ថ្ងៃទី០៥ ខែកញ្ញា ឆ្នាំ២០២៥អត្ថបទគម្ពីរ (លូកា ៥,៣៣-៣៩)អត្ថាធិប្បាយគម្ពីរដោយ៖ លោកបូជាចារ្យ ផាន បូរី
ខ្ញុំមានចំនុចខ្លះៗដែលចង់ចែកជាមួយបងប្អូននៅក្នុងអត្ថបទព្រះគម្ពីរដំណឹងល្អថ្ងៃនេះ ព្រះយេស៊ូវបានយាងចូលទៅក្នុងទូករបស់ សន្តសិលា ដោយសារសន្តសិលា គាត់នេសាទត្រីអត់បានសោះ ពេញមួយយប់ប៉ុន្តែ ព្រះយេស៊ូវបានយាងចូលទៅក្នុងទូកនឹងបង្គាប់ឲ្យលោកសិលាចេញទូកទៅនេសាទម្តងទៀត។ យើងឃើញថាទោះបីលោកសិលាហត់នឿយពេញមួយយប់ក្នុងការនេសាទត្រីមិនបានក៏ដោយ ក៏លោកនៅតែស្តាប់បង្គាប់ព្រះយេស៊ូហើយសុខចិត្តទៅម្តងទៀត។
ពេលណាគេទៅ គេទម្លាក់អួនចុះ បន្ទាប់មកគេនេសាទត្រីបានច្រើន នាំឲ្យលោកសិលា និងក្រុមសាវ័កឯទៀតៗភ្ញាក់ផ្អើលយ៉ាងខ្លាំង រួចគេចង់ឲ្យព្រះយេស៊ូចេញពីគេ ដោយសារគេគិតថាគេជាមនុស្សមានបាប។ គេយល់ព្រមទទួលស្គាល់ពិតមែន ព្រះយេស៊ូគឺជាព្រះមេស្ស៊ី ព្រះយេស៊ូគឺជាព្រះគ្រីស្តពីព្រោះមនុស្សធម្មតាមិនអាចធ្វើការអស្ចារ្យដូចនេះបានទេ។
បងប្អូនជាទីស្រឡាញ់ បងប្អូនជាទីគោរពរាប់អាន ព្រះយេស៊ូយាងចូលទៅក្នុងទូកជាមួយក្រុមសាវ័ក និងលោកសិលា មានន័យថាព្រះអង្គបានយាងចូលទៅក្នុងព្រះសហគមន៍ ហើយព្រះអង្គសូមឲ្យព្រះសហគមន៍ចេះនេសាទ។ នេសាទ! មិនមែនជានេសាទត្រីដូចលោកសិលា គឺព្រះយេស៊ូចង់ចាត់ឲ្យយើងទៅនេសាទមនុស្ស ប្រមូលបងប្អូនដែលបាក់បែកខ្ចាត់ខ្ចាយ មិនអត់ស្គាល់ព្រះជាម្ចាស់! ឲ្យមកស្គាល់ព្រះជាម្ចាស់វិញ ឲ្យមកជានាជាមួយនឹងព្រះជាម្ចាស់វិញ។
“ទូក” គឺជាព្រះសហគមន៍ ព្រះយេស៊ូយាងចូលក្នុងព្រះសហគមន៍ ព្រះយេស៊ូលើកទឹកចិត្តអស់បងប្អូននៅក្នុងព្រះសហគមន៍ ឲ្យបងប្អូនមាន សេចក្តីសង្ឃឹម មានសេចក្តីស្រឡាញ់ មានភាពអត់ធ្មត់នៅក្នុងជីវិតប្រចាំថ្ងៃរបស់ខ្លួន។ ទោះបីមានពេលខ្លះយើងជួបទុក្ខលំបាក យើងខ្វះម្ហូបអាហារ យើងខ្វះសម្លៀកបំពាក់ យើងខ្វះការលើកទឹកចិត្ត យើងអស់សេចក្តីសង្ឃឹម ក៏ទ្រង់បានយាងចូលក្នុងព្រះសហគមន៍ គឺក្នុងជីវិតរបស់យើងម្នាក់។ ទ្រង់បានលើកយើងឡើងឲ្យយើងមានកិត្តិយស រួមជាមួយព្រះអង្គ និងឲ្យយើងអាចចូលទៅក្នុងសង្គមរបស់ព្រះអង្គវិញបាន។
បងប្អូនជាទីស្រឡាញ់! គំរូឬបទពិសោធន៍របស់សន្តសិលា គឺជាបទពិសោធន៍របស់យើង ចូរយើងទទួលស្គាល់ថា ពិតមែន! ពេលខ្លះយើងអស់សង្ឃឹមក្នុងជីវិតពិបាកក្នុងការធើ្វដំណើរ ក៏ប៉ុន្តែពេលណាយើងមានព្រះយេស៊ូ គឺយើងត្រូវតែមានសេចក្តីសង្ឃឹម! ពេលណាយើងមានព្រះយេស៊ូជីវិតរបស់យើងនៅតែមានតម្លៃ ព្រះអង្គផ្តល់តម្លៃឲ្យយើងដ៏ថ្លៃថ្នូរជាងមនុស្សឯទៀតៗទាំងអស់។ ទោះបីអ្នកណាមិនឲ្យតម្លៃយើង ព្រះយេស៊ូឲ្យតម្លៃយើង ទោះបីគេមើលងាយយើង តែកុំឲ្យយើងខ្លួនឯងមើលងាយខ្លួនឯង។
បងប្អូនជាទីគោរពរាប់អាន! សន្តីតេរេសានៅទីក្រុងកាល់គូតាដែលយើងស្គាល់ថាជាអ្នកម្តាយតេរេសា គាត់បានចំណាយពេលមួយជីវិតរបស់គាត់ដើម្បីអ្នកក្រីក្រ អ្នកជំងឺ និងអស់បងប្អូនដែលអត់មានសេចក្តីសង្ឃឹម ប្រជាជនដែលខ្វះខាត ក្មេងកំព្រា ក្មេងដែលមានស្មារតីមិនគ្រប់ សម្រាប់កិច្ចការទាំងនោះអ្នកម្តាយ តេរេសាបានបំពេញបេសកកម្មរបស់ព្រះជាម្ចាស់ជាពិសេសនៅក្នុងព្រះសហគមន៍របស់ព្រះអង្គ។
នេះតោងឲ្យដឹងថា ចូរយើងទូលអង្វរព្រះជាម្ចាស់ ទុកចិត្តលើព្រះជាម្ចាស់ ចូរមានសេចក្តីសង្ឃឹមថា ព្រះយេស៊ូគង់នៅជាមួយយើង។ ហើយសូមឲ្យបងប្អូនបើកដួងចិត្តនៃផ្ទះរបស់យើង នៃទូករបស់យើង សូមព្រះអង្គយាងចូលមក ដើម្បីឲ្យជីវិតរបស់យើងផ្លាស់ប្រែ ដើម្បីឲ្យជីវិតរបស់យើងមានសេចក្តីសង្ឃឹម ដើម្បីឲ្យជីវិតរបស់យើងមាន អំណរសប្បាយ ឡើងវិញផងដែរ។ អាម៉ែន៕
Daily Program
