រដ្ឋាភិបាលបារាំងកំពុងជំរុញឱ្យមាន "ការប្រុងប្រយ័ត្នបំផុត" នៅពេលប្រឈមមុខនឹងការគំរាមកំហែងភេរវកម្ម នៅតាមកន្លែងគោរពបូជានានានៅក្នុងប្រទេស។ នេះបើតាមទីភ្នាក់ងារព័ត៌មានកាតូលិក។
លោក ហ្សេរ៉ាល់ ដាម៉ានីន ( Gérald Darmanin) រដ្ឋមន្ត្រីក្រសួងមហាផ្ទៃបារាំងបានព្រមានមន្ត្រីក្នុងតំបន់តាមសារ Telegram មួយកាលពីថ្ងៃអង្គារថា ប្រទេសនេះស្ថិតក្នុងការប្រុងប្រយ័ត្ន “កម្រិតខ្ពស់ចំពោះលទ្ធភាពនៃការគំរាមកំហែងភេរវកម្ម”។
លោកបានបញ្ជាក់ថា "រាល់ការជួបជុំ ក្បួនដង្ហែ និងធម្មយាត្រា" នៅកន្លែងដែលមានទំនាក់ទំនងជាមួយកម្មវិធីរំលឹកដល់ព្រះនាងម៉ារី កំពុងប្រឈមមុខនឹងគ្រោះថ្នាក់។
ក្រៅពីនោះសមត្ថកិច្ចបារាំងក៏បានជូនដំណឹងដល់អាណាព្យាបាលក្នុងតំបន់ថា «ត្រូវតែមានការប្រុងប្រយ័ត្នជាខ្លាំង ជាពិសេសទាក់ទងនឹងបាតុកម្ម និងទីកន្លែងសាសនានានា»។
លោករដ្ឋមន្រ្តីក៏បានណែនាំមន្ត្រីរដ្ឋាភិបាលឲ្យមានទំនាក់ទំនងជាប្រចាំជាមួយនឹងកន្លែងសាសនា និងត្រូវដាក់ពង្រាយកម្លាំងសន្តិសុខបន្ថែមទៅកាន់ទីតាំងដែលមានភាពរសើបជាងនេះ។
លោក រដ្ឋមន្ត្រីក្រសួងមហាផ្ទៃបារាំងក៏បានណែនាំដល់មន្ត្រីក្នុងតំបន់ឱ្យផ្តល់យោបល់ដល់មេដឹកនាំសាសនា លើវិធានការការពារសន្តិសុខ ដើម្បីស្វែងរកបុគ្គល ឬយានជំនិះគួរឱ្យសង្ស័យនៅមុខកន្លែងគោរពបូជានានា។
រដ្ឋាភិបាលបារាំងក៏ត្រូវបានគេរាយការណ៍ថានឹងដាក់ពង្រាយកងកម្លាំងប្រឆាំងភេរវករ នៅតាមកន្លែងធម្មយាត្រាសំខាន់ៗ ដូចជាទីសក្ការបូជារបស់ព្រះនាងម៉ារីនៅក្រុងលួដ៍ (Lady of Lourdes) ជាទីដែលគ្រីស្តបរិស័ទ ជាង៣ម៉ឺន នាក់ត្រូវបានគេរំពឹងថានឹងប្រមូលផ្តុំគ្នាក្នុងពិធីបុណ្យក្នុងសប្តាហ៍នេះ៕
Daily Program
