ថ្ងៃទី០៥ ខែកក្កដា ឆ្នាំ២០២៥អត្ថបទគម្ពីរ (ម៉ាថាយ ៩,១៤-១៧)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

ព្រះបន្ទូលថ្ងៃនេះព្រះយេស៊ូចង់បង្រៀន ចង់ណែនាំយើង ចង់អប់រំ អំពីសិស្សដែលមិនធំជាងគ្រូ ហើយអ្ន​ក​​បម្រើក៏មិនធំជាងគ្រូដែរ។ ដោយព្រះបន្ទូលនេះព្រះអង្គចង់បង្រៀនយើងឲ្យចេះមើលឲ្យវែងឆ្ងាយ ឲ្យ​យើ​ង​មើល​ទៅព្រះជាម្ចាស់ មិនមែនមើលខ្លួនឯងតាមអារម្មណ៍ ឬគំនិតរបស់ខ្លួនទេ ប៉ុន្តែមើលការទំនាក់ទំនង មើលប្រភពនៃជីវិតដែលមកពីព្រះជាម្ចាស់។

ហេតុនេះហើយបានជាព្រះយេស៊ូបានមកគង់ជាមួយយើង មកធ្វើដំណើរនៅក្នុងជីវិតរបស់យើង​ តើ​មាន​អ្វីដែលនាំឱ្យយើងមានការភ័យខ្លាច? តើមានអ្វីដែលនាំឱ្យយើង​មានឧបសគ្គ? ឧបសគ្គមានទុក្ខលំបា​ក​មាននៅពេលណាដែលយើងយកគំនិត យើងភ្លេចសេចក្តីស្រឡាញ់ យើងភ្លេចការលើកលែងទោស នៅ​​ពេលណាដែលយើងមានជម្លោះនឹងគ្នា នៅពេលដែលយើងមិនចេះសន្ទនា ដោយសន្តិវិធីទេ​គឺ​នៅពេល​នោះ​ហើយយើងនឹងមានទុក្ខវេទនា យើងនឹងមានការលំបាកពេលដែលយើងចង់ឈ្នះរៀងៗខ្លួន។

ព្រះយេស៊ូបានអប់រំយើងឲ្យមានចិត្តអាណិតអាសូរ មានចិត្តមេត្តាករុណាចេះលើកលែងទោស។ ដូច្នេះកា​​រ​ចេះស្រឡាញ់ ការចេះអាណិតមេត្តាជាសេចក្តីមួយដែលធ្វើឱ្យមនុស្សយើងទទួលដឹងថា ខ្ញុំក៏មានកំហុស ខ្ញុំក៏មានភាពទន់ខ្សោយ។ ប្រសិនបើយើងប្រើប្រាជ្ញាដើម្បខ្សែលើអ្នកដទៃ ដើម្បីវិនិច្ឆ័យដាក់ទោស​លើ​អ្នក​ដទៃ ពេលនោះហើយដែលយើងបម្រើមារ និងព្រះយេស៊ូមិនណែនាំឱ្យយើងធ្វើដូច្នេះទេ។

ព្រះអង្គណែនាំឱ្យយើងចេះមើលឃើញបងប្អូនឯទៀតៗជាមិត្តសម្លាញ់ ផ្ទុយពីមើលគ្នាជាសត្រូវ។ ដូច្នេះ​ពេល​ណាយើងទទួលស្តាប់ព្រះបន្ទូលដែលព្រះអង្គបានបង្រៀន បានអប់រំយើងធ្វើឱ្យយើង​ទៅជាអ្នក​នាំ​​ដំណឹងល្អ ធ្វើឱ្យយើងនាំការសង្គ្រោះ គឺនាំសេចក្តីស្រឡាញ់ដល់បងប្អូនឯទៀតៗ។ ខ្ញុំពិតជាអរគុណ​ដែល​ព្រះជាម្ចាស់បានត្រាស់ហៅគ្រីស្តបរិស័ទ និងបានត្រាស់ហៅយើងទាំងអស់ឱ្យធ្វើជាបងប្អូននឹងគ្នា និង​ធ្វើ​​ជា​គ្រួសារដើម្បីឱ្យយើងចេះរស់នៅជាមួយគ្នា។

ដូច្នេះពេលវេលាដែលលំបាកដែលយើងបានដឹងបានឃើញបញ្ជាក់ថា ជម្លោះមិនបា​នផ្តល់​សេចក្តី​សុខ​ទេ! ផ្ទុយទៅវិញវាផ្តល់នៅមហន្តរាយ។ ដូច្នេះសូមព្រះវិញ្ញាណដ៏វិសុទ្ធជួបបំភ្លឺ ជួយណែនាំយើង​ឲ្យ​យើង​បើកចិត្តគំនិតរបស់យើង ដើម្បីឱ្យចាកពីការល្បួងទាំងឡាយដែលអាចឲ្យយើងធ្វើសង្គ្រាមដាក់គ្នា។ សូម​ព្រះ​ជាម្ចាស់ប្រទានពរ ប្រទានសេចក្តីសុខសាន្ត ជម្រះភាពសៅម៉្មងនៅក្នុងចិត្តរបស់យើង ដើម្បី​ឱ្យ​យើង​មានសេចក្តីស្រឡាញ់ក្នុងការគោរពកោតខ្លាចគ្នាដូចយើងកោតខ្លាចព្រះជាម្ចាស់ដែរ។ អាម៉ែន៕