ទីភ្នាកងារអង្គការសហប្រជាជាតិសម្រាប់ជនភៀសខ្លួន (HCR) បានបញ្ជាក់ឲ្យដឹងថា មនុស្ស ជិត ១០០០០នាក់ នៅក្នុងខេត្ត តង់ហ្គ៉ាយីកា នៅសាធារណរដ្ឋប្រជាធិបតេយ្យកុងហ្គោ (RDC) ត្រូវបានបង្ខំឲ្យផ្លាស់ទីលំនៅដោយសារទឹកជំនន់ដ៏ធ្ងន់ធ្ងរដែលបង្កឡើងដោយភ្លៀង ព្យុះកាល ពីពេលថ្មីៗ។
ទឹកទន្លេ រូហ្គូមបា បានហូរហៀច្រាំង ដែលពន្លិចតំបន់ដ៏ធំដែសស្ថិតនៅលើដែនដីកាឡឺមី និងនីញូនហ្ស៊ូ និងបំផ្លាញលំនៅដ្ឋាន សាលារៀន និងផ្ទៃដីកសិកម្ម។
ពីពេលនេះតទៅ មនុស្សរាប់ពាន់នាក់ បានបាត់បង់ទីជម្រក ព្រមទាំងមធ្យោបាយទ្រទ្រង់ជីវិត។ ទឹកជំនន់ក៏បាននាំទៅជាមួយនូវផលចំការដំឡូង ពោត និងផលល្ង និងធ្វើឲ្យស្ថានភាពស្បៀងដែលខ្សត់ខ្សោយស្រាប់ហើយនៅក្នុងប្រទេសកាន់តែធ្ងន់ធ្ងរ។ ទឹកជំនន់នៅនឹង ក៏បង្កការភ័យខ្លាចសម្រាប់ជំងឺឆ្លង ដូចជាជំងឺរាគរូសដែលគេផ្តល់ដំណឹងថា មានកើតនៅក្នុងខេត្តសាធារណរដ្ឋកុងហ្គោ គឺមានចំនួន ៦ដង ខ្លាំងជាងជំងឺរាគរូសដែលកើតឡើងកាលពីឆ្នាំមុន។
កាលពីសប្តាហ៍មុន អ្នកនាំពាក្យនៃ HCR លោកស្រី អឺជីន ប៊ីយូន នៅអំឡុងសន្និសីទកាសែតនៅទីក្រុងហ្ស៉ឺណេវ បានពន្យល់ថា ៖ ”ស្ថានភាពបន្ទាន់ថ្មីនេះបង្ហាញនូវវិបត្តិទ្វេដងដែលសាធារណរដ្ឋកុងហ្គោត្រូវប្រឈមមុខ ដែលការប៉ះទង្គិចខាងឧតុនិយមគឺហួសហេតុ មានជាដូចជាទឹកជំនន់ ដែលទើបតែបន្ថែមពីលើការឈឺចាប់ដែលបណ្តាលមកពីជម្លោះដែលកំពុងប្រព្រឹត្តិទៅ និងដែលការផ្លាស់ទីលំនៅរបស់ប្រជាជនមានច្រើនយ៉ាងសម្បើម”។
ទឹកជំនន់បានវាយប្រហារលើប្រជាជនដែលកំពុងរស់នៅលំបាកស្រាប់ហើយ។ ចាប់តាំងពីខែមករា តំបន់តង់ហ្គ៉ង់យីកា នៅអាហ្វ្រិកខាងកើតបានទទួលមនុស្ស ៥០០០០នាក់ ដែលភៀសខ្លួនចេញពីអំពើហិង្សានៅខេត្ត គីវូខាងត្បូង សាធារណរដ្ឋកុងហ្គោ។ មនុស្សជាច្រើនបានរកបានទីជម្រកនៅតាមផ្ទះនានា ព្រះវិហារ និងសាលារៀន តែឥឡូវត្រូវបានធ្វើឲ្យខូចខាត និងត្រូវបានបំផ្លាញដោយទឹកជំនន់។
យោងតាមការវាយតម្លៃថ្មីៗ មនុស្ស ២,៣លាននាក់ ស្ថិតនៅខេត្តចំនួន ៤ ដែលរងផលប៉ះពាល់ដោយជម្លោះ មានខេត្ត គីវូខាងត្បូង គីវូខាងជើង អ៊ីទូរី និងខេត្តតង់ហ្គង់យីកា។ ពួកគេប្រឈមមុខនឹងស្លាប់ដោយដាច់ស្បៀងនៅប៉ុន្មានខែដែលនឹងមកដល់ ប្រសិនបើវិធានការបន្ទាន់មិនត្រូវបានរៀបចំធ្វើឡើងនោះទេ។
ទីភ្នាក់ងារអង្គការសហប្រជាជាតិសម្រាប់ជនភៀសខ្លួន និងដៃគូមនុស្សធម៌ផ្គត់ផ្គង់ជំនួយបន្ទាន់ មានជាអាទិ៍នៅក្រោមទម្រង់ជាជម្រក ទឹកស្អាត ចំណីអាហារ និងការព្យាបាលវេជ្ជសាស្រ្ត។ លោកស្រីប៊ីយូន បានបញ្ជាក់ដែរថា ៖ “ប៉ុន្តែកិច្ចខិតខំប្រឹងប្រែងនេះត្រូវបានធ្វើឲ្យរាំងស្ទះដោយសារកង្វះខាតដ៏ខ្លាំងនូវហិរញ្ញប្បទាន និងទុកឲ្យប្រជាជនរាប់ពាន់នាក់គ្មានជំនួយដែលពួកគេត្រូវការ”។
ម្យ៉ាងវិញទៀត យោងតាមព័ត៌មានចុងក្រោយដែលទទួលបាន ជនភៀសខ្លួនកុងហ្គោ ដែលថ្មីៗ បានភៀសខ្លួនទៅកាន់ប្រទេសប៊ូរុនឌីជិតខាង បានវិលត្រឡប់មកកាន់កុងហ្គោវិញ ទោះបីជាជម្លោះនៅតែកើតមាន និងបរិយាកាសនៅគ្មានសុវត្ថិភាពនៅសាធារណរដ្ឋកុងហ្គោក៏ដោយ។ ហើយកត្តាគន្លឹះដែលហៅថា លក្ខខណ្ឌនៃជីវិតដ៏លំបាក មានជាអាទិ៍ ការទទួលបានចំណីអាហារ ទីជម្រក និងសេវាកម្មមូលដ្ឋាន គឺនៅមានកម្រិតទាបខ្លាំង។
យោងតាម HCR បានឲ្យដឹងទៀតថា ជនភៀសខ្លួនកុងហ្គោបន្តឆ្លងកាត់ព្រំដែនដើម្បីភៀសខ្លួនទៅក្នុងប្រទេសជិតខាង។ មនុស្សជិត ១២០ ០០០នាក់ សព្វថ្ងៃបានមកដល់ប្រទេសប៊ូរុនឌី តង់ហ្ស៉ានី និងអ៊ូហ្គង់ដា។ ប្រទេសអ៊ូហ្គ៉ង់ដា បានទទួលជនភៀសខ្លួន ៥៥០០នាក់ កាលពីសប្តាហ៍មុន។
Daily Program
