លោកកាឌីណាល់ ព្យែត្រូ ផារ៉ូលីន នាយករដ្ឋមន្រ្តីនៃសន្តអាសនៈបានថ្លែងនៅពេលអញ្ជើញធ្វើជាអធិបតីនៅក្នុងពិធីថ្វាយអភិបូជា ក្នុងតំបន់អាំប្រៀ( Umbria ) របស់ប្រទេសអ៊ីតាលីថា សង្រ្គាមគ្មានប្រយោជន៍សម្រាប់នរណាទាំងអស់។
លោកកាឌីណាល់ក៏បានមានប្រសាសន៍ដោយសង្កត់ធ្ងន់នៅលើបន្ទូលរបស់សម្តេចប៉ាបដែលទ្រង់តែងតែ រំឭកឡើងវិញនូវការអង្វររបស់ទ្រង់សុំឲ្យមានសន្តិភាពនៅលើពិភពលោក។
វ៉ាទីកង់ញូវបានរាយការណ៍ថា ប្រសាសន៍របស់លោកកាឌីណាល់នេះ គឺត្រូវបានដកស្រង់នៅពេលដែលពិភពលោកជាពិសេសនៅអឺរ៉ុបកំពុងព្រួយបារម្ភចំពោះវិវដ្ដចុងក្រោយនៃសង្រ្គាមនៅអ៊ុយក្រែន ក្រោយពេលដែលអ៊ុយក្រែនបានសម្រេចចិត្តបញ្ជូនកងទ័ពលុកលុយចូលប្រទេសរុស្ស៊ី។
ថ្លែងទៅកាន់អ្នកសារព័ត៌មាននៅខាងក្រៅព្រឹត្តិការណ៍នេះ លោកកាឌីណាល់ ដែលទើបតែបានបំពេញបេសកកម្មនៅអ៊ុយក្រែនក្នុងខែកក្កដា លោកបានអត្ថាធិប្បាយអំពីការលុកលុយនាពេលថ្មីៗនេះរបស់កងទ័ពអ៊ុយក្រែន នៅតំបន់ព្រំដែនរុស្ស៊ីខាងលិចថា ការវាយលុកនេះអាចនឹងធ្វើឱ្យសង្គ្រាមកាន់តែខ្លាំងឡើង។
លោកបានបន្តថា «ទាំងនេះគឺជាវិវដ្ដសភាពការណ៍ដែលគួរឲ្យព្រួយបារម្ភខ្លាំងណាស់ ព្រោះវាមានន័យថាបើកមុខថ្មី»។ «ក្នុងន័យនេះ ឱកាសសម្រាប់សន្តិភាពអាចកាន់តែឆ្ងាយទៅៗ»។
លោកកាឌីណាល់ ក៏បានគូសបញ្ជាក់អំពីតម្រូវការនៃសេចក្តីស្រឡាញ់នៅលើពិភពលោកថា នៅលើពិភពលោកនាពេលសព្វថ្ងៃនេះមនុស្សជាតិកាន់តែខ្វះសេចក្ដីស្រឡាញ់ ហើយមនុស្សកំពុងតែស្រេកឃ្លាននូវសេចក្តីស្រលាញ់។
លោកកាឌីណាល់ បានគូសបញ្ជាក់ចំណុចនេះ នៅពេលនិយាយជាមួយអ្នកសារព័ត៌មានមុនពិធីបូជា ថា យើងគួរតែរៀនថ្ងៃនេះ ដើម្បីផ្តាច់ខ្លួនពីភាពអាត្មានិយមរបស់យើង ក៏ដូចជាផ្តាច់ខ្លួនចេញពីការជឿជាក់ផ្ទាល់ខ្លួន និងការក្លែងបន្លំរបស់យើងពេក។ សូមបើកចិត្តយើងឲ្យទូលាយដល់អ្នកដទៃជាមួយនឹងវិធីសាស្រ្តភាតរភាព និងសន្តិភាព៕
Daily Program
