ព្រឹទ្ធាចារ្យកោសល្យវោហារ គង់ ណៃ គឺជាសិល្បករចាប៉ីដងវែងដ៏ល្បីល្បាញមួយរូបរបស់កម្ពុជា បានទទួលមរណភាពនាថ្ងៃទី២៨ ខែមិថុនា ឆ្នាំ២០២៤នេះ ក្នុងជន្មាយុ ៨០ឆ្នាំ (១៩៤៤-២០២៤) នៅគេហដ្ឋាននាស្រុកកំណើត ក្នុងខេត្តកំពត។
លោក គង់ សម័យ ដែលជាកូនប្រុសបង្កើតរបស់លោកតា គង់ ណៃ បានបង្ហោះឃ្លា ភ្ជាប់ជាមួយនឹងរូបថតលោកឪពុករបស់លោថា ៖ «សូមពុកទៅអោយបានសុខ កូនសូមជួបពុកគ្រប់ៗជាតិ លោកពុក គង់ ណៃ»។
ចំណែក គេហទំព័រក្រុមដំណើរខ្មែរ និងក្រុមអ្នកសិល្បករជាច្រើនរូប បានបង្ហាញនូវមរណីទុក្ខ ចូលរួមរំលែកទុក្ខដ៏ក្រៀមក្រំនៃការបាត់បង់ធនធានសិល្បៈដ៏ឆ្នើមមួយរូបរបស់កម្ពុជា។
អ្នកផលិតមាតិកាលើបណ្តាញសង្គមដ៏ល្បីមួយរូប ឈ្មោះ Rick Kh គោប្រាក់ បានសរសេរលើហ្វេសប៊ុករបស់លោកនៅវេលាម៉ោងប្រមាណជា១ កន្លះថ្ងៃនេះថា ៖ «សូមចូលរួមរំលែកទុក្ខ ព្រឹទ្ធាចារ្យកោសល្យវោហារ គង់ ណៃ បានទទួលមរណភាពហើយថ្ងៃនេះ អរគុណសម្រាប់គ្រប់យ៉ាង»។
លោកបានបន្តថា ៖ «ខ្ញុំស្រលាញ់អ្វីដែលលោកតាបានបង្កើតកន្លងមក ពួកខ្ញុំនឹងខំរៀនសូត្រតាមគន្លងល្អៗរបស់តា សូមលោកតាទៅកាន់សុខគតិភព ឋានសួគ៌»។
ជាមួយគ្នានេះដែរ លោកស្រី ឈីវ ភារម្យ មេធាវីស្ត្រីនៃគណៈមេធាវីនៃព្រះរាជាណាចក្រកម្ពុជា និងជាភរិយារបស់លោក លី ច័ន្ទតុលា ប្រធានគណៈមេធាវីនៃព្រះរាជាចក្រកម្ពុជា បានលើកឡើងដែរថា កើត ចាស់ ឈឺ ស្លាប់ ជារឿងធម្មតារបស់សត្វលោក តែនៅតែសោកសៅ នៅពេលលឺដំណឹងនេះ បើទោះមិនដែលបានស្គាល់គាត់ផ្ទាល់ខ្លួនក្តី តែហាក់បីដូចស្រណោះស្រណោក…។
លោកស្រីបន្តថា ៖ «យើងខ្ញុំទាំងពីរនាក់រួមទាំងក្រុមការងារទាំងអស់ សូមចូលរួមរំលែកមរណៈទុក្ខដ៏ក្រៀមក្រំជាមួយក្រុមគ្រួសារនៃសព។ សូមវិញ្ញាណក្ខ័ន្ធលោកតាព្រឹទ្ធាចារ្យ គង់ណៃ បានទៅកាន់សុគតិភព»។
ព្រឹទ្ធាចារ្យ គង់ ណៃ មានគោរមងារជាកោសល្យវោហារ ជាសិល្បករចាប៉ីដងវែង មកពីខេត្តកំពត ជាមរតកមនុស្សរស់នៃប្រទេសកម្ពុជាផ្នែកវប្បធម៌ ដែលលោកមានស្នាដៃយ៉ាងធំធេងរក្សាកេរដំណែលដូនតាខ្មែរ គឺចាប៉ីដងវែង។
ព្រឹទ្ធាចារ្យគឺជាបុគ្គលទី៣នៃកម្ពុជា ដែលទទួលបានពានហ្វ៊ុកុអូកាលើកទី២៨ ពីប្រទេសជប៉ុន។ លោកតា គង់ ណៃ បានធ្លាក់ខ្លួនឈឺ និងមិនអាចចូលរួមកម្មវិធីផ្សេងទៀតបាន ក្នុងអំឡុងឆ្នាំ២០២៣ ដោយលោកមានជំងឺជាច្រើនមុខដូចជា ទឹកនោមផ្អែម សួត វង្វេង និងដើរមិនរួច៕
Daily Program
