ទីក្រុងយុទ្ធសាស្រ្ត ប៉ូក្រូវស្ក៍ របស់អ៊ុយក្រែន រងការវាយប្រហារ និងទម្លាក់គ្រាប់​បែក

បើយោងតាមអាជ្ញាធរតំបន់ បានឲ្យដឹងថា ការទម្លាក់គ្រាប់បែករបស់រុស្ស៊ី​នៅលើទីក្រុង យុទ្ធសាស្រ្ត ប៉ូក្រូវស្ក៍ ដែលជាមជ្ឈមណ្ឌលដ៏សំខាន់នៃការដឹកជញ្ជូននៅភាគខាងកើតនៃ ប្រទេសអ៊ុយក្រែន និងកំពុងទទួលរងការគំរាមនឹងការបោះពួយទៅមុខរបស់ទាហាន​វិមាន​ក្រឹម​ឡាំង បានធ្វើឲ្យមនុស្សយ៉ាង​ហោចណាស់ម្នាក់ស្លាប់ កាលពីថ្ងៃអាទិត្យទី១៥ ខែកញ្ញា។

នៅលើសារតេឡេក្រាម សាលាក្រុងប៉ូក្រូវស្ក៍ បានប្រាប់ឲ្យដឹងថា នៅពេលព្រឹក អគារមួយ​ត្រូវ​រងផលប៉ះពាល់​នៅជិតស្ថានីយ៍សេវាកម្ម​ដោយការវាយប្រហារដោយកាំភ្លើងធំរបស់សត្រូវ។

យោង​តាមប្រភពដដែល បានឲ្យដឹងថា ការទម្លាក់គ្រាប់មួយផ្សេងទៀតកើតមានឡើងនៅ​ពេល​​ថ្ងៃត្រង់ និងបានប៉ះពាល់ដល់ភាគខាងលិច​នៃទីក្រុង ដែលសម្លាប់មនុស្សម្នាក់។

យោងតាមអ្នកសង្កេតការណ៍យោធា បានឲ្យដឹងថា ទាហានរុស្ស៊ីដែលមានច្រើនជាង និងមាន​គ្រឿង​​សព្វាវុធបរិមាណធំជាងស្ថិតនៅមិនដល់ ១០គម ផងពីទីក្រុងប៉ូក្រូវស្ក៍ នៅពេលនេះ។

អាជ្ញាធរក្នុងតំបន់ បានប្រកាសឲ្យដឹងថា ការផ្គត់ផ្គង់ទឹក និងឧស្ម័ន ត្រូវបានកាត់ផ្តាច់​ដោយសារ​​ការប្រយុទ្ធ។ ប៉ុន្តែការបែងចែកទឹកស្អាតត្រូវបានស្តារឡើងវិញ។

សាលាក្រុងប៉ូក្រូវស្ក៍ ក៏បានប្រាប់ទៀតថា ការវាយប្រហាររបស់រុស្ស៊ីក៏បានកាត់ផ្តាច់ចរន្ត​អគ្គីសនី​ពី​ផ្នែក​ដ៏ធំនៃទីក្រុង។

នៅសប្តាហ៍នេះ អាជ្ញាធរតំបន់ និងប្រព័ន្ធផ្សព្វផ្សាយអ៊ុយក្រែន ក៏បានរាយការណ៍អំពីការវាយ​ប្រហាររបស់រុស្ស៊ី​ដែលបានបំផ្លិចបំផ្លាញស្ពានពីរនៅទីក្រុងប៉ូក្រូវស្ក៍។

ប្រឈមនឹងការខិតជិតមកដល់នៃកងកម្លាំងរបស់វិមានក្រឹមឡាំង អាជ្ញាធរអ៊ុយក្រែន បាន​ជន្លៀស​ប្រជាជនរាប់ពាន់នាក់ និងអំពាវនាវឲ្យអ្នកដែលបន្តនៅឲ្យ​ចាក​ចេញ។

នៅខណៈដែលលោកប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី ទទួលស្គាល់ថា ស្ថានភាពមានការលំបាកខ្លាំងសម្រាប់ទាហានរបស់លោកនៅក្នុងតំបន់ដូណេត ហើយ​ទីក្រុង​មូស្គូ ដណ្តើមបានទឹកដីច្រើន។

ចំណែក ប្រមុខចារកម្មយោធាអ៊ុយក្រែន លោកគីរីឡូ ប៊ូដាណូវ វាយ​តម្លៃ​ថា បញ្ហាដ៏ធំបំផុត​សម្រាប់​ទីក្រុងគៀវ គឺកូរ៉េខាងជើង និងការផ្គត់ផ្គងដ៏ច្រើនសម្បើម​របស់​ប្រទេស​នេះ​នូវគ្រាប់​កាំភ្លើង​ធំមកឲ្យរុស្ស៊ី។

នៅអំឡុងសន្និសីទយុទ្ធសាស្រ្ត យ៉ាល់តា អឺរ៉ុប នៅទីក្រុងគៀវ លោកគីរីឡូ ប៊ូដាណូវ បាន​ថ្លែងថា ៖ ”ពីសម្ព័ន្ធមិត្តទាំងអស់រុស្ស៊ី បញ្ហាធំបំផុតសម្រាប់យើង មានប្រភពពីកូរ៉េខាងជើង ដោយ​សារតែជាមួយបរិមាណសម្ភារៈយោធា ដែលប្រទេសនេះផ្តល់ឲ្យរុស្ស៊ី។ វាប៉ះពាល់​យ៉ាង​ពិត​ប្រាកដ​ដល់វិសាលភាពនៃការប្រយុទ្ធ។ លោកប៊ូដាណូវ ឧត្តមសេនីយ៍ ដ៏មានឥទ្ធិពល បាន​ថ្លែងថា អាជ្ញាធរកូរ៉េខាងជើង បានផ្គត់ផ្គង់​បរិមាណដ៏សម្បើមនៃគ្រាប់កាំភ្លើងធំ។ នេះ​គឺ​អាក្រក់​​សម្រាប់យើង។ លោកទទួលស្គាល់ថា ជាភ័ព្វអាក្រក យើងមិនអាចធ្វើអ្វីបានទាល់តែ​សោះ​ចំពោះរឿងនេះនៅពេលនេះ។ លោកអះអាងទៀតថា ៖ “ទង្វើដែលពួកគេផ្តល់មីស៊ីល​បាលីស្ទីកទៀត គឺធ្វើឲ្យមិនសប្បាយចិត្ត ប៉ុន្តែវាមិនធ្ងន់ធ្ងរ ដោយសារបរិមាណមីស៊ីលដែល​ផ្គត់ផ្គង់​មានមិនច្រើន។”

សហរដ្ឋអាម៉េរិក និងកូរ៉េខាងត្បូង បានចោទប្រកាន់ទីក្រុងព្យុងយ៉ាងថា បានផ្តល់គ្រឿងរំសេវ និង​មីស៊ីលមកឲ្យរុស្ស៊ីដើម្បីគាំទ្រការឈ្លានពានរបស់រុស្ស៊ីនៅអ៊ុយក្រែន។​ ការចោទប្រកាន់​ទាំងនេះត្រូវបានច្រានចោលដោយទីក្រុងព្យុងយ៉ាង។ ប៉ុន្តែអង្គភាពអង្កេត​ការ​សិក្សា​ស្រាវជ្រាវជម្លោះសព្វាវុធ បានបញ្ជាក់នៅសប្តាហ៍នេះថា ការវិភាគនានាពីពី​សំណល់​កាទុះ បង្ហាញច្បាស់ថា មីស៊ីលដែលផលិតនៅឆ្នាំនេះនៅកូរ៉េខាងជើង ត្រូវបានគេប្រើប្រាស់​នៅ​អ៊ុយក្រែន”។