ជម្លោះមជ្ឈិមបូព៌ាឆាបឆេះឡើងវិញ ៖ លោកដូណាល់ ត្រាំ ព្រមានវាយប្រហារ អ៊ីរ៉ង់ ធ្ងន់ធ្ងរ ខណៈតម្លៃប្រេងអន្តរជាតិស្ទុះហក់ឡើងលើស ៩០ដុល្លារ
វ៉ាស៊ីនតោន/តេអេរ៉ង់ ៖ បន្ទាប់ពីមានភាពស្ងប់ស្ងាត់អស់រយៈពេលមួយខែ ជាមួយនឹងការ ផ្តោតលើ «សង្គ្រាមសេដ្ឋកិច្ច» សភាពការណ៍តានតឹងថ្មីរវាងសហរដ្ឋអាម៉េរិក និងអ៊ីរ៉ង់ បាន ឆាបឆេះឡើងវិញយ៉ាងកក្រើក។ កាលពីថ្ងៃចន្ទ ទី៣១ ខែសីហា ប្រធានាធិបតីអាម៉េរិក លោក ដូណាល់ ត្រាំ បានចេញមុខព្រមានធ្ងន់ៗថា នឹងប្រើប្រាស់កណ្តាប់ដៃដែកវាយប្រហារទៅលើប្រទេសអ៊ីរ៉ង់សាជាថ្មី។
ការព្រមាននេះ បានធ្វើឡើងបន្ទាប់ពីកងកម្លាំងអាម៉េរិកបានបើកប្រតិបត្តិការទម្លាក់គ្រាប់បែកលើទីតាំងបាញ់រ៉ុក្កែតចំនួនពីររបស់អ៊ីរ៉ង់នៅលើកោះឡារ៉ាក់ (Larak) ដែលជាចំណុចយុទ្ធសាស្ត្រដ៏សំខាន់ក្នុងច្រកសមុទ្រអ័រមូស (Strait of Hormuz)។
យោងតាមទីបញ្ជាការយោធាអាម៉េរិកប្រចាំនៅមជ្ឈិមបូព៌ា (Centcom) បានឲ្យដឹងថា ការវាយប្រហារនេះ ធ្វើឡើងបន្ទាប់ពីបានរកឃើញថា កងឆ្មាំបដិវត្តន៍អ៊ីរ៉ង់កំពុងរៀបចំបាញ់រ៉ូក្កែតផ្ទុកមីនចូលទៅក្នុងច្រកសមុទ្រអ័រមូសនេះ។ ប្រព័ន្ធផ្សព្វផ្សាយអ៊ីរ៉ង់បានរាយការណ៍ថា មនុស្ស ៣នាក់បានបាត់បង់ជីវិត និង ៧នាក់ផ្សេងទៀតបានរងរបួសនៅក្នុងហេតុការណ៍នោះ។
ជាការឆ្លើយតប ប្រទេសអ៊ីរ៉ង់បានបាញ់ប្រហារដោយប្រើប្រាស់មីស៊ីល និងដ្រូន តម្រង់ទៅរកគោលដៅរបស់អាម៉េរិកនៅក្នុងប្រទេសហ្ស៊កដានី និងប្រទេសអារ៉ាប់រួម អេមីរ៉េត (UAE)។ កងឆ្មាំបដិវត្តន៍អ៊ីរ៉ង់ ក៏បានអះអាងពីការបាញ់ទម្លាក់ដ្រូនអាម៉េរិកចំនួន ២គ្រឿង នៅលើច្រកសមុទ្រអ័រមូសផងដែរ។ ភ្លាមៗនោះ ប្រទេសហ្ស៉កដានីបានប្រកាសថា ខ្លួនបានបាញ់ទម្លាក់មីស៊ីលចំនួន ៨គ្រាប់ ដែលបានហោះចូលដែនអាកាសខ្លួន ខណៈដែលប្រទេសអារ៉ាបរួម អេមីរ៉េត បានថ្កោលទោសការប្រទូស្តរាយនេះថាជា «ការបង្កើនសភាពការណ៍តានតឹងដ៏គ្រោះថ្នាក់»។ យ៉ាងណាមិញ យោធាអ៊ីរ៉ង់បានព្រមានខ្លាំងៗទៅកាន់ប្រទេសជិតខាងក្នុងតំបន់ថា នឹងរងការវាយបកយ៉ាងធ្ងន់ធ្ងរ ប្រសិនបើអនុញ្ញាតឲ្យអាម៉េរិកប្រើប្រាស់ទឹកដីរបស់ពួកគេដើម្បីវាយប្រហារលើអ៊ីរ៉ង់។
ថ្លែងប្រាប់បណ្តាញព័ត៌មានហ្វ៉កញូ (Fox News) លោកដូណាល់ ត្រាំ បានសង្កត់ធ្ងន់ថា៖ «វានឹងមានការឆ្លើយតប ហើយអាម៉េរិកនឹងវាយប្រហារយ៉ាងខ្លាំងក្លាទៅលើពួកគេ (អ៊ីរ៉ង់)»។
ផ្ទុយទៅវិញ ប្រធានាធិបតីអ៊ីរ៉ង់ លោកម៉ាស៊ូដ ពេហ្ស៊េស្គៀន (Massoud Pezeshkian) បានអះអាងថា ប្រទេសរបស់លោកមិនចង់ឱ្យមានសង្គ្រាមបន្តទៀតឡើយ ដោយលោកបញ្ជាក់ថា ការពង្រីកជម្លោះមិនបានផ្តល់ផលប្រយោជន៍ឱ្យភាគីណាមួយក្នុងតំបន់នោះទេ ហើយទីក្រុងតេអេរ៉ង់នៅតែបន្តខិតខំប្រឹងប្រែងដើម្បីឈានទៅរកកិច្ចព្រមព្រៀង។ ក្នុងដំណើរទៅកាន់ប្រទេសគៀហ្គីស្តង់ ដើម្បីចូលរួមកិច្ចប្រជុំកំពូលនៃអង្គការសហប្រតិបត្តិការសៀងហៃ (SCO) លោកពេហ្ស៊េស្គៀន បានជួបពិភាក្សាជាមួយនាយករដ្ឋមន្ត្រីប៉ាគីស្ថាន លោកស្ហ៉េបា ស្ហ៉ារីហ្វ (Shehbaz Sharif) ដែលដើរតួជាអ្នកសម្របសម្រួលកិច្ចចរចាវាងអាម៉េរិក និងអ៊ីរ៉ង់។
ការផ្ទុះអាវុធឡើងវិញដែលឈានចូលដល់ខែទី៧ ជាមួយនឹងភាពជាប់គាំងនៃកិច្ចចរចា បានធ្វើឲ្យទីផ្សារប្រេងពិភពលោកមានការរញ្ជួយយ៉ាងខ្លាំង។ តម្លៃប្រេងឆៅប្រភេទ (Brent) ដែលជាសូចនករអន្តរជាតិបានហក់ឡើងលើស ៩០ដុល្លារ ក្នុង ១បារ៉ែល។ ច្រកសមុទ្រអ័រមូស ដែលជាផ្លូវដឹកជញ្ជូនប្រេង ១/៥ នៃតម្រូវការពិភពលោក ត្រូវបានទីក្រុងតេអេរ៉ង់បិទស្ទើរតែទាំងស្រុង ចាប់តាំងពីសង្គ្រាមបានផ្ទុះឡើងដោយសារការវាយប្រហាររួមគ្នារវាងអ៊ីស្រាអែល និងអាម៉េរិក កាលពីថ្ងៃទី២៨ ខែកុម្ភៈ ឆ្នាំ២០២៦។
Daily Program
