ស៊ឺម៉ា យៀន អធិរាជបន្ទាប់ពីសម័យសាមកុក

ស៊ឺម៉ា យៀន គឺជាអធិរាជប្រទេសចិន ក៏ត្រូវបានស្គាល់នៅក្រោមឈ្មោះរជ្ជកាល ព្រះអង្គវូទី។ ស៊ឺម៉ា យៀន គឺជាកូនប្រុសរបស់ស៊ឺម៉ា ចាវ បងប្អូនជីដូនមួយរបស់ស៊ឺម៉ា ស្ហ៊ឺ និងជាចៅរបស់​ស៊ឺម៉ា អ៊ី។ ព្រះអង្គស្នងមរតកបន្តពីបិតានៅក្នុងតំណែងព្រះអង្គម្ចាស់ ជីន ព្រមទាំងដំណែង​ជា​អ្នក​​កាន់កិច្ចការរាជការ។ នៅឆ្នាំ២៦៥ ព្រះអង្គបានឲ្យអធិរាជ ឆាវហ័ន​ នៃត្រកូលឆាវ ដាក់​រាជ និង​ស្ថាបនារាជវង្សជីន។ ដូច្នេះព្រះអង្គជាអ្នកបញ្ចប់ជាផ្លូវការនៅសម័យកាលនគរបី ឬ​សម័យ​សាមកុក​នៅប្រទេសចិន។

នៅឆ្នាំ២៨០ ស៊ឺម៉ា យៀន បានតែងតាំងមេទ័ពឌូ យូ ជាមេបញ្ជាការ​ និងប្រគល់ភារកិច្ចឲ្យគាត់​ឈ្លាន​ពាននគរអ៊ូ។ មេទ័ពបានធ្វើការវាយប្រហារពីរដងខាងជើងគោក និងជើងទឹក ទៅលើ​រាជធានី​ជៀន យេ ដោយប្រើប្រាស់ទាហានប្រមាណ ១០០០០០នាក់។ រាជវង្សជីន បាន​ធ្វើ​ឲ្យ​សត្រូវ​ចុះចាញ់​យ៉ាងរហ័ស។

អធិរាជនគរអ៊ូ ស៊ុន ហាវ បានបំពេញពិធីចុះចាញ់នៅពីមុខអធិរាជជីន។ ហេតុដូច្នេះ ស៊ឺម៉ា យៀន បានក្លាយជាស្តេចនៃប្រទេសចិនទាំងមូល និងបង្រួបបង្រួមប្រទេស។

ក្នុងនាមជាអធិរាជ ស៊ឺម៉ា យៀន ជាទូទៅ​ត្រូវបានចាត់​ទុកជាស្តេចដែលមានសប្បុរសធម៌ និង​ល្អ ក៏ប៉ុន្តែ​ក៏ជាស្តេចដែលចំណាយខ្ជះខ្ជាយដែរ។ ភាពចិត្តល្អ និងសុភាពរបស់ព្រះអង្គ ក៏នាំ​ដល់​ការរលត់នៃអំណាចរបស់ព្រះអង្គ ពីព្រោះ​ព្រះអង្គ​មានការអនុគ្រោះពេកចំពោះអំពើ​ពុក​រលួយ​របស់​គ្រួសារអភិជន និងការចំណាយ​យ៉ាង​ខ្ជះខ្ជាយ​នូវធនធាន​ ដែលនេះធ្វើឲ្យមានការ​ដក​​ហូតយកទ្រព្យសម្បត្តិរបស់ប្រជាជន។ លើសពីនេះ នៅខណៈដែលស៊ឺម៉ា យៀន ស្ថាបនា​រាជវង្ស​​ជីន ព្រះអង្គមានការព្រួយបារម្ភ​នឹងស្ថិរភាព​របស់ព្រះអង្គ និងជឿថា របបត្រកូល​ឆាវ​​នៃ​នគរវៃ ដែលនៅមុននោះ ត្រូវបានរងទណ្ឌកម្មបរាជ័យ​ដោយសារផ្តល់​អំណាចដល់​ព្រះ​អង្គ​​ម្ចាស់​នៃកុលសម្ព័ន្ធចក្រភព ដូច្នេះព្រះអង្គបានផ្តល់អំណាចយ៉ាងធំធេងដល់​សាច់ញាតិព្រះ​អង្គ មាន ពូ បងប្អូនជីដូង​មួយ និងកូនរបស់ព្រះអង្គ ទាំងនៅក្នុងជួរយោធាដ៏មានអំណាច។ សកម្មភាព​ដ៏គួរឲ្យចង់សើចទាំងនេះ បាននាំឲ្យមាន​ការបាត់បង់ស្ថិរភាព​នៃរាជវង្សជីន នៅ​ខណៈ​ដែលព្រះអង្គម្ចាស់នានាបានតាំងចិត្តនៅក្នុង​ការប្រយុទ្ធសម្លាប់បងប្អូនឯងនៅក្រោម​ឈ្មោះ​​សង្រ្គាម​ព្រះអង្គម្ចាស់ទាំង ៨។ នេះគឺជាព្រឹត្តិការណ៍ដែលកើតមានឡើង​នៅពេល​ព្រះ​អង្គ​​ស៊ឺម៉ា យៀន ចូលទីវង្គតបានបន្តិច។ បន្ទាប់មកក៏មានការបះបោរ អ៊ូ ហ៊ូ របស់​ជនជាតិ​ក្រៅ​ពីជនជាតិហានពីភាគខាងជើង ដែលស្ទើរកំទេច​រាជវង្ស​ជីន និងបង្ខំឲ្យរាជវង្ស​ព្រះអង្គ​ត្រូវ​ទៅ​តាំង​​នៅ​តំបន់​ខាងត្បូង​នៃទន្លេហួយ។

ស៊ឺម៉ា យៀន ភ្លាមៗ បន្ទាប់ពី​បានឡើងសោយរាជ្យ និងរំលាយរាជវង្សមុន ព្យាយាមកែនូវអ្វី​ដែល​ព្រះអង្គធ្លាប់បានឃើញថា ជាភាពទន់ខ្សោយដ៏ធំបំផុត​នៃរាជវង្សមុន គឺការខ្វះខាតនូវ​អំណាច​​របស់ព្រះអង្គម្ចាស់។ ព្រះអង្គតែងតាំង​សមាជិក​គ្រួសារព្រះអង្គម្ចាស់ និងផ្តល់​នូវ​អំណាច​ច្រើនដ៏ពួកគេ ជួនកាលអំណាចផ្តាច់ការនៅលើតាមខេត្ត និងមានទាហានឯករាជ្យ​ទៀត។ ឥទ្ធពល​ដ៏អាក្រក់​នៃប្រព័ន្ធនេះ គឺថា វាធ្វើឲ្យ​បែកខ្ញែក​អំណាចអធិរាជ។  

ប្រព័ន្ធនេះ ទោះបីវាត្រូវបានកាត់បន្ថយបន្ទាប់ពីសង្រ្គាមនៃព្រះអង្គម្ចាស់ទាំង ៨ និងការបាត់​បង់​ភាគខាងជើងនៃប្រទេសចិន ក៏វានៅតែស្ថិតនៅរបស់ដល់ចុងបញ្ចប់នៃរាជវង្សជីន ហើយ​ក៏​ត្រូវ​បានប្រកាន់យកដោយ​រាជវង្សក្រោយៗ មកទៀត។

ស៊ឺម៉ា យៀន ក៏បានព្យាយាមសម្រាលច្បាប់នៃរាជវង្សមុន ប៉ុន្តែកំណែទម្រង់របស់ព្រះអង្គ​នៃ​ប្រព័ន្ធ​ច្បា​ប់ព្រហ្មទណ្ឌ គឺមិនសមធម៌ ពីព្រោះការសម្រាលទោសធ្វើឡើងសម្រាប់វណ្ណៈ​អភិជនគហបតី ដោយមិនធ្វើឡើងចំពោះប្រជាជនសាមញ្ញធម្មតាៗ នោះទេ។