ការសម្រេចចិត្តជាប្រវត្តិសាស្រ្ត ប្រតិកម្មបន្ទាប់ពីការទទួលស្គាល់រដ្ឋប៉ាឡេស្ទីន​ដោយប្រទេសបារាំង

ប្រតិកម្មនៅបារាំង និងអន្តរជាតិកើនឡើងខ្លាំង កាលពីថ្ងៃទី២២ ខែកញ្ញា បន្ទាប់ពីការប្រកាស​ជាផ្លូវការដោយលោកអេម៉ានូអេល ម៉ាក្រុង នៃការទទួលស្គាល់រដ្ឋប៉ាឡេស្ទីន​ដោយប្រទេស​បារាំង នៅពេលបើកសមាជប្រចាំឆ្នាំនៃអង្គការសហប្រជាជាតិនៅទីក្រុងញូយ៉ក។

បន្ទាប់ពីចក្រភពអង់គ្លេស កាណាដា អូស្រ្តាលី និងព័រទុយហ្គាល់ ដល់វេនបារាំង ដែលបាន​ទទួល​​ស្គាល់ជាផ្លូវការ នៃរដ្ឋប៉ាឡេស្ទីន នៅថ្ងៃទី២២ ខែកញ្ញា ឆ្នាំ២០២៥។ ការប្រកាស​នេះ ក៏​បាន​​បង្កឲ្យមានប្រតិកម្មជាច្រើនភ្លាមៗ នៅបារាំង ក៏ដូចជា នៅបរទេស។

អាជ្ញាធរប៉ាឡេស្ទីន បានមានប្រតិកម្មក្រោយបន្តិចក្រោយមកភ្លាម​ចំពោះសេចក្តីថ្លែងការណ៍​នៃ​ប្រធានាធិបតីបារាំងនៅអង្គការសហប្រជាជាតិ និងស្វាគមន៍សម្រាប់ការសម្រេចចិត្តជា​ប្រវត្តិសាស្រ្ត និងប្រកបដោយភាពក្លាហាននេះ។ នៅក្នុងសេចក្តីប្រកាសមួយ ក្រសួងកិច្ចការ​បរទេស​ប៉ាឡេស្ទីនបានអបអរសាទរ នៃការទទួលស្គាល់ពីសាធារណរដ្ឋបារាំងជាមិត្តនៃ​រដ្ឋ​ប៉ាឡេស្ទីន និងចាត់ទុកការទទួលស្គាល់នេះជាការសម្រេចចិត្តជាប្រវត្តិសាស្រ្ត និងក្លាហាន​ស្រប​តាមច្បាប់អន្តរជាតិ និងដំណោះស្រាយនៃអង្គការសហប្រជាជាតិ ហើយក៏គាំទ្រកិច្ចខិតខំ​ប្រឹងប្រែង​ដែលដាក់ចេញដើម្បីឈានទៅរកសន្តិភាព ក៏ដូចជាការដាក់ឲ្យដំណើរការនូវ​ដំណោះ​ស្រាយរដ្ឋពីរ។ ក្រសួងការបរទេសប៉ាឡេស្ទីន ក៏បានសាទរនូវតួនាទីជាគ្រឹះដែល​ដើរ​តួដោ​យបារាំង និងប្រធានាធិបតីម៉ាក្រុង និងជំរុញឲ្យរដ្ឋនានាជាច្រើនទៀតឲ្យធ្វើការ​ទទួល​ស្គាល់​​ដូច​គ្នានេះ។

ចំណែកប្រទេសអារ៉ាប៊ី សាអ៊ូឌីត បានអំពាវនាវឲ្យប្រទេសទាំងអស់ប្រកាន់យកនូវវិធានការ​ជា​ប្រវត្តិសាស្រ្ដ​ដូចគ្នាទទួលស្គាល់​រដ្ឋប៉ាឡេស្ទីន។ លោកហ្វ៉ៃសាល់ បេន ហ្វាកហាណេ រដ្ឋមន្រ្តី​ក្រសួង​ការបរទេសអារ៉ាប៊ី សាអ៊ូឌីត បានថ្លែងថា ៖ “យើងអំពាវនាវឲ្យប្រទេសដទៃៗ ទៀត ចាត់​​វិធានការជាប្រវត្តិសាស្រ្តស្រដៀងៗ គ្នា ដែលនឹង​ផ្តល់ឥទ្ធិពលដ៏មានសារសំខាន់​ដើម្បី​គាំទ្រ​​​កិច្ចខិតខំប្រឹងប្រែងឆ្ពោះទៅរកការដាក់ឲ្យដំណើរ​ការនូវដំណោះស្រាយរដ្ឋពីរ និងឈាន​ទៅ​​រកសន្តិភាពពេញលេញនៅមជ្ឈិមបូព៌ា និងរកឃើញ​សច្ចភាពថ្មី​ដែលតំបន់អាចនឹងរីករាយ​នឹង​​សន្តិភាព ស្ថិរភាព និងភាពរុងរឿង”។

មានជំហរដែលចែករំលែកដោយប្រទេសជាច្រើន ប្រធានាធិបតីនៃសាធារណរដ្ឋឥណ្ឌូនេស៊ី លោក​​ប្រាបូវ៉ូ ស៊ូប៊ីយ៉ង់តូ បានទទូចថា ៖ “យើងថ្កោលទោសរាល់អំពើហិង្សាដែលដាក់​គោលដៅ​​លើ​​ប្រជាជន​ស៊ីវិល ៖ មានតែដំណោះស្រាយរដ្ឋពីរទេ ដែលនឹងអាចនាំទៅរក​សន្តិភាព។”

ព្រះមហាក្សត្រនៃប្រទេសហ្ស៉កដានី វាយតម្លៃថា ៖ “សព្វថ្ងៃពិភពលោកបោះជំហានដ៏មាន​សារ​សំខាន់លើផ្លូវនៃសន្តិភាពដែលមានយុត្តិធម៌ និងចីរភាព”។

ចំណែក​លោកអន់តូនីញ៉ូ ហ្គូទែរ៉េស អគ្គលេខាអង្គការសហប្រជាជាតិ បាននិយាយការពារ​សម្រាប់​​ដំណោះ​ស្រាយរដ្ឋពីរ ដែលជាដំណោះស្រាយតែមួយដើម្បីបញ្ចប់​សុបិនអាក្រក់។ លោក​​ពន្យល់ថា ៖ “ពេលនេះ យើងនៅទីនេះដើម្បីចូលរួមចំណែកស្វែករកដំណោះស្រាយ​តែ​មួយ​គត់ដើម្បីបញ្ឈប់សុបិនអាក្រក់ គឺដំណោះស្រាយរដ្ឋពីរ រដ្ឋពីរដែលមានប្រជាធិបតេយ្យ អធិបតេយ្យ និងឯករាជ្យ គឺអ៊ីស្រាអែល និងប៉ាឡេស្ទីន ដែលរស់នៅជាមួយដោយសន្តិភាព និង​​សន្តិសុខ”។

ចំណែកសហរដ្ឋអាម៉េរិក និងអ៊ីស្រាអែល បានរិះគន់ការប្រកាសរបស់បារាំង មុនពេល​សេចក្តី​ថ្លែងការណ៍​ផ្លូវការរបស់ប្រធានាធិបតីបារាំង លោកអេម៉ានូអែល ម៉ាក្រុងទៅទៀត។

យោងតាមអ្នកនាំពាក្យសេតវិមានអាម៉រិក លោកស្រី ការ៉ូលីន លីវីត បានឲ្យដឹងថា ដោយជា​សម្ព័ន្ធ​​មិត្ត​ដ៏សំខាន់នៃនាយករដ្ឋមន្រ្តីអ៊ីស្រាអែល លោកបេនចាមីន ណេតាន់យ៉ាហ៊ូ លោក​ដូណាល់ ត្រាំ គិតថា នេះគឺជារង្វាន់សម្រាប់ក្រុមហាម៉ាស សម្រាប់ការទទួលស្គាល់រដ្ឋ​ប៉ាឡេស្ទីន។