សង្រ្គាមនៅអ៊ុយក្រែន ៖ ទីក្រុងវ៉ាស៊ីនតុនធ្វើការបន្ទាន់នៅលើការស្នើសុំខាងយោធា​របស់អ៊ុយក្រែន

នៅក្នុងសំបុត្ររួមគ្នាផ្ញើទៅកាន់លោកចូ បាយឌិន សមាជិកសំខាន់ៗនៃសភារបស់គណបក្ស​សាធារណរដ្ឋ បានសុំឲ្យប្រធានាធិបតីប្រតិកម្មឲ្យបានភ្លាមៗ។ នៅក្នុងសំបុត្រមួយដែល​ចុះ​ហត្ថ​លេខា​ដោយលោកម៉ៃ ម៉ាកខូល ប្រធានគណកម្មការកិច្ចការបរទេសនៃសភាតំណាង​រាស្រ្ត​អាម៉េរិក បានសរសេរថា នៅខណៈដែលរុស្ស៊ីដឹកនាំសង្រ្គាមឈ្លានពានដ៏ឃោរឃៅ និង​ទ្រង់ទ្រាយធំ ប្រទេសនេះមិនត្រូវរួចខ្លួនដោយគ្មានការជាប់ទោសនោះឡើយ ដែលខ្លួនបានធ្វើ​ឧក្រិដ្ឋកម្ម​សង្រ្គាមប្រឆាំងនឹង​អ៊ុយក្រែន​។

ចំណែកប្រមុខការទូតអង់គ្លេស លោកដាវីឌ ឡាមមី បានថ្លែងកាលពីថ្ងៃពុធថា នៅឆ្នាំ២០២៤ ចក្រភពអង់គ្លេសនឹងផ្គត់ផ្គង់មីស៊ីលការពារអាកាសរាប់រយគ្រឿងបន្ថែមសម្រាប់អ៊ុយក្រែន ដើម្បីឲ្យប្រទេសនេះអាចរុញច្រានទាហានរុស្ស៊ី។

នៅអំឡុងសន្និសីទកាសែត នៅទីក្រុងគៀវ ជាមួយសមភាគីអាម៉េរិក និងអ៊ុយក្រែន​របស់​លោក លោកដាវីឌ ឡាមមី បានថ្លែងថា ៖ “យើងក៏នឹងបញ្ជូនមីស៊ីលការពារអាកាសរាប់រយ​គ្រឿង​បន្ថែម គ្រាប់កាំភ្លើងធំរាប់ម៉ឺនគ្រាប់បន្ថែម និងរថពាសដែកបន្ថែមទៀត​ទៅដល់​អ៊ុយក្រែន​​ គឺពីពេលនេះ រហូតដល់ដំណាច់ឆ្នាំ”។

ចំណែករដ្ឋមន្រ្តីការបរទេសអាម៉េរិក លោកអន់តូនី ប្ល៊ិនឃិន ក្នុងដំណើរទស្សនកិច្ចនៅទីក្រុង​គៀវ កាល​ពីថ្ងៃពុធ បានសន្យាថា សហរដ្ឋអាម៉េរិកនឹងធ្វើការបន្ទាន់លើការស្នើសុំខាងយោធា​របស់​អ៊ុយក្រែនដែលចង់អាចវាយប្រហារនៅទីជម្រៅក្នុងដែនដីរុស្ស៊ី។ នៅអំឡុងសន្និសីទកាសែតមួយ ប្រមុខការទូតអាម៉េរិក បានថ្លែងថា ៖ “យើងធ្វើការបន្ទាន់​ដើម្បី​បន្តធានាថា អ៊ុយក្រែនមានអ្វីដែលខ្លួនត្រូវការដើម្បីការពារខ្លួនឲ្យមានប្រសិទ្ធភាព។” លោក​បញ្ជាក់ថា ប្រធានាធិបតីអាម៉េរិក លោកចូ បាយឌិន និងនាយករដ្ឋមន្រ្តីអង់គ្លេសលោក ខេ ស្តាកមើ នឹងពិភាក្សាជាមួយគ្នាអំពីការស្នើសុំនេះ។

ចំណែកប្រមុខការទូតអ៊ុយក្រែន លោកស្រីអន់ឌ្រីអ៊ី ស៊ីប៊ីហ្គ៉ា ក៏បានទាមទារសាជាថ្មី​ឲ្យ​លើក​ចេញរាល់ការកំហិតទាំងអស់សម្រាប់ការវាយប្រហាររបស់អ៊ុយក្រែនប្រឆាំងនឹងគោលដៅយោធាដែលស្របច្បាប់នៅលើទឹកដីរុស្ស៊ីជាមួយនឹងអាវុធរបស់សហរដ្ឋអាម៉េរិក និងអង់គ្លេស។

រីឯលោកអន់តូនី ប្ល៊ិនឃិន ក៏បានប្រកាសកាលពីថ្ងៃពុធនូវជំនួយខាងសេដ្ឋកិច្ចថ្មី ៧១៧​លាន ដុល្លារសម្រាប់អ៊ុយក្រែន ដែលរួមមាន ៣២៥លានដុល្លារសម្រាប់វិស័យថាមពល ជំនួយ​មនុស្ស​ធម៌២៩០លានដុល្លារ ដែលរួមមានការផ្គត់ផ្គង់ទឹកស្អាត និង ១០២លានដុល្លារសម្រាប់​ការងារ​ដោះមីន។

ចំណែក ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី បានថ្លែងថា ៖ “ជ័យជម្នះ​របស់​អ៊ុយក្រែន​នៅក្នុងសង្រ្គាមទប់ទល់នឹងរុស្ស៊ី អាស្រ័យជាសំខាន់​ពីការគាំទ្ររបស់អាម៉េរិក។ ប្រធានាធិបតីអ៊ុយក្រែនទទូចឲ្យដឹងថា ផែនការជ័យជម្នះអាស្រ័យសំខាន់លើការ​គាំទ្ររបស់​សហរដ្ឋអាម៉េរិក និងដៃគូដទៃៗទៀត។