វាមិនមែនជាការឡើងកម្តៅអាកាសធាតុទេ ជាមួយលោកត្រាំ អ្នកសង្ស័យលើរឿងអាកាសធាតុ ឡើងកាន់អំណាចជាថ្មី
ការបោះឆ្នោតថ្ងៃទី៦ ខែវិច្ឆិកា ឆ្នាំ២០២៤ ទៅកាន់សេតវិមានរបស់លោកដូណាល់ ត្រាំ ដែលជាអ្នកមិនជឿលើរឿងអាកាសធាតុទាល់តែសោះ និងស្រឡាញ់ការប្រើប្រាស់ប្រេង នឹងធ្វើឲ្យកត់សម្គាល់នូវរបត់ ១៨០ អង្សារនៃនយោបាយបរិស្ថាន និងអាកាសធាតុរបស់សហរដ្ឋអាម៉េរិក។ នេះធ្វើឲ្យគ្រោះថ្នាក់ដល់កិច្ចខិតខំប្រឹងប្រែងរបស់ពិភពលោក ដែលសំដៅទប់ស្កាត់ការឡើងកម្តៅអាកាសធាតុដែលបណ្តាលមកពីមនុស្ស។
អ្នកសាធារណរដ្ឋរូបនេះ បានសន្យានៅអំឡុងពេលយុទ្ធនាការឃោសនារបស់លោក ឲ្យខួងប្រេងដោយគ្មានលក្ខខណ្ឌ និងដាក់ការសង្ស័យជាចំហអំពីសច្ចភាពនៃការប្រែប្រួលអាកាសធាតុ។ នេះគឺជាការបញ្ច្រាស់ពីនយោបាយផ្លាស់ប្តូរថាមពលដែលតាំងចិត្តធ្វើដោយប្រធានាធិបតីមុនគឺលោកចូ បាយឌិន។ នៅពេលថ្លែងការជ័យជម្នះ ដោយនិយាយអំពីប្រេង និងឧស្ម័ន មហាសេដ្ឋី លោកដូណាល់ ត្រាំ បាននិយាយស្វាគមន៍ថា ៖ “យើងមានមាសខ្មៅច្រើនជាងគ្រប់ប្រទេសនៅលើពិភពលោក ច្រើនជាង អារ៉ាប៊ី សាអ៊ូឌីត និងរុស្ស៊ី”។
ជ័យជម្នះរបស់លោកគ្មានការសង្ស័យនឹងបង្កឲ្យមានការបោះបង់កិច្ចសន្យារបស់សហរដ្ឋអាម៉េរិក ដែលជាអ្នកបំភាយឧស្ម័នផ្ទះកញ្ចក់ធំបំផុតទី២នៅលើពិភពលោក ពីការទូតអាកាសធាតុ។
នៅដំណាច់អណត្តិទី១ របស់លោក លោកដូណាល់ ត្រាំ បានដកអាម៉េរិកចេញពីកិច្ចព្រមព្រៀងទីក្រុងប៉ារីសស្តីអំពីអាកាសធាតុនៅឆ្នាំ២០១៥ មុននឹងលោកចូ បាយឌិន បញ្ចូលមកវិញនៅឆ្នាំ២០២១។ ប្រធានាធិបតីថ្មីអាម៉េរិកអាចនឹងដកអាម៉េរិកចេញវិញនៅពេលចាប់ផ្តើមចូលមកកាន់សេតវិមាននៅថ្ងៃទី២០ ខែមករា ដែលធ្វើឲ្យអាម៉េរិកចាកចេញពីកិច្ចព្រមព្រៀងទីក្រុងប៉ារីសស្តីអំពីអាកាសធាតុពិតប្រាកដនៅខែមករា ឆ្នាំ២០២៦។
នៅក្នុងក្របខណ្ឌនៃកិច្ចព្រមព្រៀងនេះ សហរដ្ឋអាម៉េរិកសន្យាកាត់បន្ថយការបំភាយឧស្ម័នផ្ទះកញ្ចក់របស់ខ្លួនពាក់កណ្តាលពីពេលនេះទៅដល់ឆ្នាំ២០៣០។ យោងតាមមជ្ឈមណ្ឌលសិក្សាស្រាវជ្រាវ រ៉ូឌៀម ហ្គ្រូប Rhodium Group បានឲ្យដឹងថា នៅឆ្នាំ២០២៣ ការកាត់បន្ថយការបំភាយ គឺបាន ១៨%។ តែសម្រាប់អ្នកជំនាញទាំងអស់ គោលដៅអាកាសធាតុនឹងឃ្លាតឆ្ងាយជាមួយនឹងជ័យជម្នះលោក ដូណាល់ ត្រាំ ជាមួយនឹងមានឥទ្ធពលផងដែរទៅលើការកើនកម្តៅពិភពលោក។
លោកស្រីឡូរ៉ង់ ទូប៊ីយ៉ាណា ស្ថាបត្យករនៃកិច្ចព្រមព្រៀងទីក្រុងប៉ារីស វាយតម្លៃថា ៖ “លើកនេះ គឺកាន់តែធ្ងន់ធ្ងរជាងឆ្នាំ២០១៦”។ ដោយអំពាវនាវឲ្យអឺរ៉ុបសន្យាឲ្យបានច្រើនថែមទៀត លោកស្រីបានប្រាប់ថា ៖ “គេត្រូវតែមានការប្រមូលផ្តុំដោយមិនធ្លាប់មានពីមុនដើម្បីឲ្យការប៉ះទង្គិចពីការសម្រេចចិត្តរបស់អាម៉េរិកមិនជះឥទ្ធិពលលើប្រទេសដទៃទៀតដែលនឹងក្លាយទៅជាអល់អែកក្នុងរឿងបង្កើនល្បឿនសកម្មភាពខាងអាកាសធាតុ។”
ការដកខ្លួនរបស់អាម៉េរិកពីការទូតអាកាសធាតុអាចនឹងមានសក្តានុពលផ្តល់ឲ្យអ្នកបំពុលធំៗ ដទៃៗ ទៀតដូចជា ចិន និងឥណ្ឌា នូវលេសដើម្បីកាត់បន្ថយផែនការផ្ទាល់របស់ខ្លួន។ ចំណែកលោកចូហាន រ៉ុកស្ត្រម អ្នកវិទ្យាសាស្រ្តពីវិទ្យាស្ថានបូស្តាំសម្រាប់ការស្រាវជ្រាវលើឥទ្ធិពលនៃអាកាសធាតុ សម្តែងនូវក្តីព្រួយបារម្ភថា ៖ “ការបង្អង់បួនឆ្នាំមិនអាចត្រូវបានអនុញ្ញាតទេនៅអំឡុងទសវត្សដ៏គ្រោះថ្នាក់នេះ។”
លោកលៀ ស្តុកខេស អ្នកឯកទេសនៃវិទ្យាសាស្រ្តនយោបាយនៅសកលវិទ្យាល័យ កាលីហ្វ៉នី នៅទីក្រុងសានតា បាកបារ៉ាស និងជាអ្នកឯកទេសខាងអាកាសធាតុ បានថ្លែងថា ៖ “លទ្ធផលបោះឆ្នោតអាម៉េរិក នឹងមានឥទ្ធិពលលើផែនដីទាំងមូល”។
Daily Program
