លោកម៉ាក រូតតេ អគ្គលេខាអង្គការណាតូថ្មី ឡើងកាន់តំណែងជាផ្លូវការ

លោកម៉ាក រូតតេ បានក្លាយជាអគ្គលេខានៃអង្គការណាតូ​ ជាផ្លូវការ ចាប់តាំងពីថ្ងៃទី១ ខែតុលា ឆ្នាំ២០២៤ បន្តពីលោកជេន ស្តូលថេនប៊ើហ្គ។  

លោកម៉ាក រូតតេ កើតនៅថ្ងៃទី១៤ ខែកុម្ភៈ ឆ្នាំ១៩៦៧ នៅទីក្រុងឡាអេ ប្រទេសហូឡង់។ លោក​គឺជារដ្ឋបុរសហូឡង់។ ជាសមាជិកនៃគណបក្សប្រជាប្រិយសម្រាប់សេរីភាព និង​ប្រជាធិបតេយ្យ (VVD) លោកម៉ាក រូតតេ គឺជានាយករដ្ឋមន្រ្តីហូឡង់ពីថ្ងៃទី១៤ ខែតុលា ឆ្នាំ​២០១០ ដល់ថ្ងៃទី២ ខែកក្កដា ឆ្នាំ២០២៤។

លោកម៉ាក រូតតេ កើត និងចំណាយពេលវ័យកុមារ នៅទីក្រុងឡាអេ ប្រទេសហូឡង់ នៅក្នុង​គ្រួសារ​ដែល​មានជំនឿកែទម្រង់។ នៅឆ្នាំ១៩៩២ លោកម៉ាក រូតតេ បានទទួលសញ្ញាបត្រ​ប្រវត្តិសាស្រ្ត​​នៅសកលវិទ្យាល័យឡាអេ និងបន្ទាប់មក បានទៅរៀននៅវិទ្យាស្ថានអន្តរជាតិ​សម្រាប់​អភិវឌ្ឍការគ្រប់គ្រងនៅទីក្រុងឡូសាន ប្រទេសស្វីស។    ក្រោយការសិក្សា លោក​ម៉ាក រូតតេ បានទៅធ្វើការនៅក្រុមហ៊ុនយក្ស យូនីលីវើ ជាអ្នកគ្រប់គ្រងធនធានមនុស្ស។

លោកម៉ាក រូតតេ មានការចាប់អារម្មណ៍នឹងនយោបាយ​នៅអំឡុងការសិក្សារបស់លោក​តាំង​ពី​នៅ​មធ្យមសិក្សា។ លោកក៏តាំង​ចិត្ត​​សម្រាប់សេរីភាពប្រជាធិបតេយ្យតាំងពីនៅយុវជន។ លោក​ម៉ាក រូតតេ បានចូលរួមជាមួយ​រដ្ឋាភិបាល​ហូឡង់​​នៅឆ្នាំ២០០២ ជារដ្ឋលេខាសម្រាប់​ការងារ និងសន្តិសុខ​សង្គម​ ចេញពី​សម្ព័ន្ធ​ភាព​គណបក្សស្តាំនិយាម ដែលដឹកនាំ​ដោយលោក​ចាន ភីតធើ បាល់ខេនេនដ៍។

លោកម៉ាក រូតតេ កាន់តំណែងនេះ រហូតដល់ឆ្នាំ២០០៣ បន្ទាប់ពីការបោះឆ្នោតមុនអណត្តិ ហើយ​លោកបានជាប់ជាតំណាងរាស្រ្ត។ លោកបានដូរមុខតំណែង​នៅឆ្នាំ២០០៤ ដោយក្លាយ​ជារដ្ឋលេខាធិការសម្រាប់​ការបណ្តុះ​បណ្តាលវិជ្ជាជីវៈ និងការសិក្សាជាន់ខ្ពស់។ ពីរឆ្នាំក្រោយ​មក លោកយកឈ្នះលោក រីតា វែដុង នៅអំឡុងការបោះឆ្នោតធ្វើជាប្រធានគណបក្ស​នយោបាយ VVD។ ក្រោយបន្តិចមក លោកម៉ាក រូតតេ បានចាកចេញពីរដ្ឋាភិបាល​ដើម្បី​កាន់​តំណែង​​ជាប្រធានក្រុមតំណាងរាស្រ្តនៃគណបក្ស VVD នៅសភាជាន់ទាប។ បន្ទាប់​ពី​ការ​បោះឆ្នោត​នីតិបញ្ញតិ​ដែលធ្វើឡើងនៅឆ្នាំតែមួយ លោកម៉ាក រូតតេ ស្ថិតនៅក្នុង​គណបក្ស​ប្រឆាំង​ដើម្បីបង្កើតបានសម្ព័ន្ធមិត្តដ៏ធំ​ ហើយនៅដឹកនាំដោយលោកបាល់ខេនេនដ៍។

នៅក្នុងការបោះ​ឆ្នោតនីតិបញ្ញតិឆ្នាំ២០១០ លោកម៉ាក រូតតេ ផ្តោតយុទ្ធាការរបស់លោកអំពីការ​សន្យា​​នូវការគ្រប់គ្រងថវិកាដ៏ម៉ឺនម៉ាត់ និងការពង្រឹងនយោបាយអន្តោប្រវេសន៍។ នេះអាច​ធ្វើ​ឲ្យ​​គណបក្ស VVD នាំមុខការបោះឆ្នោត ជាលើកទី១ ចាប់តាំងពីឆ្នាំ១៩៤៨។  

៤ខែ បន្ទាប់ពីការបោះឆ្នោត លោកម៉ាក រូតតេ បានដឹកនាំរដ្ឋាភិបាលចម្រុះ ដែលមាន​គណបក្ស VVD គណបក្សសេចក្តីអំពាវនាវគ្រីស្ទានប្រជាធិបតេយ្យ CDA និងគាំទ្រដោយ គណបក្សសម្រាប់សេរីភាព PVV។ ដោយការបាត់បង់ការគាំទ្រថ្នាក់ជាតិ លោកម៉ាក រូតតេ បានកោះហៅការបោះឆ្នោតមុនអណត្តិនៅឆ្នាំ២០១២ ដែលនៅពេលនោះ លោកទទួលបាន​សម្លេង​ភាគច្រើន​ជាមួយនឹងគណបក្សពលករ PvdA។

ប្រាំឆ្នាំក្រោយមក លោកម៉ាក រូតតេ ជោគជ័យលើការបោះឆ្នោតនីតិបញ្ញតិថ្មី។ នេះអាចធ្វើ ឲ្យ​លោក​បើកកិច្ចចរចាសម្រាប់អណត្តិទី៣ ជាមួយគណបក្ស CDA គណបក្សប្រជាធិបតេយ្យ ៦៦ D66 និងគណបក្សឆ្វេងបៃតង GL។ ដោយគណបក្សឆ្វេងបៃតង បដិសេធ​ចូលរួម ជាមួយ រដ្ឋាភិបាល រដ្ឋាភិបាលថ្មីត្រូវបានបង្កើតឡើងជាមួយគណបក្សសហភាពគ្រីស្ទាន CU។ លោក ម៉ាក រូតតេ បានដឹកនាំសម្ព័ន្ធភាពនេះ ចេញពីការបោះឆ្នោតឆ្នាំ២០២១។

នៅឆ្នាំ២០២៤ លោកម៉ាក រូតតេ ត្រូវបានជ្រើសរើសដោយកុងសង់ស៊ូស ជាអគ្គលេខាថ្មី នៃ អង្គការណាតូ។​