កិច្ចប្រជុំចុងក្រោយរបស់ក្រុមលោកកាឌីណាល់ផ្តោតលើគុណសម្បត្តិចាំបាច់សម្រាប់អនាគតសម្តេចប៉ាបនា
នៅព្រឹកថ្ងៃអង្គារ ទី ៦ ខែឧសភា មួយថ្ងៃមុនការចាប់ផ្តើមដំណើការជ្រើសរើសសម្តេចប៉ាបថ្មី សន្និបាតលោកកាឌីណាល់លើកទី១២ មានការចូលរួមដោយលោកកាឌីណាល់សរុប១៧៣រួមទាំងលោកកាឌីណាល់ដែលមានសិទ្ធិបោះឆ្នោតចំនួន១៣៣រូប ។
លោក ម៉ាតេទូ ប្រ៊ុននី (Matteo Bruni ) ប្រធានការិយាល័យព័ត៌មានសន្តអាសនៈបានអះអាងថា សន្និបាតចុងក្រោយបន្ទាប់ពីសម្តេចប៉ាបហ្រ្វង់ស៊ីស្កូសោយទិវង្គតនេះ បានចាប់ផ្ដើមនៅម៉ោង ៩ ព្រឹក ដោយការអធិស្ឋានមួយភ្លែត ហើយអ្នកចូលរួមបានស្តាប់បទអន្តរាគមន៍ចំនួន២៦ ដែលនិយាយអំពីប្រធានបទជាច្រើន ប៉ុន្តែសំខាន់គឺផ្តោតលើលក្ខណៈសម្បត្តិសម្តេចប៉ាបថ្មី ។
ក្រៅពីនោះគឺមានពាក់ព័ន្ធនឹងច្បាប់ព្រះសហគមន៍ បញ្ហាស្តីពីការរំលោភបំពាន បញ្ហាសេដ្ឋកិច្ចរបស់សន្តអាសនៈ ការងារដើម្បីសន្តិភាព។ល។
លោកបានបញ្ជាក់ថា សន្និបាតលោកកាឌីណាល់ក្រោមដំណើរការដឹកនាំរបស់សម្តេចប៉ាបហ្រ្វង់ស៊ីស្កូ ត្រូវបានបញ្ចប់ នៅម៉ោង ១២ និង ៣០ នាទីហើយនឹងមិនមានការរៀបចំទៀតទេរហូតដល់មានការជ្រើសរើសសម្តេចប៉ាបថ្មី៕
Daily Program
