វ៉ាទីកង់ញូវបានប្រកាសនៅសប្តាហ៍មុន ថា សម្តេចប៉ាប ហ្វ្រង់ស៊ីស្កូ បានបង្កើតភូមិភាគថ្មីនៅក្នុងប្រទេសចិន ហើយបានតែងតាំងបិតាលោកបូជាចារ្យ អេនថូនី ជី វៃហុង ( Anthony Ji Weizhong )ជាអភិបាលដំបូងរបស់ព្រះសហគមន៍នោះ។
ទីភ្នាក់ងារព័ត៌មានកាតូលិកបានរាយការណ៍ថា សម្តេចប៉ាបបានសម្រេចចិត្តបែបនេះកាលពីខែតុលាឆ្នាំមុន ដើម្បីបង្កើតភូមិភាគថ្មី លឺលាង (Lüliang)ក្នុងប្រទេសចិន ។
តាំងពីយូរមក ជាពិសេសនៅក្រោយពេលដែលចិនបានធ្វើបដិវត្តវប្បធម៌ ការតែងតាំងលោកបូជាចារ្យ ក៏ដូចជាអភិបាលនៃព្រះសហគមន៍កាតូលិកនៅចិនគឺមិនមានឯកភាពគ្នាទេរវាងចិននិងសន្តអសនៈ ប៉ុន្តែ ថ្មីៗនេះ គោលនយោបាយបានប្រែប្រួល ហើយប្រទេសចិននិងសន្តអសនៈក៏ហាក់ស៊ីសង្វាក់គ្នាឡើងវិញ នៅក្នុងចំណុចទាំងនេះ ។
ភូមិភាគថ្មីដែលទើបបង្កើតថ្មី ស្ថិតនៅចម្ងាយប្រហែល ៤00 ម៉ាយភាគនិរតីនៃទីក្រុងប៉េកាំង ក្នុងខេត្តចាន់ស៊ី។ ព្រះសហគមន៍នេះមាន ប្រជាជនសរុបចំនួន ៣,៣ លាននាក់ ដែលក្នុងនោះប្រហែល ២០.000 នាក់ជាកាតូលិក។
ព្រះសហគមន៍នេះមានបូជាចារ្យសរុបចំនួន ៥១ នាក់ និងបងស្រី ចំនួន ២៦ នាក់ កំពុងតែបម្រើកិច្ចការផ្សេងៗក្នុងភូមិភាគ។
លោកអភិបាល អេនថូនី ជី វៃហុង មានអាយុ៥១ ឆ្នាំ ដែលបានក្លាយជាបុព្វជិត ក្នុងឆ្នាំ ២០០២ ។ លោកបានសិក្សានៅប្រទេសចិន និងក្នុងប្រទេសអាល្លឺម៉ង់ ហើយបានបម្រើការព្រះសហគមន៍ ហ្វេនយ៉ាង (Fenyang )។
Daily Program
