៀប​ដូចជាយើងទាំងអស់គ្នាដែលចង់ពឹងពាក់លើខ្លួនឯង មិនចង់ពឹងផ្អែកលើព្រះណាមួយ។

តាមពិតរឿងនេះមកពីអំនួតរបស់យើង មកពីយើងមិនយល់អំពីសេចក្តីស្រឡាញ់​ កាលយើងនៅ​ជា​កូន​ក្មេង​តូច ​ យើងម្នាក់ៗត្រូវការឪពុកម្តាយ ពឹងផ្អែក​លើ​ឪពុក​ម្តាយ មិនថាពេលរីករាយ ឬលំបាក​ក្តី​តែង​ត្រូវ​ការ​ម្តាយឪពុកឲ្យនៅក្បែរជានិច្ច តែនៅពេលដែលយើងចាប់ផ្តើមធំដឹងក្តីបន្តិច​ចេះ​រិះ​គិត​ពិចារណាបន្តិច យើង​ម្នាក់ៗក៏ចាប់ផ្តើមលែងនឹកនា ពីក្តីស្រឡាញ់ដែលគ្មាន​ព្រំដែន​របស់ម្តាយឪពុក ត្បិតយើង​ភ្លេច​កាល​គ្រា នៅតូចប្រសិនបើ​គ្មានម្តាយកូនតូចនេះ នឹងយំរកភាពកក់ក្តៅ។

យើងប្រៀបដូចជាកូនតូចនៅក្នុងព្រះហស្ថព្រះជាម្ចាស់ដែល​ពោរពេញដោយ​សេចក្តី​ស្រឡាញ់ ប្រសិនជា​យើង​យល់អំពីក្តីស្រឡាញ់មួយនេះ នោះយើងលែងចង់ពឹងផ្អែកលើខ្លួនឯង ត្បិតយើង​មាន​ព្រះជា​ម្ចាស់​ជា​ទី​ពឹង​ នឹងមានទំនាក់ទំនងដែលពោរពេញដោយសេចក្តីស្រឡាញ់ដូចកូននឹងឪពុកម្តាយ ដែលនេះជា​អត្ថន័យ​ជីវិត​របស់យើង។ លោកសិលាគាត់ឆ្ងល់ ហើយគាត់យល់ថា គាត់ជាមនុស្សមានបាបគាត់លុតជង្គង់ចំពោះមុខព្រះយេស៊ូ ហើយព្រះយេស៊ូចាប់ដៃគាត់ ហើយឱ្យគាត់ក្រោកឡើងគឺដូចជាព្រះយេស៊ូចាត់ឱ្យគាត់ទៅផ្តល់អត្ថន័យដល់ជីវិតរបស់គាត់។ លោកសិលាទៅជាអ្នកនេសាមនុស្ស នឹងទៅជាសម្តេចប៉ាបទីមួយដែលមានកិត្តិយស និងមានអំណរសប្បាយពិតប្រាកដមែន។ ដូច្នេះសុំឱ្យយើងយល់ច្បាស់ថាព្រះជាម្ចាស់ជានរណា? ព្រះជាម្ចាស់ជាព្រះបិតាដែលសព្វព្រះហឫទ័យស្រឡាញ់យើង ហើយនឹងប្រោសយើងឱ្យមានសេរីភាពពេញលក្ខណៈ។ ពេលយើងយកព្រះជាម្ចាស់ជាទីពឹងយើងមិនមែនជាឈ្លើយនៃព្រះជាម្ចាស់ យើងមិនមែនជាប់គុកមិនមែនទេ ព្រះជាម្ចាស់ប្រោសឱ្យយើងមានសេរីភាព ព្រះជាម្ចាស់រំដោះយើងឱ្យរួចពីអំពីបាប ដើម្បីឱ្យយើងទៅជាមនុស្សពេញលក្ខណៈ។ ដូច្នេះសុំកុំខ្លាចយកព្រះជាម្ចាស់ជាទីពឹង ដើម្បីទៅជាមនុស្សពេញលក្ខណៈ។ អាម៉ែន៕