ធានាទីផ្សារឡើងវិញដោយប្រកាសអំពីកំណែទម្រង់ នេះគឺជាការរំពឹងនៅជុំវិញកិច្ចប្រជុំកំពូលដែលរៀបចំឡើងបិទទ្វារពីថ្ងៃចន្ទ ដល់ថ្ងៃ ព្រហស្បតិ៍ ដោយគណបក្សកុំមុយនីស្តចិន (PCC) ដែលកំពុងកាន់អំណាច។ ការប្រជុំដែលត្រូវធ្វើឲ្យស្រអាប់ដោយការផ្សព្វផ្សាយអំពីតួលេខដែលធ្វើឲ្យខកចិត្ត អំពីកំណើនសេដ្ឋកិច្ចដែលយឺតយ៉ាវ និងតម្រូវការក្នុងទីផ្សារដែលជានិច្ចកាលនៅតែទាប។
កាលពីថ្ងៃចន្ទទី១៥ ខែកក្កដា នៅទីក្រុងប៉េកាំង ទីភ្នាក់ងារសារព័ត៌មានផ្លូវការចិនថ្មី បានរាយការណ៍ថា មានការប្រជុំនយោបាយនៅកិច្ចប្រជុំកំពូលនៅជុំវិញប្រធានាធិបតី ស៊ី ជីនពីង និងសំដៅធ្វើឲ្យសេដ្ឋកិច្ចបើកចំហ បន្ទាប់ពីការផ្សព្វផ្សាយតួលេខនៃកំណើនដែលធ្វើឲ្យខកចិត្តនៅត្រីមាសទី២ នៃឆ្នាំ។
យោងតាមតួលេខដែលត្រូវបានផ្សព្វផ្សាយដោយការិយាល័យជាតិស្ថិតិ (BNS) មុនបើកកិច្ចប្រជុំកំពូលបន្តិចបានឲ្យដឹងថា ការងារត្រូវបានប្រកាសថា លំបាក នៅខណៈដែលមហាយក្សអាស៊ី បានឃើញកំណើនសេដ្ឋកិច្ចយឺតយ៉ាវនៅត្រីមាសទី២ គឺ ៤,៧% ក្នុងឆ្នាំ។
ចង្វាក់កំណើននេះដែលធ្វើឲ្យខកចិត្តសម្រាប់ការរំពឹងពីអ្នកវិភាគ និងពីត្រីមាសទី១ គឺ ៥,៣% ក៏ជាកំណើនសេដ្ឋកិច្ចដែលខ្សោយបំផុតចាប់តាំងពីដើមឆ្នាំ២០២៣ នៅពេលចិនលើកការកំហិតដ៏តឹងរ៉ឹងសម្បើមប្រឆាំងនឹងជំងឺកូវីដ ១៩ ដែលធ្វើឲ្យសកម្មភាពសេដ្ឋកិច្ចត្រូវពិការ។
BNS បានទទួលស្គាល់ថា មូលដ្ឋាននៃការចាប់ផ្តើម និងកំណើនសេដ្ឋកិច្ចពិតប្រាកដត្រូវតែពង្រឹងឲ្យរឹងម៉ាំ។
ការលក់រាយក៏ត្រូវធ្វើឲ្យខកចិត្ត គឺ កើនតែ ២% ប្រចាំឆ្នាំកាលពីខែ មិថុនា ឬក៏ជាចង្វាក់ដែលខ្សោយបំផុតចាប់តាំងពីខែធ្នូ ឆ្នាំ២០២២ នៅខណៈដែលផលិតកម្មឧស្សាហកម្មកត់សម្គាល់ថា មានកំណើន ៥,៣% កាលពីខែមិថុនា ទល់នឹង ៥,៦% នៅមុននោះមួយខែ។
ចាប់តាំងពីចុងបញ្ចប់នៃរោគរាតត្បាត មហាអំណាចសេដ្ឋកិច្ចទី២ នៅលើពិភពលោក មានការលំបាកនឹងផ្តល់សំទុះសកម្មភាពសេដ្ឋកិច្ចឲ្យបានឆាប់រហ័យដោយសារវិបត្តិនៅក្នុងវិស័យអចលនទ្រព្យ ដែលតម្រូវការមានទាប និងអត្រាអត់ការងារធ្វើកើនខ្ពស់ នៅក្នុងចំណោមយុវជនចិន។
ពពកខ្មៅសេដ្ឋកិច្ចក៏ពូនគរផងដែរពីខាងបរទេស ជាមួយនឹងសហភាពអឺរ៉ុប និងសហរដ្ឋអាម៉េរិក ដែលបានបង្កើនជាច្រើនដងនូវរបាំងពាណិជ្ជកម្ម ដើម្បីការពារទីផ្សារពួកគេពីផលិតផលចិន និងការប្រកួតប្រជែងដែលត្រូវបានវិនិច្ឆ័យថា មិនស្មោះត្រង់។
សមាជដ៏មានសារសំខាន់នៃគណបក្សកុំមុយនីស្តចិនលើកនេះ គឺជាការជួបជុំជាគន្លឹះ នៅជុំវិញប្រធានាធិបតី ស៊ី ជីនពីង ដែលត្រូវតែអាចកំណត់នៃការកំណត់ទិសដៅធំៗខាងសេដ្ឋកិច្ចរបស់ប្រទេសសម្រាប់៥ឆ្នាំទៅមុខ។ កាលពីអតីតកាល ការប្រជុំបែបនេះ តែងផ្តល់ជាទៀងទាត់នូវការប្រែប្រួលដ៏មានសារសំខាន់នៃនយោបាយសេដ្ឋកិច្ចរបស់ប្រទេស។
អ្នកវិភាគសេដ្ឋកិច្ចជាច្រើនរំពឹងថា នឹងមានវិធានការគាំទ្រសកម្មភាពសេដ្ឋកិច្ច។
នៅក្នុងកំណត់សម្គាល់មួយរបស់អ្នកវិភាគ សារ៉ា តាន និងហារី មឺហ្វី គ្រូស នៃទីស្នាក់ការរបស់អង្គការសេវាកម្មហិរញ្ញវត្ថុ Moody’s Analystics សរសេរថា នៅក្នុងចំណោមវិធានការនានាដែលគេផ្តល់អនុសាសន៍ឲ្យអនុវត្ត គឺមាន កំណែទម្រង់វិស័យអចលនាទ្រព្យ ការបង្កើតបន្ថែមទៀតនូវការងារឯកទេសសម្រាប់អ្នកទទួលសញ្ញាបត្រ ឬក៏ការកែតម្រូវពន្ធអាករដើម្បីសម្រាលបំណុលរបស់សហករតំបន់។ ប៉ុន្តែក្រុមអ្នកវិភាគវាយតម្លៃថា ទិសដៅរបស់គណបក្សកុំមុយនីស្ត នឹងប្រហែលជាមិនសម្រេចចិត្តនូវកំណែទម្រង់ដាច់ខាតទេ ហើយនឹងគ្រាន់តែសម្រួលខ្លះៗប៉ុណ្ណោះដើម្បីអភិវឌ្ឍវិស័យបច្ចេកវិទ្យាជាន់ខ្ពស់ ឬក៏ជាការប្រកាសអំពីវិធានការមួយចំនួនដើម្បីគាំទ្រនៅក្នុងវិស័យអចលនទ្រព្យ។
Daily Program
