បើមានយកកូនច្រើនល្អ ប៉ុន្តែប្រសិនបើក្រ ឬមធ្យមគួររិះគិតត្រឹមកូនតែ២នាក់អីបានហើយ!

ការចាប់ដៃគ្នាបង្កើតចំណងគ្រួសារ គឺជាអំណរសប្បាយមួយរវាងបុគ្គល និងបុគ្គល ហើយក៏អាចថា​​រវាងគ្រួសារមួយនឹងគ្រួសារមួយ ហើយគ្រប់គ្នាតែងតែរិះគិតដល់ការចង់បានបុត្រធីតាដែលភាសា របស់សាមញ្ញជនហៅថាកូន។ ​

កូន គឺជាចំណងដៃហើយក៏ជាសក្ខីភាពនៃការសម្រេចចិត្តនៅក្នុងការចាប់ដៃគ្នាបង្កើតគ្រួសារ ដូ​ច្នេះពួកគេគួរតែទទួលបាននូវការអាណិតស្រលាញ់ និងទំនុកបម្រុងយ៉ាងសមរម្យប្រកបដោយ ភា​ពថ្លៃថ្នូរនៅក្នុងនាមជាមនុស្សជាតិ។ ​

មកដល់ពេលនេះប្រទេសកម្ពុជាដែលមានផ្ទៃដីសរុប ១៨១.០៣៥គីឡូម៉ែត្រការ៉េគឺនៅមានដង់ស៊ីតេប្រជាជនទាបនៅឡើយហើយនៅតែមានធនធាន ដើម្បីគាំទ្រនិងជំរុញឲ្យពលរដ្ឋមានកូនច្រើ​នកាន់តែប្រសើរ ប៉ុន្តែទោះបីជាយ៉ាងណាក៏ដោយសូម​រិះគិតអំពីធនធាន និងលក្ខខណ្ឌផ្សេង​ៗនៅក្នុងការសម្រេចចិត្តលើការកំណត់ចំនួនកូន។ ​

សម្រាប់អ្នកដែលមានធនធាន និងសក្តានុពល ប្រសិនបើមានកូនច្រើនគឺជារឿងប្រសើរ។ ទោះ​បីជាវាលំបាកចិញ្ចឹមបន្តិច ហើយចំណាយច្រើនទាំងការហូបចុក ការអប់រំ ការកំសាន្ត និងសក​ម្មភា​ពផ្សេងៗទៀត ប៉ុន្តែប្រសិនបើយើងចិញ្ចឹមពួកគេប្រកបដោយគន្លងធម៌ មានការអប់រំ ត្រឹមត្រូវតា​មគន្លងនៃប្រពៃណី វប្បធម៌ និងកេរ្តិ៍ដំណែលសង្គមដែលបន្សល់ទុកកន្លងយកកាន់តែ ច្រើនគឺ​វាជាការល្អបំផុត។ ​

ជាការពិត នៅពេលពួកគេស្ថិតក្នុងវ័យក្មេង យើងអាចហត់នឿយលើការចិញ្ចឹម អប់រំ តាមដាន ប្រៀនប្រដៅ និងទំនុកបម្រុងផ្សេងៗទៀត ប៉ុន្តែនៅពេលដែលពួកគេធំ និងពេញវ័យ នោះយើងនឹងទទួលបានផល និងភាពកក់ក្តៅនៅក្នុងគ្រួសារ ប្រសិនបើពួកគេធំធាត់ដោយគន្លងធម៌និងមានការអប់រំត្រឹមត្រូវ ប៉ុន្តែផ្ទុយទៅវិញនៅក្នុងករណីយើងក្រ ខ្វះខាតធនធាន យកកូនច្រើនគឺពិតជាលំបាកណាស់ នៅក្នុងពេលនេះ។​

នៅសម័យនេះមិនអាចចេះតែយកកូនដោយគ្មានផែនការគ្រួសារច្បាស់លាស់បានឡើយ។ នៅសម័យមុនយើងអាចយកកូនតាមច្បាប់ធម្មជាតិបាន ប៉ុន្តែសម័យនេះ គឺការចំណាយខ្ពស់បំផុត ជីវភាពក៏មានការប្រឈមមុខខ្លាំង ខណៈដែលធនធានដីធ្លីក៏កាន់តែខើច។ ដីធ្លីមិនចេះតែអាចរុ​ករានពង្រីកបានតាមចិត្តឡើយ គឺសង្គមមានច្បាប់មានវិន័យ ច្បាស់លាស់។ ​

សម័យនេះទោះបីជាការចំណាយលើការអប់រំនៅសាលារដ្ឋ​មិនអស់ថ្លៃចំណាយក៏ពិតមែន ប៉ុន្តែថ្លៃម្ហូបអាហារ ការកំសាន្ត សម្លៀកបំពាក់ គឺនៅតែជាបន្ទុកដ៏ធ្ងន់ធ្ងរសម្រាប់គ្រួសារដែលក្រីក្រនិ​ងមធ្យម។

ដូច្នេះនៅក្នុងមួយគ្រួសារអាចមានកូនច្រើនត្រឹម២ ខណៈកូនតែ​មួយគឺតិចពេក និងអាចមានហា​និភ័យខ្ពស់គួរសមដែរ ​ព្រោះអត្រារស់របស់ទារកនិងកុមារថ្វីត្បិតតែអាចរស់ខ្ពស់ និ​ងមានអត្រាមរណភាពទាប ប៉ុន្តែនៅពេលពេញវ័យអត្រាគ្រោះថ្នាក់គឺខ្ពស់​ ហើយសំភារៈបំពុលក៏ច្រើនដែររាប់ចាប់តាំងពីគ្រោះថ្នាក់ចរាចរណ៍ ការប្រើប្រាស់គ្រឿងស្រវឹង បញ្ហាគ្រឿងញៀន ជាដើម៕