លោកកាឌីណាល់ដែលទទួលបន្ទុកកិច្ចការព្រះសហគមន៍នៅភាគខាងកើតបាន ឆ្លុះបញ្ចាំងពីសុន្ទរកថារបស់សម្តេចប៉ាបទៅកាន់កម្មវិធីមួយ ហើយពោលថា ព្រះសហគមន៍កាតូលិកនៅ ភាគខាងកើតគឺសុទ្ធតែជាជនរងគ្រោះនៃសង្គ្រាម។
លោកកាឌីណាល់ ក្លូឌីអូ ហ្គូជេរ៉ូតទី (Claudio Gugerotti)បានថ្លែងទៅកាន់សមាជិកនៃអង្គការមនុស្សធម៌របស់សន្តអសនៈសម្រាប់ព្រះសហគមន៍ភាគខាងកើតថា សម្តេចប៉ាប បានរំលឹកឡើងវិញអំពីការអំពាវនាវសុំសន្តិភាព និងចូលរួមសាមគ្គីជាមួយគ្រីស្តបរិស័ទនៅភាគខាងកើតដែលកំពុងរងគ្រោះដោយសារសង្រ្គាម។
លោកបាននិយាយថា ផលនៃសង្រ្គាមជាបញ្ហាចម្បងរបស់មនុស្សជាតិនាពេលបច្ចុប្បន្ននេះនិងជាពិសេសបណ្តាប្រទេសស្ថិតនៅក្នុងតំបន់ភាគខាងកើត។
លោកកាឌីណាល់បាននិយាយថា ៖«ពួកគេទាំងអស់គឺជាជនរងគ្រោះនៃសង្រ្គាម ដោយសារតែមានមនុស្សមួយចំនួន បង្កភាពវឹកវរក្នុងប្រទេសហើយឈានដល់បង្កើតអស្ថិរភាពក្នុងតំបន់តែម្តង»។
លោកបានបន្តថា វាជារឿងដ៏គួរឱ្យភ័យខ្លាច ហើយភាពកេងប្រវ័ញ្ចនឹងកើតមានក្នុងចំណោមមនុស្សទាំងនេះ ជាពិសេសក្នុងដំណាក់កាលកសាងឡើងវិញបន្ទាប់ពីសង្រ្គាមដែលពួកគេខ្លួនឯងបានបញ្ឆេះ។
លោកបានបន្តថានេះជាអ្វីដែលគួរឲ្យរន្ធត់ណាស់ ដែលមនុស្សទាំងនោះនឹងមកតាមក្រោយ ហើយផ្តល់ប្រាក់ដើម្បីកសាងសង្គមមួយដែលខ្លួនគេបានបំផ្លាញដោយសារផែនការនៃសង្គ្រាមរបស់ពួកគេ៕
Daily Program
