សម្តេចប៉ាបអរគុណសន្តិសុខសាធារណៈសម្រាប់ការប្តេជ្ញាចិត្តចំពោះសុវត្ថិភាពសាធារណៈនៅវ៉ាទីកង់

សម្តេច​ប៉ាបហ្រ្វង់ស៊ីស្កូកាលពីសប្តាហ៍មុនបានជួបភ្នាក់ងារសន្តិសុខនានាដែលបានកំពុងតែទទួលភារៈកិច្ចការរក្សាសន្តិសុខនៅទីក្រុងរ៉ូមនិងវ៉ាទីកង់ ហើយនៅក្នុងឱកាសនោះ ទ្រង់បានថ្លែងអំណរគុណពួកគេ ដែលបានធានាសុវត្ថិភាពនៅ ជុំវិញទីលាន សន្តសិលា ​។

វ៉ាទីកង់ញូវបានរាយការណ៍ថា ក្នុងឱកាសនោះ សម្តេចប៉ាបបានវាយតម្លៃខ្ពស់ចំពោះការលះបង់និងការទទួលខុសត្រូវរបស់ពួកគេ ដែលបានបំពេញការងារប្រកបដោយ វិជ្ជាជីវៈ និងសប្បុរសស្របតាមគោលលទ្ធិរបស់ព្រះសហគមន៍ ។

សម្តេចប៉ាបបានមានបន្ទូលថា ពួកគេគឺពិតជាមានតួរនាទីដ៏សំខាន់សម្រាប់ការធានាសុវត្ថិភាពរបស់សម្តេចប៉ាប និងបុព្វជិតនៅវ៉ាទីកង់ក៏ដូចជា អ្នកធ្វើធម្មយាត្រា និងអ្នកទេសចរនៅជុំវិញទីលាន សន្តសិលានិងអ្នកពាក់ព័ន្ធទាំងអស់ ។

សម្តេចប៉ាប បានសង្កត់ធ្ងន់ថា ការងាររបស់មន្ត្រីសន្តិសុខពិតជាទាមទារភាពក្លាហាន និងការលះបង់ខ្ពស់ ព្រមទាំងមានការអត់ធ្មត់ និងឆន្ទៈ ទូលបង្គំជាខ្ញុំសូមអរគុណ ។

មកដល់ពេលនេះបុរីវ៉ាទីកង់គឺជារដ្ឋមានដែនអធិបតេយ្យមួយដែលគ្រប់គ្រងដោយសម្តេចប៉ាប និង ជាក្បាលម៉ាស៊ីនរបស់ព្រះសហគមន៍កាតូលិកទាំងមូលនៅលើពិភពលោក ប៉ុន្តែវ៉ាទីកង់មិនមានកងកម្លាំងប្រដាប់អាវុធរបស់ខ្លួននោះទេ ។​

សន្តិសុខនិងសុវត្ថិភាពនៅទីនោះបច្ចុប្បន្ននេះកំពុងតែរក្សានិងការពារដោយកងកម្លាំងសន្តិសុខអ៊ីតាលី និង កងកម្លាំងឆ្មាំសន្តិសុខស្វីស ។