បញ្ហាប្រឈមរបស់យុវជនក្នុងការស្វែងរកការងារធ្វើ៖ ភាពមិនច្បាស់លាស់ពីគោលដៅ និងកង្វះការយល់ដឹងពីទីផ្សារ

ក្រោយពេលបញ្ចប់ការសិក្សាថ្នាក់ឧត្តមសិក្សា យុវជនកម្ពុជាជានិស្សិតមួយចំនួនធំកំពុងប្រឈមមុខនឹងបញ្ហាប្រឈមជាច្រើនក្នុងការស្វែងរកការងារធ្វើឱ្យចំជំនាញរបស់ខ្លួន ខណៈភាគច្រើននៅតែខ្វះខាតគោលដៅច្បាស់លាស់ ហើយខ្លះទៀតសុខចិត្តធ្វើការងារបញ្ច្រាស ឬខុសពីជំនាញដែលបានរៀនសូត្រ។

កញ្ញា រឿន ជាស្រីល័ក្ខ អនុប្រធានបណ្តាញធុរកិច្ចនៃមជ្ឈមណ្ឌលសហប្រតិបត្តិការជប៉ុន (CJCC) បានលើកឡើងក្នុងកម្មវិធីពិព័រណ៍ការងារនាពេលកន្លងទៅថា បញ្ហាខ្វះខាតចម្បងរបស់យុវជន គឺការមិនទាន់ស្គាល់ខ្លួនឯង និងមិនដឹងថាខ្លួនឯងចង់បានអ្វីច្បាស់លាស់។ កញ្ញាបានគូសបញ្ជាក់ថា យុវជនមិនត្រឹមតែត្រូវស្វែងយល់ពីទេពកោសល្យ និងចំណង់ចំណូលចិត្តរបស់ខ្លួនប៉ុណ្ណោះទេ ប៉ុន្តែថែមទាំងត្រូវស្រាវជ្រាវអំពីតម្រូវការទីផ្សារការងារនាពេលបច្ចុប្បន្ន និងអនាគតផងដែរ ដើម្បីជៀសវាងការរៀនជំនាញដែលមិនត្រូវនឹងទេពកោសល្យ ឬគ្មានទីផ្សារ។

ស្របពេលជាមួយគ្នានេះ តំណាងក្រុមហ៊ុនឯកជនដែលជាអ្នកជ្រើសរើសបុគ្គលិកបានបង្ហាញការយល់ឃើញស្រដៀងគ្នាថា យុវជនជាច្រើនហាក់មិនទាន់មានគោលជំហរ ឬការតាំងចិត្តច្បាស់លាស់លើផ្នែកដែលខ្លួនចង់ធ្វើនោះទេ។ លោក ប៊ុន លី ប្រធានផ្នែកធនធានមនុស្សនៃក្រុមហ៊ុន Cambodia Sing Meng បានកត់សម្គាល់ថា ពេលមកដាក់ពាក្យធ្វើការ និស្សិតមួយចំនួនតែងតែសួរនាំ និងដាក់ពាក្យតាមមិត្តភក្តិ ដោយមិនបានផ្អែកលើចំណង់ចំណូលចិត្ត ឬក្តីស្រឡាញ់ពិតប្រាកដរបស់ខ្លួនឡើយ ដែលកត្តានេះជាឧបសគ្គរារាំងមិនឱ្យពួកគេជោគជ័យក្នុងអាជីពបាន។

បន្ថែមពីលើនេះ លោក សុក សុភា បុគ្គលិកក្រុមហ៊ុនឯកជនម្នាក់ បានចែករំលែកបទពិសោធផ្ទាល់ខ្លួនថា លោកត្រូវបង្ខំចិត្តធ្វើការខុសជំនាញ (ផ្នែកទីផ្សារក្នុងធនាគារ) ដោយសារកាលរៀនមហាវិទ្យាល័យ លោកបានជ្រើសរើសជំនាញទេសចរណ៍តាមការរុញច្រានពីអាណាព្យាបាល ដែលជាជំនាញមានទីផ្សារតូចចង្អៀត។ ដោយឡែក កញ្ញា គន សុធីតា ក៏កំពុងជួបប្រទះបញ្ហាប្រឈមក្នុងការស្វែងរកការងារត្រូវជំនាញផងដែរ ដោយសារជំនាញ «ឆ្មបមធ្យម» ដែលកញ្ញាបានរៀន មានឱកាសការងារតិចតួចនៅក្នុងសង្គមបច្ចុប្បន្ន។

ដើម្បីដោះស្រាយបញ្ហាទាំងនេះ លោក ង៉ូវ ឡេង ប្រធានផ្នែកដោះស្រាយសំណងនៃក្រុមហ៊ុនធានារ៉ាប់រង ហ្វីលីព បានផ្តល់អនុសាសន៍ថា យុវជនត្រូវតែចំណាយពេលស្រាវជ្រាវឱ្យបានស៊ីជម្រៅលើស្ថាប័ន ឬវិស័យដែលខ្លួនចាប់អារម្មណ៍តាមរយៈប្រព័ន្ធអ៊ីនធឺណិត មុននឹងសម្រេចចិត្តដាក់ពាក្យធ្វើការ ព្រមទាំងត្រូវពង្រឹងសមត្ថភាពភាសាបរទេស ជាពិសេសភាសាអង់គ្លេស ដែលជាជំនាញមិនអាចខ្វះបានក្នុងទីផ្សារការងារបច្ចុប្បន្ន។

សូមបញ្ជាក់ថា នៅក្នុងកម្មវិធីពិព័រណ៍ការងារនោះ មានក្រុមហ៊ុនចូលរួមចំនួន ៦៤ (ក្នុងនោះមានក្រុមហ៊ុនជប៉ុន ១៣) ដោយបានផ្តល់ឱកាសការងារដល់សិស្ស និស្សិត និងអ្នកស្វែងរកការងារធ្វើសរុបប្រមាណ ៤០០ កន្លែង៕