បើចង់ជួយឲ្យភ្ញៀវទេសចរចាប់អារម្មណ៍ពីកម្ពុជា យើងជាលរដ្ឋត្រូវជួយ

បើចង់ជួយឲ្យភ្ញៀវទេសចរបរទេសវិលត្រឡប់ហើយកាន់តែចាប់អារម្មណ៍នៅក្នុងដំណើរកំសាន្តមកកម្ពុជាកាន់តែច្រើន យើងទាំងអស់គ្នាគួរតែចូលរួមជួយគ្នាទាំងអស់គ្នា​ ពីព្រោះនៅពេលនេះ យើងមានធនធានច្រើនដែលយើងអាចជួយបាន។

សម័យមុនយើងមានបញ្ហាច្រើនតាំងពីសង្រ្គាម គ្មានផ្លូវគមនាគមន៍ ទៅណាមកណាដេកផ្លូវ គ្មានហេដ្ឋារចនាសម្ព័ន្ធរូបវ័ន្តគ្រប់គ្រាន់ ដោយរួមទាំងសេវាកម្មសមរម្យទទួលភ្ញៀវ ប៉ុន្តែពេលនេះ​យើងមានភាគច្រើន តែហេតុអ្វីបានជាយើងមិនជួយគ្នា។

សង្រ្គាមលែងមាន សន្តិសុខក៏ពង្រឹង ផ្លូវគមនាគមន៍ក៏មានខ្វាត់ខ្វែង ហើយសណ្ឋាគារ ភោជនីដ្ឋាន ក៏ដូចជាសេវាកម្ម រួមទាំងសមត្ថភាពបដិសណ្ឋារកិច្ចនៅក្នុងប្រទេសយើងក៏មានសំបូរបែ​ប និងមានការទទួលខុសត្រូវ ដូច្នេះយើងគិតថា វាគឺជាសក្តានុពលមួយ ដែលយើងត្រូវតែ​ជំនះកា​រលំបាកនានាអោយបាន។

នៅពេលសព្វថ្ងៃនេះ និយាយអំពីធនធានគឺយើងមិនខ្វះនឹងផ្តល់អោយភ្ញៀវទេសចរនូវជម្រើសជា​ច្រើន ប៉ុន្តែទោះត្រង់ថា យើងម្នាក់ៗមិនចូលរួមទាល់តែសោះ ។​ នៅលើបណ្តាញសង្គម អ្នកខ្លះមិនមែនមិនត្រឹមតែរិះគិតស្ថាបនាទេ គឺរិះគន់ដល់ថ្នាក់ជាន់ពន្លិច ដោយមើលមកសង្គមខ្មែរយើ​ងគ្មានចំណុចល្អ ខណៈដែលមកដល់ពេលនេះ ជីវភាពនិងកម្រិតស្ថានភាពរស់នៅ ព្រមទាំងស្តង់ដាជីវភាពកាន់តែប្រសើរ។

ការដែលយើងចេះតែនាំគ្នានិយាយអាក្រក់នេះហើយដែលជាបច្ច័យអវិជ្ជមានមួយ ដែលនាំអោយបរទេសមើលឃើញនិងអាចយល់ច្រឡំពីកម្ពុជា ។

ឧទាហរណ៍នៅក្នុងករណីយើងចង់អោយភ្ញៀវមកលេងផ្ទះយើង​ ហើយចង់អោយគេស្គាល់យើ​ង តែបើយើងនៅក្នុងផ្ទះមិនត្រូវគ្នា ចេះតែនិយាយបង្កាច់បង្ខូចតែពីគ្នា​ឯងតើឲ្យភ្ញៀវគេមកលេ​ង​ផ្ទះហើយម៉េចកើត ។

វិស័យទេសចរណ៍ក៏ដូចគ្នា! សាកយើងទាំងអស់គ្នាស្រុះស្រួលគ្នានិយាយតែអំពីចំណុចល្អ និ​យាយតែចំណុចស្រស់ស្អាត កន្លែងទាក់ទាញ  ពោលយើងព្យាយាមបង្ហាញអំពីស្ថានភាពល្អនៅក្នុងស្រុកយើង នោះភ្ញៀវទេសចរនឹងចាប់អារម្មណ៍ពីយើងមិនខាន។

សូមកុំគិតថា យើងសរសេរយើងនិយាយជាភាសាយើងនូវអ្វីដែលអាក្រក់ ភ្ញៀវទេសចរគេមិនដឹងណា ពីព្រោះនៅលើបណ្តាញសង្គមឥឡូវនេះ គេអាចយល់បាន ដោយសារតែមានកន្លែងបកប្រែ​សូម្បីតែភាសានិយាយក៏មានសម្រួលរឿងភាសានេះដែរ៕