លោក ទាវ វណ្ណុល ប្រធានគណបក្សភ្លើងទៀន រងពិន័យចំនួន ១០លានរៀល និងបង់សងជំងឺចិត្ត ៦០០០ លានរៀលទៅដើមបណ្ដឹង
![](/sites/default/files/styles/max_width_770px/public/2024-07/btmaanjaati3_4.jpg?itok=t_6RyRY9)
សាលាដំបូង រាជធានីភ្នំពេញ នាព្រឹកថ្ងៃទី២៥ ខែកក្កដានេះ បានប្រកាសសាលក្រមសម្រេចពិន័យ ប្រធានគណបក្សភ្លើងទៀន លោក ទាវ វណ្ណុល ចំនួន ១០ លាន រៀល និងឲ្យសងជំងឺចិត្តទៅដើមបណ្ដឹងចំនួន ៦០០០លានរៀល លើសំណុំរឿង បទ «បរិហារកេរ្តិ៍ ជាសាធារណៈ» ប្រព្រឹត្ត នៅចំណុច រាជធានីភ្នំពេញ និងទីកន្លែងផ្សេងទៀត កាលពីអំឡុងខែកុម្ភៈ ឆ្នាំ ២០២៤។
លោក ជូង ជូងី មេធាវីការពាការសិទ្ធិ ឲ្យលោកទាវ វណ្ណុល បានថ្លែងប្រាប់ឱ្យដឹងនៅខាងក្រៅសាលាដំបូងរាជធានីភ្នំពេញ នាព្រឹកថ្ងៃទី ២៥ ខែកក្កដាថា ចៅក្រម ហុក ពៅ បានប្រកាសសាលក្រមរឿងករណីលោក ទាវ វណ្ណុល ដោយឱ្យបង់ពិន័យចំនួន ១០ លាន រៀល និងឲ្យសងជំងឺចិត្តទៅដើមបណ្ដឹងចំនួន ៦០០០លានរៀល។
លោកបានបញ្ជាក់ថា ៖ «ខ្ញុំយល់ថាសេចក្តីសម្រេចនេះគឺមិនយុត្តិធម៌សម្រាប់កូនក្តីខ្ញុំទេ ព្រោះអ្វីៗដែលលោកទាវ វណ្ណុល និយាយជាការពិត និងជាការបញ្ចេញមតិ។ ខ្ញុំនឹងផ្តល់ការប្រឹក្សាច្បាប់ដល់កូនក្តីខ្ញុំ ប្រសិនបើកូនក្តីខ្ញុំសម្រេចថាប្តឹងឧទ្ធរណ៍ គឺខ្ញុំនឹងចាត់ចែងប្តីងឧទ្ធរណ៍ជូនគាត់»។
នាថ្ងៃប្រកាសនេះដែរ លោក ទាវ វណ្ណុល មិនបានមកស្តាប់ការសម្រេចរបស់តុលាការនោះ ដោយសារលោកមានភារកិច្ចការងារនយោបាយនៅក្រៅប្រទេស។ នេះបើតាមការបញ្ជាក់ពីលោក ជូង ជូងី។
សូមបញ្ជាក់ថា លោក ទាវ វណ្ណុល ត្រូវបានមេធាវីតំណាងរាជរដ្ឋាភិបាលកម្ពុជា ប្តឹងពីបទធ្វើឲ្យប៉ៈពាល់ដល់កិត្តិយសប្រមុខរាជារដ្ឋាភិបាល និងរដ្ឋាភិបាលកម្ពុជា តាមរយៈការផ្ដល់បទសម្ភាសកាលពីថ្ងៃទី៥ ខែកុម្ភៈ ឆ្នាំ ២០២៤ ដល់សារព័ត៌មាន Nikkei Asia របស់ជប៉ុន និងផ្សាយបន្តដោយវិទ្យុបារាំង អន្តរជាតិ RFI ជាខេមរភាសា ក្នុងខណៈពេលដែលលោក ទាវ វណ្ណុល ទៅបំពេញបេសកកម្មការងារនៅទីក្រុងតូក្យូ ប្រទេសជប៉ុន។
តាមរយៈការដកស្រង់សម្ដីរបស់សារព័ត៌មានទាំងពីរ លោក ទាវ វណ្ណុល បានអះអាងថា រាជរដ្ឋាភិបាលបានដាក់កាំមេរ៉ានៅមុខផ្ទះរបស់លោកដើម្បីឃ្លាំមើលសកម្មភាព២៤ម៉ោង។ លោកបានបន្តថា រាជរដ្ឋាភិបាលដឹកនាំដោយ សម្តេចមហាបវរធិតី ហ៊ុន ណែត កាន់តែអាក្រក់ទៅទាក់ទងនឹងប្រជាធិបតេយ្យ ដោយបានបន្តចាប់ខ្លួនក្រុមប្រកួតប្រជែងនយោបាយ និងប្រជាពរដ្ឋដែលរិះគន់រាជរដ្ឋាភិបាល។
ការលើកឡើងចោទប្រកាសរបស់លោក ទាវ វណ្ណុល ត្រូវបានអង្គភាពអ្នកនាំពាក្យរាជរដ្ឋាភិបាលកម្ពុជាធ្វើការបដិសេដចោលផងដែរ៕
Daily Program
![Livesteam thumbnail](/sites/default/files/inline-images/live-stream-thumb.jpg)