ថ្ងៃទី១៨ ខែមករា ឆ្នាំ២០២៥ អត្ថាធិប្បាយគម្ពីរម៉ាកុស ២,១៣-១៧បកស្រាយដោយ៖ លោកបូជាចារ្យ អ៊ុន សុន

ព្រះយេស៊ូបានត្រាស់ហៅលោកលេវីជាអ្នកទារពន្ធម្នាក់ឱ្យដើរតាមព្រះអង្គ។ នេះជាអំណរសប្បាយ​មួយ​ដែល​យើងបានឃើញ! ព្រះយេស៊ូត្រាស់ហៅលេវីជាអ្នកទារពន្ធម្នាក់ឱ្យដើរតាមព្រះអង្គ។ បងប្អូនតាម​ដែល​យើងបានឃើញ បានយល់អំពីជីវិតរបស់យើងនៅក្នុងសង្គមគេតែងតែជ្រើសរើសមនុស្សដែលល្អ រាប់រក រាប់​​អានគ្នា ប៉ុន្តែគេមិនសូវរាក់ទាក់ និងទទួលស្វាគមន៍មនុស្សដែលខិលខូច ឬក៏ក្រីក្រនោះទេ ផ្ទុយ​ទៅ​វិញ​ចំពោះព្រះយេស៊ូ ព្រះអង្គសព្វព្រះហឫទ័យមកជួបទាកទងរាក់ទាក់ទទួល​ទាន​អាហា​រ​​ជា​មួយ​អ្នក​ក្រី​ក្រ ជា​មួយ​ជនដែលត្រូវគេមើលងាយ នឹងត្រូវគេបោះបង់ចោលពីសង្គម។

នេះជា​សេចក្តី​មួយ​ដើម្បី​ជួយ​ឱ្យ​យើង​ទាំងអស់គ្នាឃើញថា មនុស្សម្នាក់ៗមានតម្លៃនៅក្នុងព្រះហស្ថ នៅ​ក្នុង​នេត្រា​របស់​ព្រះជា​ម្ចាស់។ ថ្ងៃដែលព្រះយេស៊ូត្រាស់ហៅលោកលេវីឱ្យដើរតាម​ព្រះអង្គ ព្រះអង្គក៏បាន​ត្រាស់​ហៅ​យើ​ងជាជនក្រីក្រ ជនមិនសូវមានចំណេះដឹង នឹងមិនសូវមានសមត្ថភាពឲ្យដើរតាមព្រះអង្គដូចគ្នា ត្បិតព្រះ​​អង្គយាងមកដើម្បីជួយណែនាំយើង ជួយបំភ្លឺយើង ជួយរំដោះយើងឱ្យរួចពីបាប ជួយ​ផ្តល់​ឱកាស​ឱ្យ​យើង​ដើម្បីឱ្យ​យើង​ទាំងអស់គ្នា បានកែប្រែ​បានផ្លាស់ប្តូរជីវិតរបស់យើងពីភាពងងឹតរបស់យើង​ទៅ​រក​ពន្លឺ​។

​​លេវីហៅថា ”ម៉ាថាយ” ដែលព្រះយេស៊ូបានត្រាស់ហៅ​នៅថ្ងៃនេះបាននាំឱ្យមនុស្សឯទៀតៗ​បាន​ស្គាល់​ព្រះយេស៊ូ​!ពីអ្នកទារពន្ធ ក្លាយជាអ្នកនិពន្ធព្រះគម្ពីរទីពីរនៅក្នុងព្រះគម្ពីរដំណឹងល្អ។ ដូច្នេះខ្ញុំពិត​ជា​មាន​​អំណរ​សប្បាយ​រីករាយដើម្បីណែនាំឱ្យបងប្អូនឃើញថា ជីវិតរបស់យើងត្រូវបានព្រះយេស៊ូត្រាស់ហៅ​គ្រប់​ៗ​​​រូប។  ខ្ញុំ​សូមជូនពរ និងសូមឱ្យបងប្អូនតាមរយៈលោកម៉ាថាយនៅថ្ងៃនេះអរព្រះគុណព្រះជាម្ចាស់ ហើយ​ក៏សុំ​ថ្វាយ​ជីវិត​របស់យើងដែលព្រះជាម្ចាស់សព្វព្រះ​ហឫទ័យមករកយើង ត្រាស់ហៅយើង​ទៅជា​សាវ័ក​របស់​ព្រះអង្គ។ អាម៉ែន៕