ហូបចុកឱ្យប្រមាណខ្លួន! កុំហូបតាមឃ្លាន កុំទទួលទានតាមចង់

បងប្អូនដែលហូបចុក និងផឹកស៊ី ប្រសិនបើមានហូបមានទទួលទាន គឺសូមហូប ឬទទួលទានឱ្យប្រមាណខ្លួន កុំចេញតែហូប ឬទទួលទានតាមឃ្លាន ហើយទទួលទាន ឬហូបតាមចង់។ ប្រសិនបើហូបចុក និងទទួលទានមិនត្រឹមត្រូវទេ គឺវានឹងប៉ះពាល់ដល់សុខភាព។ សូមប្រុងប្រយ័ត្ន!

ការហូបចុកគឺគួរគិតអំពីគុណភាព គិតអំពីសុខភាព គិតអំពីតម្រូវការរាងកាយ។ ប្រសិនបើយើងចេះតែហូបចុកផ្ដេសផ្ដាស ឃ្លានអីហូបហ្នឹង ហូបតាមឆ្ងាញ់ តែមានគ្រោះថ្នាក់ដល់សុខភាព អ្វីៗក៏ចប់ដែរ។ សុខភាពគឺជាកត្តាសំខាន់ណាស់របស់មនុស្សម្នាក់ៗ ដូច្នេះសូមប្រុងប្រយ័ត្នបន្តិចរឿងការហូបចុក និងការទទួលទានផ្សេងៗ។

រាងកាយយើងគ្រប់គ្នាត្រូវការនូវតុល្យភាពនៃអាហារូបត្ថម្ភនានា តាំងពីស្ករ អំបិល ខ្លាញ់ សារធាតុសរសៃ សារធាតុនេះសារធាតុនោះ ប៉ុន្តែកុំឱ្យលើស ព្រោះបើលើស វានឹងឱ្យទុក្ខឱ្យទោសមកលើយើង។ នៅពេលនេះ ឃើញទេ? អ្នកខ្លះចូលចិត្តហូបប្រៃ ខ្លះចូលចិត្តហូបផ្អែមពេក និងខ្លះទាំងប្រៃទាំងផ្អែមគឺទាំងពីរ។ ហេតុផលចុងក្រោយគឺខូចតម្រងនោម កើតជំងឺទឹកនោមផ្អែម ត្រូវលាងឈាម ឬត្រូវវះកាត់ប្តូរតម្រងនោម។

ដោយឡែក អ្នកចូលចិត្តហូបរបស់ខ្លាញ់ សាច់ច្រើន ឡើងកូឡេស្តេរ៉ុលអាក្រក់នៅក្នុងឈាម បណ្ដាលឱ្យកើតជាជំងឺស្ទះសរសៃឈាម រហូតត្រូវបំពាក់កង (រ៉ឺស័រ) នៅក្នុងសរសៃឈាម។ ខ្លះទៀតចូលចិត្តនេះចូលចិត្តនោះ ក៏បង្កជាបញ្ហាគ្រោះថ្នាក់ជាច្រើន។ សព្វថ្ងៃនេះ អ្នកកើតជំងឺមិនឆ្លងជាច្រើន គឺកើតឡើងដោយសារតែកត្តាហូបចុកមិនប្រមាណខ្លួននេះឯង។

ខ្លះទៀតការស៊ីផឹកក៏សុទ្ធតែជាហានិភ័យ ដោយមានទាំងហានិភ័យសុខភាព និងហានិភ័យខាងសង្គម ដូចជាស្រវឹងបើកបរទៅបង្កគ្រោះថ្នាក់ចរាចរណ៍ និងបង្កអំពើហិង្សា ដែលសុទ្ធសឹងតែជាទោសទណ្ឌត្រូវជាប់ពន្ធនាគារ ដូច្នេះសូមមានការប្រុងប្រយ័ត្នលើបញ្ហាទាំងនេះ។

ការហូបចុក និងការទទួលទាន គឺជារឿងដែលមនុស្សគ្រប់រូបមិនអាចជៀសវាងបាន ប៉ុន្តែអ្វីដែលសំខាន់ គឺយើងត្រូវចេះហូប ចេះផឹក និងចេះប្រមាណខ្លួន។ អាហារឆ្ងាញ់មិនប្រាកដថាជាអាហារដែលល្អសម្រាប់សុខភាពនោះទេ ហើយអ្វីដែលយើងចូលចិត្តក៏មិនមានន័យថារាងកាយរបស់យើងត្រូវការវាក្នុងបរិមាណច្រើននោះដែរ។ ការហូបប្រៃពេក ផ្អែមពេក ខ្លាញ់ពេក ឬទទួលទានគ្រឿងស្រវឹងដោយខ្វះការគ្រប់គ្រង អាចក្លាយជាហានិភ័យចំពោះសុខភាព និងជីវិតរបស់យើងបាន។

ដូច្នេះ មុននឹងហូបអ្វី ឬផឹកអ្វី គួរគិតបន្តិចថា តើវាល្អសម្រាប់រាងកាយយើងឬទេ? បរិមាណប៉ុណ្ណា? និងតើវាអាចប៉ះពាល់ដល់សុខភាពយើងនៅថ្ងៃអនាគតដែរឬទេ? ព្រោះសុខភាពមិនមែនជារបស់ដែលខូចហើយអាចទិញមកវិញបានដោយងាយនោះឡើយ។

ទ្រព្យសម្បត្តិអាចរកឡើងវិញបាន ការងារអាចចាប់ផ្ដើមសារជាថ្មីបាន ប៉ុន្តែពេលសុខភាពធ្លាក់ចុះ ឬជួបជំងឺធ្ងន់ធ្ងរ វាអាចនាំមកនូវការឈឺចាប់ ការចំណាយ និងផលប៉ះពាល់ដល់ជីវិតគ្រួសារយ៉ាងធ្ងន់ធ្ងរ។ ជាពិសេស ការផឹកស្រា ឬគ្រឿងស្រវឹង គួរតែមានការប្រុងប្រយ័ត្នខ្ពស់ ព្រោះវាមិនត្រឹមតែប៉ះពាល់ដល់សុខភាពប៉ុណ្ណោះទេ ប៉ុន្តែអាចបង្កឱ្យមានគ្រោះថ្នាក់ចរាចរណ៍ អំពើហិង្សា បញ្ហាគ្រួសារ និងបញ្ហាផ្លូវច្បាប់ផងដែរ។ ដូច្នេះ ការរស់នៅដោយមានស្មារតីទទួលខុសត្រូវ គឺចាប់ផ្ដើមពីរឿងតូចៗប្រចាំថ្ងៃ ដូចជាការជ្រើសរើសអាហារ ការគ្រប់គ្រងបរិមាណ និងការដឹងថាពេលណាគួរឈប់។

សរុបទៅ សូមកុំរង់ចាំដល់ថ្ងៃមានជំងឺ ទើបនឹកឃើញថាសុខភាពមានតម្លៃ។ ចូរថែរក្សាសុខភាពតាំងពីថ្ងៃនេះ ព្រោះការហូបចុកដោយប្រមាណខ្លួន គឺជាការស្រឡាញ់ខ្លួនឯង និងជាការរក្សាទុកឱកាសឱ្យខ្លួនឯងបានរស់នៅយូរ មានសុខភាពល្អ និងមានសុភមង្គលជាមួយគ្រួសារ។