ថ្ងៃទី០៣ ខែកក្កដា ឆ្នាំ២០២៥ អត្ថបទគម្ពីរ (យ៉ូហាន ២០,២៤-២៩)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល

ជម្រាបសួរបងប្អូនជាទីស្រឡាញ់! នៅថ្ងៃនេះជាថ្ងៃទី០៣ ខែកក្កដា គឺជាបុណ្យសន្តថូម៉ាសជាគ្រីស្តទូត។ យើងស្គាល់សន្តថូម៉ាសច្បាស់ហើយថាគាត់ចង់ឃើញ​ព្រះយេស៊ូមានព្រះជន្មរស់​ឡើងវិញ​ដើម្បី​ជឿ។  តាម​រយៈ​សន្តថូម៉ាសយើងអាចយល់ថាអ្វីទៅជាជំនឿ? ជំនឿអាចធ្វើឱ្យយើងស្គាល់ព្រះជាម្ចាស់! ដោយ​សារ​តែជំនឿ យើងដូចជារួមរស់ជាមួយព្រះអង្គ នៅក្នុងលោកនេះ។ ប៉ុន្តែធ្វើយ៉ាងម៉េចដើម្បីជឿ? ប្រសិន​បើយើងមើលព្រះជាម្ចាស់មិនឃើញ ដោយសារគ្មាននរណាបានឃើញព្រះអង្គ​ក្រៅពីព្រះយេស៊ូ។ ប្រហែ​ល​សព្វថ្ងៃអាចមានទីសម្គាល់ និងចំណុចផ្សេងៗដែលជួយឱ្យយើងអាចជឿបាន និងអាចផ្ញើជីវិតទាំង​ស្រុង​ទៅ​លើព្រះជាម្ចាស់ និងព្រះសហគមន៍។

ព្រះសហគមន៍! គឺជាទីសម្គាល់តូចមួយដែលបង្ហាញថាព្រះជាម្ចាស់មានជីវិតរស់ឡើងវិញពិតប្រាកដមែន! របៀបដែលគ្រីស្តបរិស័ទព្យាយាមលើកលែងទោសឱ្យគ្នាទៅវិញទៅមក និងព្យាយាមចែក​ទ្រព្យសម្បត្តិ​ដល់​អ្នកដទៃ ដែលបង្ហាញថាមានព្រះជាម្ចាស់ពិតប្រាកដមែន ជាព្រះអង្គដែលពោរពេញដោយធម៌មេត្តាករុណា និងសេចក្តីស្រឡាញ់។

ដូច្នេះយើងមានទីសម្គាល់ដ៏តូចមួយ គឺព្រះសហគមន៍ដែលជួយឱ្យយើងជឿ ទោះបីយើងមើលព្រះអង្គមិន​ឃើញ​ក៏ដោយ។ ជំនឿជាព្រះអំណោយទានរបស់ព្រះជាម្ចាស់ ជាអ្វីដែល​យើងត្រូវតែខិតខំស្វែង​រកព្រះ​ជា​ម្ចាស់ យើងត្រូវតែមានចិត្តទូលាយ ដើម្បីទទួលព្រះអំណោយទានរបស់ព្រះអង្គ។ ប្រសិនបើយើងខ្ចិល មិន​រ​​វល់ប្រហែលជាយើងមិនអាចទទួលព្រះអំណោយទានដ៏អស្ចារ្យដែលជាជំនឿ ធ្វើឱ្យយើង​ទទួលការ​សង្គ្រោះ​​។ សុំបងប្អូនស្វែងរកព្រះជាម្ចាស់ បើកចិត្តឱ្យទូលាយ ហើយមើលឃើញ​ទីសម្គាល់​ផ្សេង​ៗ​តាម​រយៈ​ព្រះ​សហគមន៍ និងទីសម្គាល់ផ្សេងៗដែរនៅក្នុងជីវិតរបស់យើង ដែលបង្ហាញពីវត្តមានរបស់ព្រះ​​ជា​ម្ចាស់​៕