អត្ថាធិប្បាយគម្ពីរដំណឹងល្អថ្ងៃទី២០ ខែសីហាឆ្នាំ២០២៣

អត្ថាធិប្បាយគម្ពីរដំណឹងល្អថ្ងៃទី២០ ខែសីហាឆ្នាំ២០២៣ តាមម៉ាថាយ ១៥​,២១-២៨អត្ថាធិប្បាយដោយលោកបូជាចារ្យ ប្រាក់ ប៊ុនហុង

នៅក្នុងព្រះបន្ទូលដំណឹងល្អនៅថ្ងៃនេះ យើងឃើញស្រ្តីម្នាក់ដែលជាសាសន៍កា​ណា​ន ​ហើយ​នាងមកគាល់ព្រះយេស៊ូ​ ទូលអង្វរព្រយេស៊ូសុំឱ្យព្រះយេស៊ូប្រោសកូននាងឱ្យរួច​ផុត​ពីអំណាចនៃខ្មោចដែលបានចូលនៅក្នុងខ្លួនកូនស្រីរបស់នាង បណ្ដាលឱ្យកូនស្រី​របស់នាងឈឺចុកចាប់យ៉ាងខ្លាំង។ ប៉ុន្តែព្រះយេស៊ូមិនឆ្លើយតបជាមួយនាងទេ។ ​សាវ័កនៅជិតដែលនៅជិតព្រះយេស៊ូបានលឺសំឡេងស្រ្តី​ជាជនជាតិ​កាណាន​នោះ ​គេប្រាប់ព្រះ​​អង្គថា សូមជួយនាងទៅ ពីព្រោះនាងស្រែកហើយចេះតែស្រែកពីក្រោយ​យើង ហើយព្រះអង្គប្រាប់ទៅសាវ័កវិញថា ​ព្រះជាម្ចាស់ចាត់ព្រះអង្គឱ្យ​យាង​មកនៅលើផែនដីនេះ ​គឺឱ្យស្វែងរកតែអស់ជនជាតិអ៊ីស្រាអែលដែលវង្វេង​ប៉ុណ្ណោះ។ ​​ប៉ុ​ន្តែយើងឃើញថាស្រ្តីនោះនៅតែទូលអង្វរព្រះយេស៊ូ ហើយចូលមកក្រាប​ព្រះ​​បា​ទា​ព្រះអង្គ។ នាងទូលទៅព្រះអង្គថា ព្រះអម្ចាស់អើយជួយខ្ញុំម្ចាស់ផង។ ព្រះយេស៊ូ​ក៏មានការសន្ទនាជាមួយនាង ប៉ុន្តែការសន្ទនានេះហាក់ដូចជា​មិនគួរសមសោះ ដូច​ជា​ពាក្យធ្ងន់ៗទៅលើនាង ហាក់ដូចជាមិនសមរម្យជាមួយនាងទេ។ ក៏ប៉ុន្តែនាងមិនបានខឹង​សម្បារជាមួយព្រះយេស៊ូទេ ផ្ទុយទៅវិញនាងបានស្របជាមួយព្រះយេស៊ូ។  យើង​ឃើញ​ថា​នៅ​ពេល​នោះ​ព្រះយេស៊ួបានប្រាប់ថា មិនគួរយកអាហាររបស់កូនចៅទៅឱ្យ​កូន​ឆ្កែស៊ីឡើយ។ នាងបានប្រាប់ថា នាងមិនបានខឹងទេ ហើយនាងទូលទៅព្រះអង្គវិញ​ថា ពិតមែនហើយព្រះអម្ចាស់ប៉ុន្តែកូនឆ្កែស៊ីកម្រេចអាហារដែលជ្រុះពីមាត់របស់ម្ចាស់វា​តែប៉ុណ្ណោះ។ ពេលដែលនាង​ឆ្លើយរបៀបនេះព្រះយេស៊ូហាក់ដូចជាអាណិតមេត្តាដល់​នាង​យ៉ាងខ្លាំង ដោយឃើញជំនឿរបស់នាងមាំមួន ហើយព្រះអង្គមានព្រះបន្ទូលទៅនាង​ថា ​នាងអើយនាងមានជំនឿមាំមួនណាស់ ដូច្នេះសូមឱ្យសម្រសចតាមចិត្តរបស់នាង​ប្រាថ្នាទៅចុះ។​ ព្រះអង្គគ្រាន់តែឆ្លើយតែមួយម៉ាត់ កូនរបស់នាងបានជា ខ្មោចបានចេញ​ពីកូនរបស់នាងបាត់ទៅហើយ។

អ្វីជាមេរៀនសម្រាប់​យើងជាមួយស្រ្តីកាណាននេះ គឺពាក្យទូល​អង្វរ​របស់នាង ក៏ដូចយើងទូលអង្វរព្រះជាម្ចាស់ដែរ។ នាងទូលអង្វរប៉ុន្មានលើកប៉ុន្មាន​សារ យើងក៏ទូលអង្វរព្រះយេស៊ូប៉ុណ្ណោះដែរ។ នាងមិនបានសុំអ្វីទេ គឺប្រាប់អំពី​ហេតុ​ការណ៍​​ទុក្ខលំបាករបស់កូននាងដែលខ្មោចចូល។ តើយើងសុំអ្វីពីព្រះអង្គ​​ អធិដ្ឋានអ្វី​ទៅ​ព្រះអង្គ ទៅព្រះយេស៊ូ​? តើយើងអធិដ្ឋានប៉ុន្មានដង សុំព្រះយេស៊ូឱ្យជួយយើង? តើយើងមានជំនឿដូចស្រ្តីសាសន៍កាណាននេះដែរឬទេ?​ 

មែនហើយ ជួនកាលយើងមាន​ជំនឿ ប៉ុន្តែជួនកាលយើងហាក់មិនសូវមានជំនឿ ហាក់ដូចជាយើងបោះបង់ព្រះ​ជា​ម្ចាស់ យើងហាក់ដូចជា ពេលណាយើងមានទុក្ខលំបាក យើងអធិដ្ឋានទៅព្រះជា​ម្ចាស់សុំព្រះអង្គជួយយើង តែពេលខ្លះយើងមានអំណរសប្បាយ យើងមានរបស់គ្រប់​យ៉ា​ងក្នុងជីវិតរបស់យើង ទ្រព្យសម្បត្តិ មានអំណរសប្បាយផ្សេងៗក្នុងលោកកិយនេះ យើងភ្លេចព្រះជាម្ចាស់។ ក៏ប៉ុន្តែ យើងត្រូវតែដឹងថា ព្រះជាម្ចាស់នៅតែស្វែងរក​យើង​គ្រប់ពេលវេលា។ យើងជាគ្រីស្តបរិស័ទ យើងបានទទួលពិធីជ្រមុជទឹក យើងបាន​ក្លាយ​ជាបុត្រធីតារបស់ព្រះជាម្ចាស់ ប៉ុន្តែឱ្យយើងយកគំរូតាមស្រ្តីនោះ គឺទូលអង្វរព្រះ​ជា​ម្ចាស់ដោយចិត្តសុភាពរាបសារដោយមិនខឹងសម្បារ នោះព្រះអង្គនឹងឆ្លើយតប៕