ថ្ងៃទី១៣ ខែមីនា ឆ្នាំ២០២៥អត្ថបទគម្ពីរ (ម៉ាថាយ ៧,៧-១២) អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល

បាទបងប្អូនជាទីស្រឡាញ់! យើងស្គាល់អត្ថបទដំណឹងល្អនៅថ្ងៃនេះ ព្រះយេស៊ូលើកទឹក​ចិត្តឱ្យសាវ័ក​របស់​ព្រះអង្គទូលអង្វរព្រះជាម្ចាស់។ ប្រហែលជាពេលខ្លះយើងមានអារម្មណ៍ថា ព្រះជាម្ចាស់មិនស្តាប់ពាក្យ​ទូលអង្វររបស់យើង ដូចជាព្រះជាម្ចាស់ឃ្លាតឆ្ងាយពីយើងមិន សូវរវីរវល់នឹងការអធិដ្ឋានរបស់យើង តាម ពិតមិនមែនទេ ព្រះជាម្ចាស់តែងតែឮពាក្យទូលអង្វរប្រជារាស្រ្តរបស់ព្រះអង្គ។

ទ្រង់តែងតែស្តាប់នឹងឆ្លើយតបពាក្យទូលអង្វររបស់យើង ប៉ុន្តែពេលខ្លះ​ប្រហែលជាយើង​វិញទេដែលធើ្វ​ជា​មិន​ដឹង ឬមើលមិនឃើញការឆ្លើយតបរបស់ព្រះជាម្ចាស់ ត្បិតយើងតែមាន​ផ្នត់គំនិតអវិជ្ជមាន ហើយខ្លួ​នយើង​ផ្ទាល់ក៏តែងរក្សាផ្នត់គំនិតនោះជាប់​ ជាហេតុដែលធើ្វឲ្យភ្នែករបស់យើងមិនព្រមភ្លឺឡើង។

នៅក្នុងអ​ត្ថ​បទដំ​ណឹងល្អយើងឃើញថា ព្រះយេ​ស៊ូលើកទឹកចិត្តឱ្យក្រុមសាវ័ក ដោយព្រះអង្គ​តែង​មាន​ព្រះបន្ទូលថា បើអ្នករាល់គ្នាចង់ឲ្យអ្នកដទៃប្រព្រឹត្តចំពោះខ្លួនបែបណា​ សូមធើ្វទង្វើនោះចំពោះគេ!  ចូល​ធ្វើ​សម្រាប់​គេមានន័យថាប្រសិនបើយើងចង់ឱ្យព្រះជាម្ចាស់ឆ្លើយតបតាមបំណងចិត្តរបស់យើង យើងត្រូវតែ​ធ្វើតាម​ព្រះហឫទ័យរបស់ព្រះជាម្ចាស់គឺស្រឡាញ់អ្នកដទៃ យើង​ត្រូវតែធ្វើគ្រប់បែបយ៉ាង​ដើម្បីស្រឡាញ់​អ្នក​ដទៃ។ ពេលនោះយើងនឹង​ទៅជា​មនុស្សដែលគាប់​ព្រះហឫទ័យ​ព្រះជា​ម្ចាស់ ហើយ​ព្រះជា​ម្ចាស់​នឹង​ឆ្លើយតប ប៉ុន្តែប្រសិនជា​ខ្ញុំធ្វើ​តាមចិត្តខ្លួនឯងមិនចង់ស្រឡាញ់អ្នកដទៃ នៅតែប្រកាន់ទោសរបស់គេ មិន​ព្រមលើកលែងទោសឱ្យគេឬធ្វើបាបគេ ​ទោះបីខ្ញុំទូលអង្វរព្រះជាម្ចាស់​ទាំងយប់ទាំង​ថ្ងៃក៏ដោយ​ច្បាស់​ណាស់​​​​ព្រះជាម្ចាស់មិនធ្វើតាមបំណងរបស់ខ្ញុំទេ។

ដូច្នេះយើងត្រូវតែមានអាកប្បកិរិយាត្រឹមត្រូវ និងព្យាយាមអ្វីដែល​គាប់ព្រះហឫទ័យ​ព្រះជាម្ចាស់​មុន​ពេល​ព្រះអង្គឆ្លើយតបមកខ្ញុំ។ អាទិត្យទីពីរនៃរដូវអប់រំពិសេសសុំបង​ប្អូនតស៊ូព្យា​យាម​ទុកឱ្យព្រះយេស៊ូ ទុក​ឱ្យ​ព្រះ​វិញ្ញាណដ៏វិសុទ្ធណែនាំយើង គឺណែនាំ​យើងឱ្យ​ស្រឡាញ់​ព្រះជាម្ចាស់ និងអ្នកដទៃកាន់តែខ្លាំងឡើងៗ។

​ជាគោល​ដៅសំខាន់នៃរដូវអប់រំពិសេស​ឱ្យយើងមា​នចិត្ត​ទូលាយ មាន​សិរីភាពក្នុងការស្រឡាញ់ព្រះជាម្ចាស់ និងស្រឡាញ់អ្នកដទៃនោះយើងនឹងមានសេចក្តីសុខសាន្តយ៉ាងពិតប្រាកដ។ អាមែន