ថ្ងៃទី០៦ ខែកក្កដា ឆ្នាំ២០២៥អត្ថបទគម្ពីរ (លូកា ១០,១-១២.១៧-២០)អត្ថាធិប្បាយគម្ពីរដោយ៖ លោកបូជាចារ្យ គង់ វៀល

ជម្រាបសួរបងប្អូនទាំងអស់គ្នា! ថ្ងៃអាទិត្យនេះខ្ញុំសង្ឃឹមថាបងប្អូនអាចទៅព្រះវិហារបាន រដូវវស្សានៅ​ប្រ​ទេស​ខ្មែរមិនសូវស្រួលប៉ុន្មានទេគឺភ្លៀងរហូត ប៉ុន្តែយើងត្រូវតែមានចិត្តក្លាហានទៅព្រះវិហារ ​ពេល​ដែល​​យើងទៅព្រះវិហារ គឺយើងគោរពថ្ងៃអាទិត្យជាថ្ងៃ​របស់ព្រះជាម្ចាស់ដូច្នេះ​ត្រូវតែទទួល​ព្រះព​រ​យ៉ា​ង​​ច្រើន​ពី​ព្រះ​ជាម្ចាស់! ជាពិសេសយើងទទួលព្រះកាយរបស់ព្រះអង្គមួយអាទិត្យម្តងជាដើម្បីចិញ្ចឹមជីវិត។

រដូវវស្សាយើងឃើញពណ៌បៃតងហើយអាទិត្យហ្នឹង​លោកបូជាចារ្យ​ពាក្យ​អាវពណ៌បៃតងដែរ ជាថ្ងៃ​អាទិ​ត្យ​ ​​ទី​១៤ក្នុងរដូវធម្មតាជារដូវធម្មតាក៏អស្ចារ្យដែរសម្រាប់គ្រីស្តបរិស័ទ។ ក្នុងរដូវធម្មតាក៏​យើងទទួល​ព្រះ​កាយ ទទួលព្រះគ្រីស្ត នឹងទទួលវត្តមានរបស់ព្រះអង្គឲ្យគង់​នៅជាមួយយើងនេះជា​រឿងមួយ​ដែល​អស្ចារ្យ​​​នៅ​ពេល​ដែលយើងទទួលព្រះយេស៊ូគ្រីស្តនៅក្នុងជីវិតរបស់យើងផ្ទាល់។

នៅក្នុងអត្ថបទថ្ងៃនេះអ្វីដែលគួរឱ្យចាប់អារម្មណ៍ បងប្អូនធ្លាប់ឮ​ថាព្រះជាម្ចាស់​ផ្ញើគ្រីស្តទូត​ដើម្បីផ្សព្វ​ផ្សាយ​ដំណឹងល្អ ប៉ុន្តែថ្ងៃនឹងអ្វីដែលយើងឃើញមិនមែនតែ១២នាក់គឺ៧២នាក់។ គ្រីស្តទូត៧២នាក់បាន​ទទួល​បេស​កកម្មមួយដ៏សំខាន់ដើម្បីច្រូតស្រែរបស់ព្រះអង្គនេះជារឿងដែលអស្ចារ្យ! តែអ្វីដែល​ខ្ញុំកត់សម្គាល់​នៅ​ពេលដែលខ្ញុំ​ធ្វើដំណើរ​ទៅ​ណា​មកណាឃើញមានស្រូវច្រើន ប៉ុន្តែអ្នកច្រូតស្រូវកាន់តែតិច។ អ្វីទាំងនេះ​ធ្វើ​ឱ្យខ្ញុំគិតថា ព្រះសហគមន៍នៅប្រទេសខ្មែរមានអ្នកផ្សព្វផ្សាយដំណឹងល្អតិចណាស់។

បងប្អូនទាំងអស់​គ្នា! ​សូមឆ្លើយតបនឹងការត្រាស់ហៅរបស់ព្រះជាម្ចាស់ឱ្យ​បងប្អូនជួយធ្វើការនៅ​ក្នុងចម្ការ​​របស់ព្រះអង្គ។ នៅក្នុងចម្ការរបស់ព្រះអង្គយើងត្រូវការមនុស្សច្រើន ដោយសារនៅប្រទេសខ្មែរមាន​មនុស្ស​តិច​ពេកដែលស្គាល់ពីសេចក្តីស្រឡាញ់របស់ព្រះជាម្ចាស់។ នៅពេលដែលយើងឆ្លើយតបនឹង​ការត្រាស់​ហៅ​របស់​ព្រះជាម្ចាស់ នៅពេលដែលយើងមានចិត្តក្លាហាន មានចិត្តឆេះឆួលចំពោះដំណឹងល្អ ​នៅពេលនោះ​យើង​នឹងជួយផ្សព្វផ្សាយដំណឹងល្អ។

ការងាររបស់យើងនឹងកើតផលដោយ​សារតែព្រះ​អង្គប្រទាន​ឱ្យ​យើង ព្រះអង្គផ្គត់ផ្គង់ឱ្យយើង នូវធម៌មេត្តា​ករុ​ណា ការប្រណីសន្តោស ឱ្យយើងមានកម្លាំង ឱ្យយើង​មាន​ក្តី​ស្រឡាញ់ ឱ្យយើងមានសេចក្តីសង្ឃឹម ដើម្បី​បំពេញបេសកកម្មរបស់​ព្រះអង្គមិនមែនតែ​លោកបូជា​ចារ្យ​ទេ តែសាវ័ក១២អង្គដែលជា​គ្រីស្ត​ទូត​របស់​ព្រះអង្គទេ។

៧២នាក់ដែលជាសាវ័ករបស់ព្រះអង្គគឺអស់បងប្អូនដែលបានទទួលអគ្គសញ្ញាជ្រមុជទឹកត្រូវតែក្លាយទៅជាអ្នកផ្សព្វផ្សាយដំណឹងល្អ​​ និងជាអ្នកជួយបម្រើព្រះសហគមន៍ ជួយធ្វើការនៅក្នុងចម្ការរបស់ព្រះអង្គ នេះ​ជាអំណរសប្បាយរបស់យើង។ ចូរបងប្អូនមានអំណរសប្បាយនៅក្នុងរដូវធម្មតា។ យើងរំភើបខ្លាំងដោយ​សា​​រយើងបានទទួល​បេសកកម្ម​មួយ​ដែ​ល​​ធ្វើឱ្យយើងមានចិត្តរីករាយ ហើយចង់បម្រើព្រះអង្គដោយ​ចិត្ត​ស្រឡាញ់ ចិត្តរីករាយ! សំ​ខាន់​ជាង​គេ​​គឺយើងចង់បម្រើព្រះអង្គដោយចិត្ត​សប្បុរសដោយ​សារព្រះអង្គ​បាន​ផ្គត់​ផ្គង់​ឱ្យយើង។

ចូរឱ្យយើងចេះចែករំលែងជាមួយបងប្អូនដែលខ្វះខាត ជាពិសេសបងប្អូនដែលខ្វះក្តីស្រឡាញ់ និង​អំណរ​សប្បាយ​ដែលមកពីព្រះជាម្ចាស់។ សូមព្រះអង្គប្រទានពរដ៏ព្រះរាជណាចក្រកម្ពុជាឱ្យ​យើងមាន​សុខ​សន្តិ​ភាព ឱ្យយើងមានអ្នកផ្សព្វផ្សាយដំណឹងល្អកាន់តែច្រើនឡើងៗ។ អរគុណបងប្អូន សូមអរព្រះគុណ​ព្រះជា​ម្ចាស់​៕