តារាចម្រៀងរ៉េបកម្ពុជាដ៏ល្បី លោក ម៉ាន់ វណ្ណដា បង្ហាញវត្តមានលើឆាក នៃកម្មវិធីបិទការប្រកួតកីឡាអូឡាំពិករដូវក្តៅ ក្រុងប៉ារីស

ការប្រកួតកីឡាអូឡាំពិករដូវក្តៅ លើកទី​៣៣ ដែលប្រព្រឹត្តិធ្វើឡើង​នាទីក្រុង​ប៉ារីស រដ្ឋធានី​របស់​សាធារណរដ្ឋ​បារាំង​ដែលបានចាប់​ផ្តើមកាលពីថ្ងៃទី ២៦ ខែកក្កដា ​បានឈាន​ដល់​​ទីបញ្ចប់កាលពី​​ថ្ងៃ​អាទិត្យ​ទី១១ ខែ​សីហា ឆ្នាំ២០២៤។ 

ក្នុង​ពិធីបិទ​បញ្ចប់​ពការប្រកួតកីឡាអូឡាំពិក​រដូវក្តៅនេះដែរ កំពូលតារាចម្រៀងរ៉េប (Rap) របស់ប្រទេសកម្ពុជា លោក​ ម៉ាន់ វណ្ណដា​ បានបង្ហាញខ្លួនលើឆាក នៃកម្មវិធីបិទនេះ​​ ដោយលោកបានច្រៀងបទចម្រៀង «Time to Rise»។

ការបង្ហាញខ្លួន​របស់​តារាចម្រៀងរ៉េបដ៏​ល្បីនេះ បានធ្វើឱ្យ​ប្រជាពលរដ្ឋ​ក្នុង​ និងក្រៅប្រទេស​ ​​រួមទាំងថ្នាក់ដឹកនាំ​របស់​ប្រទេសកម្ពុជា គឺសម្តេចបវរធិបតីនាយករដ្ឋមន្រ្តី ហ៊ុន ម៉ាណែត និងមន្រ្តីជាន់ខ្ពស់​​ចូលរួមអបអរសាទរផងដែរ។

សម្តេចធិបតី ហ៊ុន ម៉ាណែត បាន​លើកឡើងថា ៖ «សូមអបអរសាទរ និងអរគុណដល់សិល្បករកម្ពុជា លោក វណ្ណដា-Vann Da សម្រាប់ការបង្ហាញវត្តមានលើឆាក នៃកម្មវិធីបិទការប្រកួតកីឡាអូឡាំពិករដូវក្តៅ ក្រុងប៉ារីស ប្រទេសបារាំង ឆ្នាំ២០២៤ ដោយបានជួយលើកតម្កើងមុខមាត់ប្រទេសនៅលើឆាកអន្តរជាតិ»។

សម្តេចធិបតី​បាន​បន្តថា ក្នុងនាមរាជរដ្ឋាភិបាលកម្ពុជា និងប្រជាជនកម្ពុជា សម្តេចសូមសម្តែងនូវការអបអរសាទរជាមួយនឹងភាពជោគជ័យរបស់ប្រទេសបារាំង និងប្រជាជនបារាំង ដែលបានរៀបចំព្រឹត្តិការណ៍កីឡាអូឡាំពិករដូវក្តៅ នៅទីក្រុងប៉ារីស ចាប់ពីថ្ងៃទី២៦ ខែកក្កដា រហូតដល់បិទបញ្ចប់នាយប់ថ្ងៃទី១១ ខែសីហា ប្រកបដោយភាពអធិកអធម និងជោគជ័យ។​

ព្រមជាមួយគ្នានេះ បារាំង​ក៏បានផ្តល់ឱកាសសម្រាប់កីឡាករកម្ពុជាបានទៅចូលរួមប្រកួត ការស្នាក់នៅ និងធ្វើដំណើរប្រកបដោយសុខសុវត្ថិភាពផងដែរ។ អ្វីដែលពិសេសការផ្តល់កិត្តិយសសម្រាប់សិល្បករកម្ពុជា លោក វណ្ណដា ក្នុងការសម្តែងបទចម្រៀងនាពិធីបិទព្រឹត្តិការណ៍កីឡាអូឡាំពិករដូវក្តៅ​​ ដែលបានផ្តល់នូវកិត្តិយស​ និងបង្ហាញពីសិល្បៈកម្ពុជា ទៅកាន់ពិភពលោក។

ជាមួយគ្នានេះដែរ លោក នេត្រ ភក្ត្រា រដ្ឋមន្ត្រីក្រសួង​ព័ត៌មាន ​ក៏បាន​លើកឡើងដែរថា មោទកភាពជាតិខ្មែរគឺស្ថិតនៅលើសកម្មភាពរបៀបនេះ។

លោកថា ៖ «អរគុណ វណ្ណដា និងវីរកីឡាករ កីឡាការិនីខ្មែរដែលបានបង្ហាញទង់ជាតិខ្មែរដល់ពិភពលោកប្រកបដោយមោទកភាពក្នុងការបើកនិងបិទការប្រកួតកីឡាអូឡាំពិក, យកភាសាខ្មែរ វប្បធម៌ខ្មែរដ៏ល្អផូរផង់ឱ្យពិភពលោកបានស្គាល់កាន់តែច្បាស់! សូមទទួលនូវការគោពនិងការកោតសរសើរពីពលរដ្ឋខ្មែរ»។

ទាក់ទងនឹងការបង្ហាញខ្លួនរបស់​លោក វណ្ណដានេះដែរ លោក តាន់ ហ្សង់ ហ្វ្រង់ស្វ័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការ ការបរទេស និងសហប្រតិបត្តិការអន្តរជាតិ ​បានសរសេរលើបណ្តាញង្គមហ្វេសប៊ុក​របស់​លោកដែរថា កាសែតបារាំង Le Parisien ចុះផ្សាយអត្ថបទមួយ ដោយចោទសួរថា តើ វណ្ណដា ជានរណា?

លោកបានបញ្ជាក់ថា ៖ «ជារឿងធម្មតា, កម្ពុជាជាប្រទេសសម្បូរយុវជន និងយុវនារី (៧០%នៃប្រជាជនខ្មែរមានអាយុក្រោម៣០ឆ្នាំ)។ ម្ល៉ោះហើយ! ដើម្បីព្យាករមើលអនាគតនៃប្រទេសមួយនេះ គេតែងចាប់អារម្មណ៍ជាពិសេសទៅលើ ទំពាំងស្នងឫស្សី»។

លោកបន្ថែមថា ៖ «គុណភាពនៃយុវវ័យ អាចស្តែងឡើងលើគ្រប់វិស័យ, ដូចជាចំណេះដឹងនិងជំនាញ ពិសេស ផ្នែកវិទ្យាសាស្ត្រ និងសេដ្ឋកិច្ចហិរញ្ញវត្ថុ, ព្រមទាំងសិល្ប:ដែលជាព្រលឹងជាតិនិងដែលត្រូវតែរស់រវើក សម្បូរបែប ប្រកបដោយគំនិតច្នៃប្រឌិតខ្ពស់។ វណ្ណដាជាសិល្បករដែលមានគុណសម្បត្តិអស់ទាំងនេះ…»។

សូមបញ្ជាក់ថា ការប្រកួតកីឡាអូឡាំពិករដូវក្តៅ លើកទី​៣៣ នេះ សហរដ្ឋអាមេរិក ទទួលបាន​មេដាយច្រើនជាងគេ រហូតដល់ ១២៦មេដាយ (មាស៤០ ប្រាក់៤៤ និងសំរិទ្ធ ៤២) តាមពីក្រោយដោយប្រទេសចិន ៩១មេដាយ (មាស ៤០ ប្រាក់២៧ និងសំរិទ្ធ២៤) និងជប៉ុន ៤៥មេដាយ (មាស២០ ប្រាក់១៣ និងសំរិទ្ធ១៣) ខណៈម្ចាស់ផ្ទះបារាំង ឈរនៅលេខ៥ មាន៦៤មេដាយ (មាស ១៦ ប្រាក់ ២៦ និងសំរិទ្ធ២២)៕