ដំរីពិកាឈូដំរីពិកាឈូក បន្តបោះជំហានទៅមុខដោយក្តីសង្ឃឹម ក្រោយទទួលបានជើងសិប្បនិម្មិតថ្មីក បន្តបោះជំហានទៅមុខដោយក្តីសង្ឃឹម ក្រោយទទួលបានជើងសិប្បនិម្មិតថ្មី

ឈូក ដែលជាសត្វដំរីដ៏ល្បីល្បាញរបស់កម្ពុជា និងជាអ្នកដែលបានរួចផុតពីគ្រោះថ្នាក់ដល់ជីវិតដោយសារអន្ទាក់ កាលពីជិតពីរទសវត្សរ៍មុននោះ បានបោះជំហានទៅមុខប្រកបដោយក្តីសង្ឃឹមម្តងទៀត បន្ទាប់ពីទទួលបានជើងសិប្បនិម្មិតថ្មីមួយ។
យោងតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា សត្វដំរីនេះត្រូវបានបំពាក់ជើងសិប្បនិម្មិតថ្មី កាលពីថ្ងៃទី ២៥ ខែមេសា នៅមជ្ឈមណ្ឌលសង្គ្រោះសត្វព្រៃភ្នំតាម៉ៅ ដែលជាទីកន្លែងឈូករស់នៅ ចាប់តាំងពីត្រូវបានសង្គ្រោះក្នុងឆ្នាំ ២០០៧ មក។
ពីអតីតកាល ឈូកគឺជាកូនដំរីមួយក្បាលដែលស្ថិតក្នុងស្ថានភាពជិតស្លាប់ បន្ទាប់ពីបានបាត់បង់ជើងមួយផ្នែកដោយសារអន្ទាក់នៅក្នុងព្រៃ ប៉ុន្តែចាប់តាំងពីពេលនោះមក ឈូកបានក្លាយជា និមិត្តរូបនៃភាពធន់ និងការយកចិត្តទុកដាក់ចំពោះសត្វព្រៃនៅក្នុងប្រទេសកម្ពុជា។
ការផលិតជើងសិប្បនិម្មិតថ្មីនេះ អាចសម្រេចទៅបានតាមរយៈព្រះរាជទានដ៏ខ្ពង់ខ្ពស់ពី សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ដែលព្រះអង្គបានប្រោសព្រះរាជទានថវិកាចំនួន ២,០០០ ដុល្លារអាមេរិក ដល់ក្រសួងកសិកម្ម រុក្ខាប្រមាញ់ និងនេសាទ ដើម្បីគាំទ្រដល់ការផលិតនេះ។
ជើងសិប្បនិម្មិតដែលបានផ្លាស់ប្តូរថ្មីនេះ ត្រូវបានរំពឹងថានឹងជួយឱ្យការធ្វើចលនា និងការរស់នៅរបស់ឈូក កាន់តែមានភាពប្រសើរឡើង និងមានភាពងាយស្រួលជាងមុន។
ក្រសួងបានបញ្ជាក់ថា ការថែទាំឈូក និងការជួយឱ្យសត្វដំរីនេះអាចធ្វើចលនាបានដូចធម្មតាឡើងវិញ គឺជាកិច្ចខិតខំប្រឹងប្រែងរួមគ្នា រវាងរដ្ឋបាលព្រៃឈើនៃក្រសួងកសិកម្ម, អង្គការសម្ព័ន្ធមិត្តសត្វព្រៃ (Wildlife Alliance) និងអ្នកថែទាំដែលបាននៅជាប់ជាមួយសត្វដំរីនេះទាំងយប់ទាំងថ្ងៃ។
ជាមួយគ្នានេះដែរ អាជ្ញាធរក៏បានអំពាវនាវដល់សាធារណជន ឱ្យបន្តគាំទ្រដល់កិច្ចខិតខំប្រឹងប្រែងអភិរក្សសត្វព្រៃ និងកម្មវិធីថែទាំសត្វនៅភ្នំតាម៉ៅ ដើម្បីធានានូវនិរន្តរភាពយូរអង្វែងនៃធនធានសត្វព្រៃរបស់ប្រទេសកម្ពុជា។