លោក ស សុខា អំពាវនាវ​ដល់អ្នកគាំទ្រគណបក្សប្រជាជនកម្ពុជា និងសាធារណជន​កុំចាញ់ល្បិចកលញុះញង់របស់ក្រុមជ្រុលនិយម​

ក្នុងរយៈពេលចុងក្រោយនេះ នៅតែមានមនុស្សមួយក្រុមតូច បន្តព្យាយាមផ្សព្វផ្សាយព័ត៌មាន មិនពិត ទាំងខ្លឹមសារសំណេរ រូបភាព វីដេអូ និងការអត្ថាធិប្បាយគ្មានសច្ចធម៌ផ្សេងៗ ដោយប្រៀបធៀប លោក ស សុខា ជាមួយសម្តេចមហាបវរធិបតី ហ៊ុន ម៉ាណែត ក្នុងចេតនាញុះញង់ និងបំភ័ន្ដឱ្យសាធារណមតិមានការយល់ច្រឡំ ចំពោះគោលជំហរដ៏ម៉ឺងម៉ាត់របស់​លោក ស សុខា និងសាមគ្គីភាពផ្ទៃក្នុងដ៏រឹងមាំរបស់គណបក្សប្រជាជនកម្ពុជា។

ទាក់ទងនឹង​ការ​មួលបង្កាច់ និង​ការ​ផ្សព្វផ្សាយព័ត៌មានមិនពិតនេះ ​​អ្នកនាំពាក្យលោក ស សុខា ឧបនា​យករដ្ឋមន្ត្រី រដ្ឋមន្ត្រីក្រសួងមហាផ្ទៃ គឺ​លោក រ៉េន រតនៈ បានចេញ​​​សេចក្តីថ្លែងការណ៍ចុះថ្ងៃទី​១៨ ខែសីហា បញ្ជាក់ដល់សាធារណជនកុំឱ្យមានការយល់ច្រឡំ និង​ការញុះញង់ខុសច្បាប់ពី​ក្រុមអគតិមួយក្រុម​នេះ។

លោកបាន​ថ្លែងថា ៖ «ចេតនាទុច្ចរិតនេះ គឺជាក្រឡានយោបាយចាស់គំរឹល ដែលក្រុមប្រឆាំងអស់ក្បួន តែងយកមក ប្រើប្រាស់ដើម្បីបំបែកបំបាក់ផ្ទៃក្នុងគណបក្សប្រជាជនកម្ពុជា ម្តងហើយម្តងទៀត ទោះបី​ជាទីបំផុតគ្មាន បានផលអ្វី ក្រៅតែពីធ្វើឱ្យគណបក្សចាស់វស្សាមួយនេះកាន់តែមានភាពធន់ និងកាន់​តែមានសាមគ្គីភាព ផ្ទៃក្នុងល្អឡើងៗ»។

ក្នុងន័យនេះ អ្នកនាំពាក្យ បាន​​បញ្ជាក់​បន្ថែមថា ៖ «ឯកឧត្តមអភិសន្តិបណ្ឌិត មិនមែនជាមនុស្សប្រ​ជែ​ង​មុខតំណែង ដូចពាក្យអុចអាលញុះញង់នោះទេ ប៉ុន្តែឯកឧត្តមអភិសន្តិបណ្ឌិត តែងតែប្រកាន់វប្បធម៌រួមចំណែក រួមរែកពន់ រួមគិត រួមធ្វើ រួមទទួលខុសត្រូវ ដោយប្រកាន់ខ្ជាប់នូវ បុព្វហេតុមួយដ៏ច្បាស់​លាស់​ គឺធ្វើអ្វីៗគ្រប់បែបយ៉ាងដើម្បីជាតិ និងផ្ដល់ភាពកក់ក្តៅជូនប្រជាជន ជាទីស្រលាញ់ស្មើជីវិត»។

ក្នុងក្របខណ្ឌគណបក្ស លោក ស សុខា គោរពការសម្រេចចិត្តរបស់អង្គមហាសន្និបាត គណបក្ស គោរពគោលការណ៍ដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា។

ដូចគ្នានេះ ក្នុងក្របខណ្ឌរាជរដ្ឋាភិបាល លោក ស សុខា គោរពដោយម៉ឺងម៉ាត់បំផុតនូវឋានានុក្រមការងារ ជាពិសេសការសម្រេចចិត្តរបស់ រាជរដ្ឋាភិបាល ក្រោមមាគ៌ាដឹកនាំប្រកបដោយភាពឈ្លាសវៃ និងទស្សនវិស័យដ៏ជឿនលឿន របស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា។

លោក រ៉េន រតនៈ បានបន្ថែមថា ៖ «ឈរលើស្មារតីឥតងាករេនេះ! ឯកឧត្តមអភិសន្តិបណ្ឌិត អំពាវនាវដល់សមាជិក សមាជិកា គណបក្សប្រជាជនកម្ពុជា អ្នកគាំទ្រគណបក្សប្រជាជនកម្ពុជា និងសាធារណជនទាំងក្នុង និងក្រៅ​ប្រទេស សូមកុំចាញ់ល្បិចកលញុះញង់របស់ក្រុមជ្រុលនិយម»។

លោកថា ៖ «ជាពិសេសក្រុមអ្នកនយោបាយប្រឆាំង អស់ក្បួនមួយចំនួនតូច ដែលតែងតែប្រើគ្រប់វិធីសាស្ត្រស្មោកគ្រោក ដើម្បីសម្រេចមហិច្ឆតាដណ្តើម អំណាច ដោយមិនគិតពីផលវិបាកធ្ងន់ធ្ងរចំពោះជាតិ និងប្រជាជន ដែលធ្លាប់ឆ្លងកាត់ទុក្ខវេទនា រាប់មិនអស់ក្នុងប្រវត្តិសាស្ត្រដ៏ជូរចត់របស់ខ្លួន ព្រោះតែល្បែងនយោបាយលាបពណ៌ ញុះញង់ និងបំបែកបំបាក់»។

តាមរយៈអ្នកនាំពាក្យ លោក ស សុខា ក៏អំពាវនាវដល់ជនរួមជាតិ មានជំនឿចិត្ត និងបន្តគាំទ្ររាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់ សម្តេចធិបតី ដើម្បីសម្រេចជោគជ័យលើការអ​នុវត្តយុទ្ធសាស្ត្របញ្ចកោណ និងសូមរក្សាស្មារតីជឿជាក់ខ្ពស់ថា គណបក្សប្រជាជនកម្ពុជា ដែលមានប្រវត្តិ រួមសុខ រួមទុក្ខជាមួយប្រជាជន ក្នុងដំណើរជាតិគ្រប់កាលៈទេសៈ ជាង៧០ឆ្នាំមកនេះ គ្មានថ្ងៃអនុញ្ញាត ឱ្យប្រទេសដែលធ្លាប់កម្សត់មួយនេះ វិលទៅរកអតីតកាលដ៏ខ្មៅងងឹតជាថ្មីទៀតឡើយ។

លោកបន្តថា ផ្ទុយទៅវិញ មាន តែការរួបរួមសាមគ្គីគ្នា ដើម្បីបន្តថែរក្សាសុខសន្តិភាព និងខិតខំអភិវឌ្ឍន៍ជាតិឱ្យកាន់​តែរុងរឿងស៊ីវិល័យ ដោយឈរលើបាវចនា ឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត្យ និងវឌ្ឍនភាពសង្គម៕