ថ្ងៃទី០១ ខែមករា ឆ្នាំ២០២៦ អត្ថបទគម្ពីរ (លូកា ២,១៦-២១)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល
ថ្ងៃនេះគឺជាបុណ្យព្រះនាងម៉ារី ដូច្នេះយើងថ្វាយឆ្នាំសកលថ្មីទៅព្រះនាងម៉ារីជាមាតារបស់ព្រះអម្ចាស់ និងជាម្ដាយរបស់យើង។ យើងសង្ឃឹមថា ឆ្នាំថ្មីនេះនឹងមានសេចក្តីសុខសាន្ត សុភមង្គលរួមជាមួយគ្នានៅក្នុងគ្រួសារ ព្រះសហគមន៍ នឹងពិភពលោកទាំងមូលផងដែរ។ យើងថ្វាយអ្វីៗទាំងអស់ ទាំងមនុស្ស សត្វ និងរុក្ខជាតិនៅក្នុងពិភពលោកនេះទៅព្រះនាងម៉ារី ដោយសង្ឃឹមថានឹងមានសន្តិភាពទាំងចិត្ត និងកាយ។
អត្ថបទដំណឹងល្អថ្ងៃនេះ និយាយពីព្រះនាងម៉ារីប្រសូតព្រះយេស៊ូនៅក្នុងស្នូកសត្វ ហើយមានពួកគង្វាល មកលេងព្រះយេស៊ូ ប្រហែល! ព្រះនាងម៉ារីឆ្ងល់ ព្រោះមានពួកគង្វាល និងអ្នកភូមិជាច្រើនបានមក ព្រះនាងម៉ារីឃើញហេតុការណ៍ទាំងអស់នោះ ហើយរិះគិតនៅក្នុងចិត្ត។ ត្រង់នេះខ្ញុំចង់ឲ្យបងប្អូន ទុកពេលវេលាមួយសម្រាប់ខ្លួនឯងរិះគិតពិចារណាពីឆ្នាំ២០២៥កន្លងទៅ រំលឹកអំពីហេតុការណ៍ទាំងប៉ុន្មានដែលបានកើតឡើងនៅក្នុងជីវិតរបស់បងប្អូន ទាំងល្អនិងអាក្រក់។ សូមបងប្អូនគិតដល់វត្តមានរបស់ព្រះអម្ចាស់ តើឆ្នាំ២០២៥ព្រះអង្គគង់នៅឯណា? តើព្រះអម្ចាស់មានព្រះបន្ទូលមកខ្ញុំយ៉ាងដូចម្តេច? យើងរំលឹកពីអតីតកាល ដើម្បីរៀបចំអនាគត រួមជាមួយព្រះអម្ចាស់ ដូចព្រះនាងម៉ារី នឹកដល់ហេតុការណ៍មុន និងក្រោយព្រះនាងទទួលពាក្យពីព្រះជាម្ចាស់។
ដូច្នេះ សូមទុកពេលវេលានៅម្នាក់ឯង ពីរ ឬបីនាក់ ប៉ុន្តែ! ម្នាក់ឯងល្អជាង ដើម្បីឲ្យព្រះវិញ្ញាណដ៏វិសុទ្ធជួយបំភ្លឺចិត្តគំនិតរបស់យើង ពីសកម្មភាពកន្លងទៅ តើយើងបានធ្វើទង្វើល្អ និងកំហុសឆ្គងអ្វីខ្លះ? ហើយមានអ្វីខ្លះដែលយើងបានទទួលពីអ្នកដទៃ ពីព្រះសហគមន៍ ពីព្រះអម្ចាស់? នេះជាពេលវេលាមួយដ៏ល្អជួយឲ្យយើងមានទំនាក់ទំនងជិតស្និទ្ធ ស្គាល់ព្រះអម្ចាស់កាន់តែច្បាស់ដើម្បីទៅមុខរួមជាមួយព្រះអង្គ និងអ្នកដទៃ។ អាម៉ែន
Daily Program
