បន្ទាប់ពីថ្វាយអភិបូជានៅទីលានសន្តសិលាកាលពីថ្ងៃអាទិត្យកន្លងទៅ សម្តេចប៉ាប ឡេអូទី១៤ បានអំពាវនាវ ឱ្យដោះលែងនិស្សិត និងបូជាចារ្យដែលត្រូវបានចាប់ពង្រត់ក្នុងរយៈពេលប៉ុន្មានថ្ងៃថ្មីៗនេះនៅក្នុងប្រទេសនីហ្សេរីយ៉ា និងកាមេរូន។
តាមសេចក្តីរាយការណ៍របស់វ៉ាទីកង់ញូវ សម្តេចប៉ាបឡេអូ ព្រួយបារម្ភជាខ្លាំងចំពោះការចាប់ពង្រត់លោកបូជាចារ្យ និស្សិត និងសមាជិកព្រះសហគមន៍កាតូលិក នៅក្នុងប្រទេសនីហ្សេរីយ៉ា និងកាមេរូននាពេលថ្មីៗនេះ ហើយបានជំរុញឱ្យអាជ្ញាធរធានាពីការរំដោះពួកគេ។
ការអំពាវនាវនេះបានធ្វើឡើងក្រោយពេលដែលនិស្សិតនិងគ្រូបង្រៀនប្រហែលជាជាង៣០០ នាក់ ត្រូវបានចាប់ពង្រត់កាលពីថ្ងៃសុក្រសប្តាហ៍មុននៅទេវវិទ្យាល័យសន្តី ម៉ារី ក្នុងរដ្ឋនីហ្សេ ប្រទេសនីហ្សេរីយ៉ា។
នៅសប្តាហ៍ដដែលនោះ នៅទីក្រុង ឌូប (Ndop) ប្រទេសកាមេរូន មានលោកបូជាចារ្យកាតូលិកចំនួន៦ នាក់ ហើយនៅទីក្រុង ចាគីរី (Jakiri) ឯណោះ មានគ្រីស្តបរិស័ទម្នាក់ក៏ត្រូវបានចាប់ពង្រត់ផងដែរ។
សម្តេចប៉ាបឡេអូក៏បាន អញ្ជើញឲ្យគ្រីស្តបរិស័ទទាំងអស់ អធិស្ឋានក្រោយពេលដែលសកម្មភាពនេះបានកើតមានឡើង ហើយមានបន្ទូលថា ព្រះវិហារ សាលារៀន មិនគួរក្លាយជាគោលដៅនៃអំពើហិង្សាឡើយ ផ្ទុយទៅវិញ ទីនោះគួរតែជា កន្លែងសុវត្ថិភាព និងបណ្តុះសេចក្តីសង្ឃឹម៕
Daily Program
