សម្តេចប៉ាបហ្រ្វង់ស៊ីស្កូ មានបំណងចង់យាងទៅបំពេញទស្សនកិច្ចនៅប្រទេសតួកគីនាឆ្នាំ២០២៥ខាងមុខ ។ នេះបើតាមសេចក្តីរាយការណ៍របស់វ៉ាទីកង់ញូវ ។
ប្រភពដដែលបានបន្តថា គោលបំណងសំខាន់ ទ្រង់ចង់យាងទៅតំបន់ នីសេ (Nicea) ដើម្បីចូលរួមប្រារព្ធខួបលើកទី ១៧០០ឆ្នាំ នៃការចាប់ផ្ដើមមហាសន្និបាតព្រះសហគមន៍ដំបូងគេ។
ព្រះសហគមន៍បានចាប់ផ្ដើមមហាសន្និបាតដំបូងគេមួយ នៅទីក្រុងនីសេនៃប្រទេសតួកគី ដែលបានប្រារព្ធធ្វើកាលពីខែឧសភា ដល់ខែកក្កដា ក្នុងឆ្នាំ៣២៥ ហើយសម្រេចជារួមអំពីធម៌ប្រកាសជំនឿរបស់ព្រះសហគមន៍។
សម្តេចប៉ាបបានមានបន្ទូលបង្ហើបអំពីបំណងប្រាថ្នាបែបនេះកាលពីព្រឹកថ្ងៃសុក្រសប្តាហ៍មុន នៅពេលដែលទ្រង់បានយាងទទួលនិងស្វាគមន៍គណៈប្រតិភូនៃប្រទេសនេះ ដែលបានមកទស្សនកិច្ចនៅទីក្រុងរ៉ូម ក្នុងពិធីបុណ្យគោរពសន្តសិលា និងសន្តប៉ូល ដែលជាសសរគ្រឹះនៃព្រះសហគមន៍។
នៅក្នុងជំនួបនោះសម្តេចប៉ាបបានរំលេចនូវភាពជាបងប្អូនរវាងគ្រីស្តសាសនានិងសាសនានានានៅលើពិភពលោក ដោយមានចិត្តអំណរក្នុងភាតរភាព» និងដើម្បីថ្លែងជាសាក្សីចំពោះ « ចំណងដ៏ជ្រាលជ្រៅ » ដែលបង្រួបបង្រួមព្រះសហគមន៍ឆ្ពោះទៅរក ការស្ដារឡើងវិញនូវសាមគ្គីភាព។
សម្តេចប៉ាប បានគូសបញ្ជាក់ជាពិសេសក្នុងកិច្ចប្រជុំដ៏ច្រើនរបស់ទ្រង់ជាមួយមេដឹកនំាសាសនានៅតួកគី ជាពិសេសជំនួបនៅក្រុងយេរូសាឡឹមកាលពីឆ្នាំ ២០១៤ ដើម្បីប្រារព្ធខួបលើកទី ៥០ នៃកិច្ចប្រជុំជាប្រវត្តិសាស្ត្ររវាង សន្ត សម្តេចប៉ាប ប៉ូលទី៦ និង សម្តេចអាស៊ិណាហ្គូរ៉ាសទី១ (Athenagoras I) ដែលជាសម្តេចសង្ឃរបស់គ្រីស្តសាសនានិកាយអូតូដុក។
សម្តេចប៉ាបបានបញ្ជាក់ជាថ្មីថា ការសន្ទនាជា ការកសាងសុចរិតភាពនៃជំនឿ គឺចាំបាច់ត្រូវកើតចេញពីភាពស្មោះត្រង់ចំពោះព្រះជាម្ចាស់ ហើយវាអាចដឹកនាំយើងទៅកាន់សេចក្តីពិត តាមរយៈការផ្លាស់ប្តូរអំណោយទានឲ្យគ្នាទៅវិញទៅមក និងក្រោមការដឹកនាំរបស់ព្រះវិញ្ញាណដ៏រិសុទ្ធ៕
Daily Program
