យ៉ាងហោចណាស់ជនជាតិប៉ាឡេស្ទីន ១០០ នាក់ត្រូវបានសម្លាប់ដោយការវាយប្រហារតាមអាកាសរបស់អ៊ីស្រាអែលមកលើសាលារៀនមួយដែលជាជម្រកសម្រាប់ជនភៀសខ្លួននៅក្នុងទីក្រុងហ្គាហ្សា។
ប្រភពពីប៉ាឡេស្ទីន រួមជាមួយនឹងទីភ្នាក់ងារព័ត៌មានក្នុងស្រុកវ៉ាហ្វា (WAFA) បាននិយាយថា ជនរងគ្រោះដែលស្នាក់នៅក្នុងសាលារៀននៅហ្គាហ្សា រួមមានស្ត្រី និងកុមារ។
ពាក់ព័ន្ធនឹងបញ្ហានេះ ក្រុមហាម៉ាស់បាននិយាយថា កងទ័ពអ៊ីស្រាអែល បានទម្លាក់គ្រាប់បែកដោយផ្ទាល់ទៅលើជនភៀសខ្លួន ខណៈពេលដែលពួកគេកំពុងធ្វើពិធីបួងសួង ហើយនេះគឺជាអ្វីដែលបានបង្កើនចំនួនអ្នកស្លាប់យ៉ាងឆាប់រហ័ស។
យោធាអ៊ីស្រាអែលបាននិយាយថា ខ្លួនបានវាយប្រហារពួកភេរវករហាម៉ាសយ៉ាងជាក់លាក់ដែលកំពុងប្រតិបត្តិការក្នុងសាលា។
ជម្លោះនៅតំបន់ហ្គាហ្សាហាក់នៅតែក្តៅ ទោះបីជាមានការចរចាគ្នាជាបន្តបន្ទាប់ ហើយការវាយប្រហាររបស់កងទ័ពអ៊ីស្រាអែលនេះ គឺធ្វើឡើងក្រោយពេលដែលមេដឹកនាំក្រុមហាម៉ាសត្រូវបានសម្លាប់ នៅប្រទេសអ៊ីរ៉ង់ ដែលកំពុងតែបង្កឲ្យមានភាពតានតឹង នឹងការប្រឈមមុខកាន់តែលេចធ្លោឡើងរវាង អ៊ីស្រាអែលនិងអ៊ីរ៉ង់៕
Daily Program
