វ៉ាទីកង់ស្វាគមន៍​កុមាររងគ្រោះពីហ្គាហ្សាដែលត្រូវការសង្រ្គោះបន្ទាន់

បន្ទាប់ពីជាប់គាំងជាច្រើនខែ កុមារដែលទាមទារការសង្រ្គោះបន្ទាន់និងមានជំងឺ​ធ្ងន់ធ្ងរចំនួន ១៤នាក់ដែលអាចតស៊ូរស់ទាំងឈឺចាប់នៅ​តំបន់ហ្គាហ្សា បានមកដល់ប្រទេសអ៊ីតាលី កាលពីល្ងាចថ្ងៃព្រហស្បតិ៍ទី ១៣ ខែកុម្ភៈ ឆ្នាំ២០២៥។

ការមកដល់របស់ពួកគេត្រូវបានស្វាគមន៍ក្រៅផ្លូវការដោយផ្ទាល់ដោយលោកបូជាចារ្យ អ៊ីប្រាហ៊ីម ហ្វាល់តាស ( Ibrahim Faltas ) អ្នកទទួលខុសត្រូវព្រះសហគមន៍កាតូលិកនៅវ៉ាទីកង់ ហើយក៏បានបញ្ជូនពូកគេទៅកន្លែងសង្គ្រោះភ្លាមៗ។

វ៉ាទីកង់ញូវបានរាយការណ៍ថា លោកបូជាចារ្យបានចុះដល់អាកាសយានដ្ឋាន​នៅក្នុងទីក្រុងរ៉ូមក្រោមការសម្របសម្រួលដឹកជញ្ជូនដោយកងទ័ពអាកាសអ៊ីតាលី។

ឧបនាយករដ្ឋមន្រ្ដីនៃប្រទេសអ៊ីតាលី និងរដ្ឋមន្ត្រីក្រសួងការបរទេស លោក អេនតូនីញ៉ូ តាហ្សានី ( Antonio Tajani) និង ថ្នាក់ដឹកនាំព្រះសហគមន៍ជាច្រើននាក់ក៏បានចូលរួមផងដែរ។

លោកបូជាចារ្យបានជំរុញឲ្យមានការយកចិត្តទុកដាក់បំផុតចំពោះកុមាររងគ្រោះទាំងអស់ ដើម្បីធានាឲ្យពួកគេអាចទទួលបានសិទ្ធិរស់រានមានជីវិត មានសុខភាព ការអប់រំដ៏ប្រសើរ៕