ហាម៉ាស់ថា អ៊ីស្រាអែលសម្លាប់​មនុស្ស ១៤១ នាក់

ក្រុមហាម៉ាស់ដែលគ្រប់គ្រងក្រសួងសុខាភិបាលនៅហ្គាហ្សាបាននិយាយថាយ៉ាងហោចណាស់ មនុស្ស​១៤១ នាក់ត្រូវបានសម្លាប់ក្នុងការវាយប្រហារតាមអាកាសក្នុងរយៈពេលប៉ុន្មានថ្ងៃចុងក្រោយ។ នេះបើតាមសេចក្តីរាយការណ៍របស់វ៉ាទីកង់ញូវ ។​

កាលពីថ្ងៃសៅរ៍ ការវាយប្រហារតាមអាកាសរបស់អ៊ីស្រាអែលនៅជិត ទីប្រជុំជន ខាន យូនីស (Khan Younis) បានសម្លាប់មនុស្ស ៩០ នាក់ និង ៣00 នាក់ផ្សេងទៀតរងរបួស។

ដោយឡែកនៅតំបន់ ម៉ាវ៉ាស៊ី ( Mawasi ) ដែលមានប្រជាជនច្រើនកុះករ ជាកន្លែងរងការវាយប្រហារ ត្រូវបានយោធាអ៊ីស្រាអែលកំណត់ថាជាតំបន់សុវត្ថិភាពសម្រាប់ជនស៊ីវិលដែលផ្លាស់ទីលំនៅ។

ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន បានប៉ាន់ប្រមាណថា មនុស្សប្រហែល ១,៥ លាននាក់បច្ចុប្បន្នកំពុងជ្រកកោននៅទីនោះ។ ប្រជាជនប៉ាឡេស្ទីនជាច្រើននាក់បានភៀសខ្លួននៅក្នុងតំបន់នេះ បន្ទាប់ពីការចាប់ផ្តើមនៃការវាយលុករបស់អ៊ីស្រាអែលលើ រ៉ាហ្វាស កាលពីខែឧសភា។

កាលពីថ្ងៃអាទិត្យ ក្រុមហាម៉ាស់បានបដិសេធរបាយការណ៍ដែលអះអាងថាខ្លួនបានលុបចោលការចរចាបទឈប់បាញ់ដោយប្រយោលជាមួយអ៊ីស្រាអែល បន្ទាប់ពីការវាយប្រហារនៅខាន់ យូនីស ( Khan Younis) ។

របាយការណ៍​បាន​បង្ហាញ​ថា អ៊ីស្រាអែល​កំពុង​កំណត់​គោលដៅ​លើមេបញ្ជាការ​យោធា​របស់​ក្រុម ហាម៉ាស់ គឺលោក មូហាមេត ដេហ្វ (Mohammed Deif)  ដោយសារគេ​គិត​ថា លោក​ជាមនុស្ស​ម្នាក់​បញ្ជា​ពី​ក្រោយ​ការ​វាយ​ប្រហារ​ថ្ងៃ ៧ តុលា របស់​ក្រុម​ហាម៉ាស​លើ​អ៊ីស្រាអែល៕