ជំងឺមិនឆ្លងឥឡូវមានសេវាទូលំទូលាយ ដូច្នេះយើងកុំប្រហែស !

ជំងឺនានា ដូចជាជំងឺទឹកនោមផ្អែម ជំងឺមហារីក ជំងឺលើសឈាម ជំងឺសរសៃឈាមបេះដូង មិនមែនជាជំងឺឆ្លងទេ ប៉ុន្តែកុំប្រហែសវាអាចសម្លាប់ជីវិតយើងទាំងអស់គ្នាយ៉ាងត្រជាក់ ហើយនៅមុនពេលយើងដឹងខ្លួន វាគ្រោះថ្នាក់បាត់ ។

ដើម្បីកុំអោយជំងឺទាំងនេះវាបង្កគ្រោះថ្នាក់ដល់សុខភាពរបស់យើងទាំងអស់គ្នា ហើយជាពិសេសកុំអោយយើងបាត់បង់ជីវិត ពិការនិងបាត់បង់សមត្ថភាពពលកម្ម គឺមានតែយើងទាំងអស់គ្នាឆាប់ទៅស្វែងរកសេវាសុខាភិបាល ។

ការស្វែងរកសេវាពិនិត្យនិងពិគ្រោះទាន់ពេលវេលាគឺជាវិធីសាស្រ្តបង្ការនិងការពារគ្រោះមហន្តរាយសុខភាពរបស់យើងដ៏មានប្រសិទ្ធភាព ហើយនៅពេលនេះនៅតាមមណ្ឌលសុខភាព និង មន្ទីពេទ្យនានា គឺមានសេវានេះអស់ហើយ ដូច្នេះកុំប្រហែស ។

ជំងឺនេះមិនឆ្លងពីមនុស្សម្នាក់ទៅមនុស្សម្នាក់ដូចជាជំងឺឆ្លងផ្សេងៗ ជំងឺអេសដ៏ ជំងឺរបេង ជំងឺអាសន្តរោគអ្វីនោះទេ វាគឺជាពពួកជំងឺដែលកើតឡើងដោយទម្លាប់នៃការហូបចុក និង ឥរិយាបទរស់នៅនៅក្នុងលក្ខខណ្ឌមួយដែលអាចឲ្យជំងឺនេះយាយីដល់យើងបាន ។​

យោងទៅតាមរបាយការណ៍ប្រចាំឆ្នាំរបស់ក្រសួងសុខាភិបាលដែលទទួលបានកាលពីថ្ងៃទី៣១ ខែមករា ឆ្នាំ០២៦ បានឲ្យដឹងថា កម្ពុជាបានកត់ត្រានូវការកើនឡើងគួរឱ្យកត់សម្គាល់នៃករណីជំងឺមិនឆ្លងកាលពីឆ្នាំ ២០២៥កន្លងទៅ។

របាយការណ៍នេះបានអះអាងថា នៅទូទាំងប្រទេសកម្ពុជារកឃើញករណីថ្មីនៃជំងឺទឹកនោមផ្អែមសរុបមានចំនួន ២៩២.១៩៧ ករណី កើនឡើង ២៦.៨ ភាគរយ។ សម្រាប់ជំងឺមហារីក កម្ពុជារកឃើញអ្នកជំងឺចំនួន ៣៥.៩២១ នាក់ កើនឡើង ១៣.៩ ភាគរយ ហើយមានអ្នកស្លាប់ចំនួន ១៥៥ នាក់។

របាយការណ៍​ដដែល​បាន​ឲ្យ​ដឹង​ថា ជំងឺលើសឈាម​ក៏​កំពុង​កើនឡើង​ផងដែរ ដោយ​មាន​​ចំនួន ៤៥១.០០៩ ករណី​ ​កើនឡើង ១២,២ ភាគរយ​ នៅក្នុងនោះអ្នកជំងឺ​ជំងឺ​សរសៃឈាម​បេះដូង​ចំនួន ២៥.៤៨១ នាក់​បាន​ទទួល​ការ​ព្យាបាល​នៅ​មន្ទីរពេទ្យ និង​ក្នុង​ចំណោម​ពួកគេ​ចំនួន ១.០៩១ នាក់​បាន​ស្លាប់​។

សូមកុំប្រហែស តែប្រហែសគ្រោះមហន្តរាយសុខភាពរបស់យើងនឹងកើតមាន ដូច្នេះដើម្បីកុំអោយយឺតពេល គួរតែចាំបាច់រូតរះទៅស្វែងរកសេវាពិនិត្យនិងពិគ្រោះនៅតាមមណ្ឌលសុខភាព និង​មន្ទីរពេទ្យនានា ឲ្យបានទាន់ពេលវេលា ។​