ថ្ងៃទី១៧ ខែមេសា ឆ្នាំ២០២៥ អត្ថបទគម្ពីរ (យ៉ូហាន១៣,១-១៥)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល

នៅថ្ងៃនេះគឺជាអត្ថបទចុងក្រោយនៃការជប់លៀងរបស់ព្រះយេស៊ូតាមសន្តយ៉ូហានព្រះយេស៊ូលាងជើងឱ្យក្រុមសាវ័ក។ សង្ឃឹមថាបងប្អូនបាន​ចូលរួមពិធីជប់លៀង​របស់ព្រះយេស៊ូ​នៅថ្ងៃ​នេះ​​នៅក្នុងព្រះសហគមន៍របស់បងប្អូន និងចូលរួមពិធីលាងជើងរបស់​លោកបូជាចារ្យ​ជាមួយ​គ្រីស្តបរិស័ទឯទៀតៗដែលជំរុញយើងឱ្យបម្រើគ្នាទៅវិញទៅមក។

ខ្ញុំចង់លើកចំណុចតែមួយពីលោកសិលា លោកមិនព្រមឱ្យគេលាងជើងរបស់គាត់ សម្រាប់​លោកសិលា និងយើងពេលខ្លះយើងចង់ឱ្យគេស្រួល ប៉ុន្តែពេលដែលគេចង់​ជួយ​យើង​យើង​បែរ​ជា​ពិបាកទទួលយការជួយនោះទៅវិញ។

ប៉ុន្តែ! ព្រះយេស៊ូមានព្រះបន្ទូលចំពោះលោកសិលាថាប្រសិនបើខ្ញុំមិនលាងជើងរបស់អ្នក អ្នក​មិន​អាចរួមជាមួយខ្ញុំទៅមុខទៀតបានទេ ដូច្នេះលោកសិលា​ថាសុំលាង​ពីក្បាលខ្ញុំម្ចាស់​ផង​មាន​ន័យ​ថាយើងត្រូវតែចេះទទួលមិនគ្រាន់តែទទួលពីគេ ប៉ុន្តែ​ត្រូវ​ចេះ​ទទួលអ្វី​ៗទាំង​អស់​ ពីព្រះជាម្ចាស់។ យើងត្រូវតែទទួលស្គាល់​ការពិត​ថាជីវិតយើងគឺមក​ពី​ព្រះជា​ម្ចាស់​ជាអ្នក​ប្រោស​​ប្រទានឱ្យ។ ខ្ញុំមានឪពុកម្តាយក្រុមគ្រួសារ ខ្ញុំមានការងារធ្វើ ខ្ញុំមានអ្វីៗទាំងអស់​គឺ​ខ្ញុំ​ទទួល​ពីព្រះជាម្ចាស់​ ប្រហែលពេលខ្លះយើងមិនព្រមទទួលយកការពិតព្រោះយើងចង់អួតខ្លួន យើងចង់ពឹងលើខ្លួនឯងដូចលោកសិលា ចង់បង្ហាញកម្លាំងកាយកម្លាំងចិត្តរបស់ខ្លួនថាខ្លាំង។​ឮ

ប៉ុន្តែពេលដែលយើងរស់ក្នុងនាមសាសនាគ្រីស្តយើងត្រូវតែរៀនបន្ទាបខ្លួនទទួលអ្វីៗទាំងអស់ពីព្រះជាម្ចាស់ដោយអរព្រះគុណព្រះអង្គ។ ព្រះជាម្ចាស់មិនចង់សង្កត់ពីលើយើងទេ ផ្ទុយទៅ​វិញពេលដែលយើងទទួលវត្តមានព្រះអង្គ យើងនឹង​មានសេរីភាព​កាន់តែ​ខ្លាំងឡើងៗ​យើង​ទៅ​ជា​មនុស្សពេញលក្ខណៈ ជាបុត្រធីតារបស់ព្រះជាម្ចាស់។

ដូច្នេះសុំកុំគិតថាព្រះជាម្ចាស់ជាដៃគូរប្រកួតប្រជែងរបស់យើង ផ្ទុយទៅវិញត្រូវពឹងផ្អែក​លើព្រះ​ជា​ម្ចាស់កាន់តែខ្លាំង កាន់តែជ្រៅ នោះយើងនឹងតែក្លាយជាបុគ្គលល្អ កាន់តែធើ្វរឿង​ដែល​ត្រឹម​ត្រូវ និងពេញលក្ខណៈ។ ដូច្នេះនៅថ្ងៃនេះជាពិធីជប់លៀងរបស់ព្រះយេស៊ូ យើងត្រូវតែ​លាង​ជើងឱ្យគេទៅវិញទៅមក និងស្រឡាញ់គ្នាទៅវិញទៅមក ហើយយកព្រះជាម្ចាស់ជាទីពឹង៕