កាលពីថ្ងៃចន្ទទី២៩ កក្កដា សេវាកម្មចារកម្មនៃទីក្រុងសេអ៊ូល បានប្រាប់ទៅតំណាងរាស្រ្ត កូរ៉េ ខាងត្បូងអំពីអ្នកបន្តវេនពីលោកគីម ជុងអ៊ុន។ មេដឹកនាំនៃប្រទេសកូរ៉េខាងជើង នឹងត្រៀមកូនស្រីរបស់លោកនៅវ័យជំទង់ដើម្បីឡើងដឹកនាំប្រទេសបន្ត។
កូនស្រីវ័យក្មេង គីម ជូអេ ដែលអាយុរបស់នាងមិនត្រូវបានបញ្ចាក់ ត្រូវបានឃើញនៅក្បែរឪពុកជាច្រើនដងចាប់តាំងពីឆ្នាំ២០២២ ដែលទុកឲ្យគេគិតថា ថ្ងៃណាមួយ នាងនឹងអាចបន្តពីឪពុកសម្រាប់ជំនាន់ទី៤ នៃការឡើងកាន់អំណាចសម្រាប់សន្តវង្សកុំមុយនីស្តតែមួយនៅលើពិភពលោក។
បន្ទាប់ពីបានទទួលព័ត៌មានពីសេវាកម្មជាតិនៃចារកម្ម NIS តំណាងរាស្រ្តលី សុងវឺន បានថ្លែងទៅកាន់សារព័ត៌មានថា សេវាកម្មជាតិនៃចារកម្ម NIS វិនិច្ឆ័យថា នាងត្រូវបានជ្រើសរើសជាអ្នកបន្តវេន។ អ្នកតំណាងរាស្រ្តកូរ៉េខាងត្បូង បានបន្ថែមថា ៖ “ទីក្រុងព្យុងយ៉ាង ធ្វើឲ្យដឹងថា គីម ជូអេ អាចជាទាយាទ។ នេះបង្ហាញថា ជូអេគឺជាបុគ្គលដែលគេជឿជាក់បំផុតថានឹងបន្តពីមេដឹកនាំបច្ចុប្បន្ន។
NIS ក៏បានពន្យល់ទៅកាន់តំណាងរាស្រ្តថា លោកគីម ជុងអ៊ុន មានសភាពលើសទម្ងន់យ៉ាងខ្លាំង ដោយមានទម្ងន់ប្រមាណ ១៤០ គីឡូ។ នេះបានធ្វើឲ្យលោកស្ថិតនៅក្នុងសភាពមានហានិភ័យខ្ពស់សម្រាប់ជំងឺបេះដូង។
លោកលី សុងវឺន ដែលបានលើកយកពីសេវាកម្មជាតិនៃចារកម្ម បានបន្តថា មេដឹកនាំកូរ៉េខាងជើង ដែលត្រូវបានគេស្គាល់ល្បីថា ជាអ្នកជក់បារីដ៏ខ្លាំង ត្រូវបានគេគិតឃើញថា អាចមានរោគសញ្ញាសំពាធឈាមខ្លាំង និងទឹកនោមផ្អែមដែលលំបាកនឹងនៅយូរបាន ៣០ឆ្នាំ។
យោងតាមការពន្យល់ដែលផ្តល់ដោយ NIS ទៅកាន់អ្នកតំណាងរាស្រ្តកូរ៉េខាងត្បូង ទីក្រុងព្យុងយ៉ាង ហាក់ដូចបង្ហាញភាពត្រឹមត្រូវនូវកម្រិតបញ្ចេញ កូនស្រីគីម ជូអេ ទៅកាន់សាធារណៈ ដើម្បីតាមដានមើលរបៀបដែលប្រជាជនកូរ៉េខាងជើងប្រតិកម្មសម្រាប់តួនាទីរបស់នាងដែលជាយថាហេតុអាចឡើងដឹកនាំបន្តពីមេដឹកនាំសព្វថ្ងៃ។ NIS បានប្រាប់ទៅកាន់តំណាងរាស្រ្តថាគីម ជូអេ បង្ហាញខ្លួនច្រើនជាងពាក់កណ្តាលនៃរាល់ការធ្វើដំណើរនៅក្បែរឪពុក ពាក់ព័ន្ធនឹងសកម្មភាពយោធា ដូចជាជាការត្រួតពិនិត្យមើលការធ្វើសមយុទ្ធយោធាជាដើម។
កាលពីខែមីនា អ្នកនាងគីម ជូអេ ត្រូវបានកំណត់សម្គាល់ដោយប្រព័ន្ធផ្សព្វផ្សាយរដ្ឋជាមួយនឹងឋានៈដែលមានកិត្តិយសណាស់ គឺហ៊ីយ៉ាងដូ ជាភាសាកូរ៉េ មានន័យថា មនុស្សដ៏សម្បើមនៃក្រុមប្រឹក្សារដ្ឋ ដែលនេះធ្វើឲ្យគេគិតថា នាងអាចនឹងបន្តពីលោកគីម ជុងអ៊ុន។ លោកប៉ាក ស៊ុនវុន អ្នកតំណាងរាស្រ្តម្នាក់ទៀត បានទម្លាយឲ្យដឹងថា ៖ “សូមកត់សម្គាល់ថា ពាក្យ ហ៊ីយ៉ាងដូ គឺត្រៀមសម្រាប់មេដឹកនាំ ឬសម្រាប់អ្នកបន្តវេន”។
យោងតាមអ្នកតំណាងរាស្រ្តប៉ាក ស៊ុនវុន បានឲ្យដឹងថា កាលពីមុន សេវាកម្មជាតិនៃចារកម្មមិនដកចេញនូវលទ្ធភាពដែលកុមារម្នាក់អាចលេចឡើងក្នុងនាមជាដំណោះស្រាយជម្រើសមួយនៅក្នុងផែនការបន្តវេន ដោយសារកូរ៉េខាងជើង មិនមានប្រកាសណាមួយសម្រាប់ការបន្តវេនទេ។
មុនឆ្នាំ២០២២ ការបញ្ជាក់តែមួយនៃវត្តមានរបស់គីម ជូអេ ចេញពីអតីតតារាបាល់បោះ NBA របស់អាម៉េរិក ដឺនីស រ៉ូដមេន។ លោកធ្លាប់បានបញ្ជាក់ថា បានជួបកូនស្រីរបស់មេដឹកនាំឈ្មោះថា ជូអេ នៅអំឡុងទស្សនកិច្ចនៅកូរ៉េខាងជើងនៅឆ្នាំ២០១៣។ ទីក្រុងសេអ៊ូល បានពន្យល់កាលពីដើមថា មេដឹកនាំកូរ៉េខាងជើង និងភរិយាលោកស្រី រី សុលជូ ដែលជាអតីតអ្នកចម្រៀង ដែលបានរៀបការនៅឆ្នាំ២០០៩ បានក្លាយជាឪពុកម្តាយកូនប្រុសដំបូងនៅឆ្នាំ២០២០ ហើយជូអេ គឺជាកូនទីពីរ។
ប៉ុន្តែនៅឆ្នាំ២០២៣ រដ្ឋមន្រ្តីកូរ៉េខាងត្បូងនៃការបង្រួបបង្រួម បានថ្លែងថា រដ្ឋាភិបាលស្ថិតក្នុងសភាពគ្មានសមត្ថភាពនឹងបញ្ជាក់អំពីវត្តមាននៃកូនប្រុសរបស់លោកគីម ជុងអ៊ុន ទេ។
Daily Program
