យុវជន​តំបន់​អ្នកលឿង រៀន​របៀបអធិដ្ឋាន

ក្នុង​បរិយាកាស​ស្ងប់ស្ងាត់​ រួមនឹង​ពន្លឺទៀន​ដែល​កំពុងបំភ្លឺក្នុងព្រះវិហារ យុវជនប្រមាណ១០០នាក់ មកពីព្រះសហគមន៍នានាក្នុងតំបន់អ្នកលឿង រួមគ្នាអធិដ្ឋានតាមរបៀបតេហ្ស កាលពីថ្ងៃសុក្រ ទី១៩ ខែកក្កដា ឆ្នាំ២០២៤ នៅព្រះសហគមន៍កាតូលិក សន្តបេណេឌិក ក្នុង​ខេត្ត​ព្រៃវែង។

លោក សេរ៉ាល វ៉ូហ្សាំង បូជាចារ្យ​​ទទួលខុសត្រូវព្រះសហគមន៍​អ្នកលឿង និងកអណ្កើក បានណែនាំអំពីរបៀបអធិដ្ឋានផ្សេងៗដែលព្រះសហគមន៍កាតូលិកបានរៀបចំឡើង ក្នុងនោះ​មាន​អធិដ្ឋាន​ម្នាក់ឯង និងអធិដ្ឋានជាក្រុម​។

លោកបន្តថា ការអធិដ្ឋានជាមួយព្រះបន្ទូលរបស់ព្រះជាម្ចាស់ ជាការអធិដ្ឋាន​ពិសេស គឺ«ពេលសូត្រធម៌គឺយើងប្រើពាក្យរបស់អ្នកនិពន្ធ(គម្ពីរដំណឹងល្អ) តែយើងអធិដ្ឋានដោយអានព្រះគម្ពីរ និងស្តាប់ព្រះបន្ទូល គឺពេលនោះព្រះជាម្ចាស់ទាក់ទងនឹងយើង ហើយពេលនោះយើងអាចអធិដ្ឋានដោយពាក្យចេញពីដួងចិត្តរបស់យើង»។

លោកបូជាចារ្យ​រូបនេះ​បន្ថែម​ថា​ ពេលយើងចង់អធិដ្ឋានជាមួយព្រះបន្ទូល ដាច់ខាត​យើងត្រូ​វមានព្រះគម្ពីរក្នុងដៃ ព្រោះព្រះគម្ពីរនាំឲ្យយើងស្គាល់ព្រះយេស៊ូកាន់តែច្បាស់ និងណែនាំជិវិតរស់នៅរបស់​យើងជាគ្រីស្តបរិស័ទ។

«ព្រះគម្ពីរមិនគ្រាន់តែជាសៀវភៅមួយអានដើម្បីទទួលចំណេះទេ តែព្រះគម្ពីរជាលិខិតស្នេហារបស់ព្រះជាម្ចាស់សម្រាប់យើងទាំងអស់គ្នា។» លោក​បូជាចារ្យ​បញ្ជាក់។

កញ្ញា ស៊ុំ ដាលីន យុវនារីមកពីព្រះសហគមន៍កាតូលិកព្រៃវែង គាត់បានបានចូលរួមកម្មវិធីអធិដ្ឋានតេហ្សក្នុងតំបន់នេះ ជាលើកទី២ នាំឲ្យគាត់មានអំណរសប្បាយដោយបានជួបយុវជនដែលមកពីព្រះសហគមន៍ផ្សេងៗ។

ដាលីនប្រាប់ថា៖ «ពីមុនយើងអត់បានស្គាល់គ្នា តែតាមកម្មវិធីនេះ ជួយឲ្យយើងបានជួបគ្នា អធិដ្ឋានរួមគ្នា ហើយជួយឲ្យយើងជាគ្រីស្តបរិស័ទមានជំនឿកាន់តែមាំមួន»។

កម្មវិធីអធិដ្ឋានតាមរបៀបតេហ្សេក្នុងតំបន់អ្នកលឿងនេះ បានធ្វើឡើង៣ខែម្តង ឆ្លាស់​វេន​តាម​ព្រះសហគមន៍​ក្នុង​តំបន់​ ដែលមានព្រះសហគមន៍​អ្នក​លឿង ស្វាយរៀង និង​ព្រែកក្របៅ។ ​ នេះគឺ​ជាកម្មវិធីអធិដ្ឋាន​​​លើកទី៧​ហើយ៕

ដោយ៖ ម៉េង ភីឡុង